އެމެރިކާގެ އެހީގައި އީރާންގެ "ކަންތައް ނިންމާލާނަން" ކަމަށް ނަތަންޔާހޫ ބުނެފި

އީރާނުން ކުރިމަތިވާ ނުރައްކަލުން ސަލާމަތްވާން ކުރަންޖެހޭ "ކަންތައް ނިންމާލާނެ" ކަމަށާއި އެކަން ކުރާނީ އެމެރިކާގެ އެހީ އާއި ތާއީދާ އެކު ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިއްޔެ ބުނެފި އެވެ.

"އީރާންގެ ޓެރަރިޒަމްގެ ނާރެހަށް މިދިޔަ 16 މަސް ދުވަހުގެ ތެރޭގައި އިޒްރޭލުން ވާނީ ބޮޑު ގެއްލުމެއް ދީފައި. އެމެރިކާގެ ރައީސް [ޑޮނަލްޑް] ޓްރަމްޕުގެ ވަރުގަދަ ޒައާމަތުގައި އަދި ތިޔަ އެންމެންގެ ފުރިހަމަ ތާއީދާ އެކު މި ކަންތައް ނިންމާލެވޭނެ ކަމާ މެދު ޔަގީންކަން އެބަ އޮތް،" އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ އެކު ގުދުސްގައި ބޭއްވި ނިއުސް ކޮންފަރެންސްގައި ނަތަންޔާހޫ ބުންޏެވެ.

އޮކްޓޫބަރު 7، 2023 ގައި ހަމާސް ޖަމާއަތުން އިޒްރޭލަށް ދިން ހަމަލާއަށް ފަހު އިޒްރޭލުން ވަނީ އީރާނުގެ ތާއީދު އޮންނަ ފަލަސްތީނުގެ ހަނގުރާމަވެރި ޖަމާއަތްތަކާއި ލުބުނާންގެ ހިޒްބުﷲ ޖަމާއަތާ ދެކޮޅަށް ވަރުގަދަ ހަމަލާތަކެއް ދީފަ އެވެ.

ހަމަ މި މުއްދަތުގެ ތެރޭގައި އިޒްރޭލަށް އީރާނުން ވެސް ވަނީ ދެ ފަހަރަކު ހަމަލާ ދީފަ އެވެ.

"އީރާނުގެ ނުރައްކަލާ ކުރިމަތިލުމުގައި އިޒްރޭލާއި އެމެރިކާ ތިބީ ކޮނޑާއި ކޮނޑު ޖައްސައިގެން،" ބޮޑުވަޒީރު ބުންޏެވެ.

އީރާނުން ނިއުކްލިއާ ހަތިޔާރު އުފެއްދިޔަ ނުދޭން ކުރެވެން ހުރި ހުރިހާ ކަމެއް، ކުރިއެކޭ އެއްގޮތަށް ކުރާނެ ކަމަށް ވިދާޅުވާ ޑޮނަލްޑް ޓްރަމްޕް އެމެރިކާގެ ވެރިކަމަށް އަލުން އިންތިހާބުވުމާ އެކު ނަތަންޔާހޫ ވަނީ އެކަމާ އުފާ ފާޅުކޮށްފަ އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ނަތަންޔާހޫއާ އެކު ވިދާޅުވީ އީރާނަކީ ދުވަހަކުވެސް ނިއުކްލިއާ ބާރަކަށް ނުވާނެ ކަމަށާއި މެދުއިރުމަތީގެ ހަމަނުޖެހުން އުފެދޭ އެންމެ ބޮޑު ސަބަކަކީ އީރާން ކަމަށެވެ.

"ނިއުކްލިއާ އީރާނެއް، ޕްރެޝަރުން ސަލާމަތްވެ، ފިޔަވަޅުތަކުން ރެކެވޭނެ ނިއުކްލިއާ އީރާނެއް ނޯންނާނެ. އެއީ ދުވަހަކު ވެސް ކުރެވޭނެ ކަމެއް ނޫން،" ގުދުސްގައި ނަތަންޔާހޫއާ އެކު ބޭއްވި ނިއުސް ކޮންފަރެންސްގައި ރޫބިއޯ ވިދާޅުވި އެވެ.

ޣައްޒާއަށް ދެމުން ދިޔަ ހަމަލާތަކާ އެކު ސަރަހައްދީ ނުތަނަވަސްކަން އިތުރުވެފައިވާ ދަނޑިވަޅެއްގައި އީރާނާއި އިޒްރޭލުން ފުރަތަމަ ފަހަރަށް މިދިޔަ އަހަރު ވަނީ ހަމަލާ ބަދަލުކޮށްފަ އެވެ.

މިދިޔަ އަހަރުގެ އޮކްޓޯބަރު މަހުގެ އެއްވަނަ ދުވަހު އީރާނުން 200 އެއްހާ މިސައިލް އިޒްރޭލަށް ފޮނުވާލުމުން ރައްދުގައި އެ މަހުގެ 26 ވަނަ ދުވަހު އިޒްރޭލުން އީރާނުގެ އަސްކަރީ ތަންތަނަށް ބޮން އަޅައި، ހަތަރު ސިފައިން މަރާލި އެވެ.

އަދި ސީރިއާގެ ދިމިޝްގުގައި ހުންނަ އީރާންގެ ކޮންސިއުލޭޓަށް އޭޕްރީލް މަހުގެ އެއްވަނަ ދުވަހު އިޒްރޭލުން ދިން ނުރައްކާތެރި ހަމަލާގެ ބަދަލުހިފުމުގެ ގޮތުން އޭޕްރީލް މަހުގެ 13 ވަނަ ދުވަހު އީރާނުން ވަނީ އިޒްރޭލަށް ޑްރޯން އާއި މިސައިލް ފޮނުވައިގެން ހަމަލާ ދީފަ އެވެ. -- އޭއެފްޕީ