ވަގަށް ސިނގިރޭޓް ބޭރުކުރުން: ފުލުހުންގެ އިސްވެރިންތަކަކަށް ތުހުމަތު ކުރާތީ ހަގީގަތް ބަލަނީ!

ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޑިއުޓީ ފްރީ އިން ސިނގިރޭޓްތަކެއް ބޭރުކުރި މައްސަލަތަކުގައި ފުލުހުންގެ ބައެއް އިސްވެރިންތަކެއް ހިމެނޭ ކަމަށް ތުހުމަތުކުރާ މައްސަލައިގެ ހަގީގަތް ބަލަން ފަށައިފި އެވެ.

ހޯމް މިނިސްޓަރު އަލީ އިހުސާންއާ "މިހާރު" އިން ސުވާލު ކުރުމުން ވިދާޅުވީ، ފުލުހުންގެ އިސް އޮފިސަރުންތަކަކަށް އެފަދަ ތުހުމަތުތަކެއް ކުރަމުންދާތީ އެ ކަން މިހާރު ބަލަމުން އަންނަ ކަމަށެވެ. އެކަމަކު، މިހާތަނަށް ވަކި ކަމެއް ފާހަގަނުވާ ކަމަށް މިނިސްޓަރު ވިދާޅުވި އެވެ.

ފުލުހުންގެ ބައެއް އިސްވެރިންގެ ބައިވެރިވުން ވަގަށް ސިނގިރޭޓް ބޭރުކުރުމުގައި އޮތް ކަމަށް ކުރާ ތުހުމަތުތަކާ އެކު، އެކައުންޓުތަކުގައި ގިނަ އަދަދަކަށް ފައިސާ ދައުރު ކުރި ކަމަށް ވެސް ތުހުމަތު ކުރެ އެވެ. އޭގެ ހަގީގަތް ވެސް ބަލާ ކަމަށް އިހުސާން ވިދާޅުވި އެވެ.

އެއާޕޯޓުގެ ޑިޕާޗާ ޓާމިނަލުން ނެރެގެން ގެންދަން އުޅުނު ޑަސްބިން ކޮތަޅުތަކެއް ޗެކުކުރިއިރު އޭގައި ސިނގިރޭޓް ކާޓަންތަކެއް ފެނުނު މައްސަލައެއްގައި މިދިޔަ މަހުގެ 25 ގައި ހައްޔަރުކުރި ދެ މީހުންގެ ތެރޭގައި އެކަކީ އިންޓެލް ފުލުހުކެވެ. އެއީ ދަފްތަރު ނަމްބަރު ރސ. 14358، ޔޫސުފް ނަޒީރު އެވެ. އެހެންވެ، އޭނާ ވަނީ މުސާރަ ނުހިނގާ ގޮތަށް ފުލުހުންގެ ވަޒީފާ އިން ސަސްޕެންޑުކޮށްފަ އެވެ.

އެ މައްސަލާގައި ދެން ހައްޔަރުކުރީ މ. ސިލްވަނެސްޓް، އަހުމަދު އަފްޒަލެވެ. އެއީ އެއާޕޯޓުގައި މަސައްކަތްކުރާ މީހެކެވެ.

އެ މައްސަލާގައި އެ މީހުން ހައްޔަރުކޮށް ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ދޫކޮށްލީ އެވެ.