ވެލެންސިއާގެ އެންމެ ބޮޑު ދަރަނި، 1.3 މިލިއަން ރުފިޔާ ހަލާސްކޮށްފި

ކްލަބް ވެލެންސިއާގެ ތާރީހުގައި އެ ޓީމަށް ކުރިމަތިވި އެންމެ ބޮޑު ދަރަނި މިހާރު ދައްކައި ނިންމާފައިވާ ކަމަށް އެ ކްލަބްގެ ޗެއާމަން އަބްދުﷲ އަޒްމީން ވިދާޅުވެއްޖެ އެވެ.

ކުރީގެ ކުޅިވަރު ނޫސްވެރިޔާ އަދި ފުޓްބޯޅަ ކޮމަންޓޭޓަރު އަޒްމީން ވިދާޅުވީ އެ ކްލަބަށް 2021 އަދި 2022 ގައި ކުޅުނު ސްޕެއިންގެ ބޯހަސް މާޓިން އާއި ހޯޒޭ އެންޓޯނިއޯ ޑޮމިންގޭޒް އަށް ދޭން ޖެހިފައި އޮތް މުސާރައިގެ ބިލާއި އޭއެފްސީ އަށް ދައްކަން ޖެހިފައި އޮތް ޖޫރިމަނާގެ ފައިސާ ވެސް ހަލާސް ކުރަން ޖުމްލަ 1.3 މިލިއަން ރުފިޔާ އަށް ވުރެ ބޮޑު އަދަދެއް ދަރަނީގެ ގޮތުގައި ދައްކާފައިވާ ކަމަށެވެ.

"ވެލެންސިއާގެ މުޅި ތާރީހުގައި ވެސް މިހާބޮޑު ދަރަންޏެއް ނާދޭ. އެއްފަހަރާ ދަރަންޏަށް މިހާ ފައިސާ ހަރަދުކުރަން ޖެހިފައެއް މީގެ ކުރިއަކުން ނެތް،" އަޒްމީން ވިދާޅުވި އެވެ.

ވެލެންސިއާގައި މޮޅު ކުޅުމެއް ދެއްކި ބޯހަސް އަށް މުސާރައިގެ ގޮތުގައި 40،000 ހާ ޑޮލަރު ދައްކަން ޖެހިފައި އޮތެވެ. އަދި ހޯޒޭ އަށް ދޭން ޖެހޭ 20،710 ޑޮލަރުގެ މޫސާރައިގެ ޕޭމަންޓެއް ވެސް އޮތެވެ.

އޭއޭފްސީ ކަޕް 2022 ގެ ކޮލިފައިން މެޗަށް ވެލެންސިއާއިން ބަންގްލަދޭޝަށް ދަތުރުނުކޮށް މެޗު ދޫކޮށްލުމުން އޭއެފްސީން ނިންމީ އެ ކްލަބް 20،000 ޑޮލަރުން ޖޫރިމަނާ ކުރުމަށެވެ. އެ ފައިސާ ބައިބަޔަށް ބަހާލައިގެން ދައްކަން ވެލެންސިއާއިން އޭއެފްސީގެ ކިބައިން ކުރިން އެދުނެވެ. އެކަމަކު އޭއެފްސީން އެންގީ އެއް ފަހަރާ އެ ފައިސާ ދެއްކުމަށެވެ.

ބިދޭސީ ދެކުޅުންތެރިންގެ މުސާރަ އާއި އޭއެފްސީގެ ޖޫރިމަނާ އަށް ޖުމުލަ 87،000 ޑޮލަރު ދައްކަން 1.3 މިލިއަން ރުފިޔާގެ މުއާމަލަތް ވެލެންސިއާއިން ކުރި އެވެ.

އާ ސީޒަން ފަށަން ތައްޔާރުވަމުން ދަނިކޮށް ދަރަނީގެ ގޮތުގައި އެހާ ބޮޑު އަދަދެއް އެއްފަހަރާ ހޭދަކުރަން ޖެހުމަކީ ކުރިމަތީގައި އޮތް ބޮޑު ގޮންޖެހުމެއް ކަމަށް އަޒްމީން ވިދާޅުވި އެވެ.

"އެ ދަރަނި ދައްކަން ޖެހިފައި ނެތް ނަމަ އެ ފައިސާ ހަރަދުކޮށްގެން ކުރިއަށް މި އޮތް ސީޒަނަށް ރަނގަޅު ސްކޮޑެއް އެކުލަވާ ލެވުނީސް،" އޭނާ ވިދާޅުވި އެވެ.

ވެލެންސިއާއިން މިފަހަރު ވެސް ސީޒަނަށް ނުކުންނާނީ ގިނަ އަދަދެއްގެ ޒުވާން ކުޅުންތެރިންނާ އެކު އެވެ. ނަމަވެސް ދަރަނި ދެއްކުމުން އެ ކްލަބަށް އެހެން ކުޅުންތެރިން ގެނައުމުގެ ހުއްދަ ލިބޭނެ އެވެ. އެންމެ ފަހުގެ ސީޒަންގައި އެ ޓީމުން އޮތީ ޓްރާންސްފާ ބޭންއެއްގަ އެވެ. އެހެންވެ އެ އަހަރު އެ ކްލަބުން ސޮއި ކުރުވި، އިބްރާހިމް ވަހީދު ހަސަނާއި ރިލްވާން ވަހީދަށް ކުޅެވޭ ގޮތެއް ނުވި އެވެ.

އަޒްމީން ވިދާޅުވީ މިހާރު ޓްރާންސްފާގެ އަދަބުން ސަލާމަތް ވެފައި ވުމުން ބިދޭސީ ހަތަރު ކުޅުންތެރިޔަކު ޓީމުގައި ޖެހުމަށް މަސައްކަތް ކުރަމުންދާ ކަމަށެވެ.

ވެލެންސިއާގެ ކުރީގެ ޗެއާމަން އަދި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ ކޮއްކޮ ރަސްލާން އަދީލް ޖަލީލުގެ ދައުރުގައި އެ ކްލަބަށް ކުރިމަތިވި އެ ދަރަނިން އަރައިގަތުމުގައި ސްޕޯޓްސް މިނިސްޓްރީން ދިން އެއްބާރުލުން އަޒްމީން ފާހަގަ ކުރި އެވެ.