ވީއައިއޭ އަށް 59 އަހަރު: ކުރިއަށް އޮތީ ބޮޑެތި ތަރައްގީތަކެއް

މީގެ 59 އަހަރު ކުރިން އޭޕްރީލް 12، 1966 ގައި އޭރުގެ ނަމުން ނަމަ ހުޅުލޭ އެއާޕޯޓަށް އެ ޖެއްސީ އެއާ ސިލޯނުގެ އެމްރޯ. އޭސީޖޭއާރު މަރުކާގެ މަތިންދާބޯޓެކެވެ. އެ ހާއްސަ މަތިންދާބޯޓުން ފައިބައިވަޑައިގަތީ އޭރުގެ ބޮޑުވަޒީރު އިބްރާހިމް ނާސިރެވެ. އެ މަނިކުފާނު ވަޑައިގެން ހުޅުލޭ އެއާޕޯޓު ރަސްމީކޮށް ހުޅުއްވައި ދެއްވުމާ އެކު، މިއަދު އުފާ ލިބިގަންނަ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ދިގު ތާރީހު ގުނަން ފެށުނީ އެވެ.

ވެލާނާ އިންޓަނޭޝަނަލް އެއާޕޯޓަށް މިއަދު 59 އަހަރު ފުރުނުއިރު ކުރިއަށް އޮތީ ރާއްޖޭގެ މައިދޮރާށީގެ 60 އަހަރު ފުރުމެވެ. އަންނަ އަހަރުގެ އޭޕްރީލް 12 އަކީ އެ ދުވަހެވެ. މިއަދު ފާހަގަކުރި 59 އަހަރާ އެކު، އެ ކުލަގަދަ ހަފުލާގެ ތައްޔާރީތައް ވެސް ފެށުނީ ކަމަށް ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލް އިން ބުންޏެވެ.

ވީއައިއޭގެ 59 ވަނަ އަހަރީ ދުވަސް ފާހަގަކުރަން މިއަދު ފެށީ ދިދަ ނެގުމުގެ ހާއްސަ ރަސްމިއްޔާތަކުންނެވެ. އެއާޕޯޓުގައި ބޭއްވި ރަސްމިއްޔާތުގައި އެމްއޭސީއެލްގެ މެނޭޖުމަންޓުގެ އިސްވެރިންނާއި އެހެން މުވައްޒަފުންނާއި ސްޓޭކްހޯލްޑަރުން ބައިވެރިވި އެވެ.

ދިދަ ނެގުމަށް ފަހު ވަނީ 59 ފޫޓުގެ ކޭކެއް ފަޅައިފަ އެވެ. އަދި އެކުވެރިކަމުގެ ހިނގާލުމެއް ވެސް ބޭއްވި އެވެ.

އެ ރަސްމިއްޔާތުގައި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު ވަނީ ވީއައިއޭގެ ތަރައްގީ އަށް ސަރުކާރުން ހާއްސަކޮށް މިހާރުގެ ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ މަސައްކަތްޕުޅު ފާހަގަކުރައްވާފައި ކަަމަށް އެމްއޭސީއެލް އިން ބުންޏެވެ.

އެއާޕޯޓުގެ ތަރައްގީ އަށް ގިނަ މަސައްކަތްތަކެއް މިހާރު ވެސް ފަށާފައިވާކަން ފާހަގަކުރައްވަމުން އެމްޑީ ވިދާޅުވީ، އެ މަސައްކަތްތައް ކޮންޓްރެކްޓަރު ނިންމުމުން ކަންކަން "އަޮޕަރޭޝަނަނައިޒް" ކޮށް ގައުމަށް އޭގެ ފައިދާ ހޯދައި ދޭން ތިބީ އެމްއޭސީއެލްގެ މުވައްޒަފުން ކަމަށެވެ. އެމްއޭސީއެލްގެ މުވައްޒަފުންނަކީ އަބަދުވެސް ގައުމަށްޓަކައި އަގުހުރި ހިދުމަތްތަކެއް ކުރާ ބައެއް ކަން ޝަރީފް ފާހަގަކުރެއްވި އެވެ.

އޭނާ ވިދާޅުވިގޮތުގައި، ވީއައިއޭގެ ހަޔާތުގައި ކުރިއަށް އޮތީ ވަރަށް ގިނަ ހިދުމަތްތަކެއް ވަރަށް ބޮޑަށް ތަރައްގީ ވާނެ އަހަރުތަކެކެވެ. އެހެންވެ، ސްޓޭކްހޯލްޑަރުންނާއި ފަސިންޖަރުން އުފާވާ ފަދަ ހިދުމަތްތަކެއް އެއާޕޯޓުން ދޭން މަސައްކަތް ކުރަންޖެހޭ ކަމަށް އެމްޑީ ވިދާޅުވި އެވެ.

ވެލާނާ އިންޓަނޭޝަނަލް އެއާޕޯޓުގައި މިހާރު ހިންގާ އެންމެ ބޮޑު މަޝްރޫއަކީ އާ ޓާމިނަލްގެ މަސައްކަތެވެ. އާ ޓާމިނަލް އެއްކޮށް ބޭނުން ކުރަން ފެށުމުން އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭއިރު، މި އަހަރު އެ ޓާމިނަލް ބޭނުންކުރަން ފަށަން ވަނީ ނިންމައިފަ އެވެ. އެއާ އެކު، ގާތްގަނޑަކަށް 1،800 މުވައްޒަފުން އިތުރުކޮށް އާ އެއާލައިންތަކަށް އެއާޕޯޓުން ޖާގަ ލިބޭނެ ކަަމަށް އެމްއޭސީއެލް އިން ބުންޏެވެ.

އާ ޕެސެންޖަރު ޓާމިނަލްގައި އެއިރޯ ބޯޑިން ބްރިޖުތަކާއި ލަގެޖު އުފުލާނެ އެންމެ ޒަމާނީ ވަސީލަތްތައް އަދި ފިހާރަތަކާއި ކެއިންބުއިމުގެ ހިދުމަތްދޭ ތަންތަނާއި ވީއައިޕީ ލައުންޖުތައް ވެސް ގާއިމް ކުރުމަށް ވަނީ ނިންމައިފަ އެވެ.

ވީއައިއޭގެ އާ ޓާމިނަލާ އެކު، މުޅިން ޒަމާނީ އަދި ރީތި ތަފާތު އެއާޕޯޓެއް ފެންނާނެ ކަމަށް އެމްއޭސީއެލް އިން ވަނީ ބުނެފަ އެވެ.