ޒުހޫރާ އެކު، އެފްއޭއެމްގެ ހާލަތު ރަނގަޅު ކުރެވޭނެ ކަމުގެ އުންމީދު ކުޑަ؟!

ބޮއްސުންލާފައިވާ އެފްއޭއެމް ހަމަ މަގަށް އަޅުވަން ފީފާ އިން ނޯމަލައިޒޭޝަން ކޮމިޓީއަކާ ހަވާލު ކުރިތާ ހަ މަސް ވާން ކައިރި ވެފައިވާއިރު އެ ބުނާ "ނޯމަލައިޒް" ވާ ތަނެއް ނުފެނެ އެވެ. ފީފާއިން އެ ކޮމިޓީއާ މަސްއޫލިއްޔަތު މަތި ކުރީ އެއް އަހަރުން އެ މަސައްކަތް ނިންމާ ގޮތަށެވެ. އެ މުއްދަތުގެ ދެބައިކުޅަ އެއްބައި ގާތްގަނޑަކަށް މިހާރު ނިމުނީ އެވެ.

އެކަމަކު މިހާތަނަށް ފެންނަ މަންޒަރުތަކުން އެނގެނީ އެފްއޭއެމާއި ރާއްޖޭގެ ފުޓްބޯޅަ ހަމައަކަށް އެޅިދާނެ ކަމުގެ އުއްމީދު ކުޑަ ކަމެވެ. މިހާރު ހާލަތު އޮތް ގޮތުން، ނޯމަލައިޒޭޝަން ކޮމިޓީ އަށް މި ހާލަތު ބަދަލު ކުރެވިދާނެ ކަމުގެ އުއްމީދު ފަނޑުކަމަށް ރާއްޖޭގެ ފުޓްބޯޅައިގެ ހިންގުމުގެ ދާއިރާގެ ތަޖުރިބާކާރުން ދެކެވަޑައިގަންނަވަ އެވެ. ކަންކަން ރަނގަޅަށް ފަށައި ނުގަނެވެނީސް ކްލަބްތަކުގެ އިތުބާރު ނޯމަލައިޒޭޝަން ކޮމިޓީއާ މެދު މިހާރު ވެސް ކުޑަވެއްޖެ އެވެ.

ކްލަބެއް ހިންގުމުގައި އިސްކޮށް އުޅުއްވާ ބޭފުޅަކު ވިދާޅުވި ގޮތުގައި ނޯމަލައިޒޭޝަން ކޮމިޓީ އަށް އެހާ "ފާމް ޑިސިޝަން" ތަކެއް ނެގިފައެއް ނެތެވެ.

އޭނާ މިސާލެއްގެ ގޮތުގައި ދެއްކެވީ، ފުޓްބޯޅަ ސީޒަން ފެށުމާ މެދު ނޯމަލައިޒޭޝަން ކޮމިޓީގެ ޗެއާމަން އަހުމަދު ޒުހޫރުގެ ނިންމެވުން އެކި ފަހަރު އެކި ގޮތަށް ބަދަލުވެގެން ގޮސްފައި ވުމުގެ މައްޗަށެވެ.

"މިދިޔަ ހަފުތާގައި ކްލަބްތަކާ އެކު ބައްދަލު ކުރައްވައި ޒުހޫރު ވިދާޅުވެއްޖެ 'ސީޒަން ފަށާނީ ސަރުކާރުން ކްލަބްތަކަށް ފައިސާގެ އެހީތެރިކަން ދިނުމުން [ސީޒަން ފެށުމާ ދެމެދު[ އެއް މަސްދުވަހުގެ ޕީރިއަޑެއް ލާފައޭ،" އެ ދުވަހު ކްލަބްތައް ވެސް އެ ތަނުން ނުކުމެގެން ދިޔައީ އެހެން ވިދާޅުވީމާ އެކަމަށް އެއްބަސްވެގެން،" ނަން ހާމަކުރަން ބޭނުން ނުވެ ވާހަކަ ދެއްކި ކްލަބްގެ ވެރިޔާ ވިދާޅުވި އެވެ.

"އެކަމަކު [ޒުހޫރު އެހެން ވިދާޅުވިތާ] ގިނަ ގަޑިއިރުތަކެއް ވެސް ނުވަނީސް ކްލަބެއްގެ ސީނިއާ އެހެން މީހަކު އެކަމާ ހިތްހަމަނުޖެހިގެން ގުޅީމާ [ޒުހޫރު] އެބަ ވިދާޅުވޭ ތިމަންނަ އެ ގޮތަކަށް އަދި މުޅިއަކުން ނުނިންމަމޭ ވެސް."

"މިހާރު" އާ ވާހަކަ ދެއްކެވި ކްލަބުގެ އިސްފަރާތުން ވިދާޅުވީ ފުޓްބޯޅަ ސީޒަން ފެށުމާ މެދު ވެސް އެފްއޭއެމުން އެކި ފަހަރު ދެއްކީ އެކި ވާހަކަ އެވެ. ސީޒަންގެ ޑްރާފްޓް ކަލަންޑަރު ވެސް ތިން ފަހަރަކަށް ބަދަލުކޮށްފި އެވެ. ސީޒަން ފަށަން އެކި ތާރީހުތައް ކްލަބްތަކަށް ދީފި އެވެ. މިހާރު އޮތީ އަނެއްކާ މި މަހުގެ 24 ގައި ސީޒަން ފަށާނެ ކަމަށް ކްލަބްތަކަށް އަންގައިފަ އެވެ. އެކަމަކު އަދިވެސް ރަސްމީ ކަލަންޑަރެއް އާންމެއް ނުކުރެ އެވެ.

"އެއްގޮތަކަށް [ޒުހޫރަކަށް] ނުހުރެވޭ. ފާމް ޑެސިޝަންތަކެއް ނެގިފައެއް ނެތް،" ނޯމަލައިޒޭން ކޮމިޓީގެ މަސައްކަތްތަކާ ބެހޭގޮތުން ވާހަކަ ދެއްކި ކްލަބެއްގެ ސީނިއާ އޮފިޝަލް ވިދާޅުވި އެވެ.

ދަރަނިވެރިވެގެން މާލީ އަނދަވަޅަކަށް ވެއްޓިފައިވާ ކްލަބުތަކަށް އޮތީ ސަރުކާރުން ފައިސާ ފޮއްޗެއް ދޭނެ ކަމަށް ބަލައިގެން ތިބުމެވެ. އެކަމަކު އެއީ ދާއިމީ ހައްލެއް ނޫނެވެ. ފުޓްބޯޅައިގެ ބޮޑެތި މައްސަލަތައް އޮތީ ކްލަބްތަކާ ގުޅޭ ކަންކަމުގައި އެކަންޏެއް ނޫނެވެ. އެފްއޭއެމްގެ މައްސަލަތައް ހައްލު ކުރަން މުޅި ސަރުކާރުގެ މަދަދު މި ވަގުތު ބޭނުން ވެ އެވެ.

ޒުހުރޫ ވިދާޅުވީ އެފްއޭއެމްގެ ކަންކަމުގައި ސަރުކާރުން ސްޕޯޓްސް މިނިސްޓްރީގެ ފުރިހަމަ އެއްބާރުލުން ލިބޭ ކަމަށެވެ.

ނަމަވެސް އެފްއޭއެމްގެ މައްސަލަތައް އޮތީ ސްޕޯޓްސް މިނިސްޓްރީން ދޫކުރާ ބަޖެޓާއި އޮފީސް ހިންގާނެ ތަނެއް ދީގެން އެކަނި ހައްލެއް ހޯދޭ ވަރަށް ވުރެ ނާޒުކު ފައްތަރެއްގަ އެވެ.

އެފްއޭއެމްގެ ބިންތަކާއި ދަރަނީގެ މައްސަލަތައް ހައްލު ކުރަން، މުޅި ސަރުކާރު ޝާމިލު ކުރެވޭނެ ގޮތެއް ހޯދަން ޖެހެ އެވެ. ޒުހޫރުގެ ކޮމިޓީއަކަށް މިހާތަނަށް އަދި އެ ގޮތެއް ނުހޯދެ އެވެ. އެ އެސޯސިއޭޝަނުގެ ދަރަނި 122 މިލިއަން ރުފިޔާ އަށް އަރަ އެވެ. ކުރިން އެފްއޭއެމްގެ މިލްކިއްޔާތުގައި އޮތް ހުޅުމާލެ ފުޓްބޯޅަ ސްކޫލުގެ ބިމުގެ މައްސަލަ އަށް ދާއިމީ ހައްލެއް ނުލިބިއްޖެ ނަމަ ދަރަނި މިހާރު އޮތް ވަރަށް ވުރެ ވެސް ބޮޑުވާނެ އެވެ. ހިންދެމިލަން ވަރަށް ބޮޑަށް ދަތިވާނެ ކަމަށް ފުޓުބޯޅައިގެ ތަޖުރިބާކާރުން ދެކެވަޑައިގަންނަވަ އެވެ.

ފުޓްބޯޅަ ސްކޫލްގެ ބިމުގެ މައްސަލަ ހައްލު ވުމުގެ ކަމުގެ ކޮޅުމައްޗެއް އަދި ނުފެނެ އެވެ. އެކަމާ ގުޅިގެން، ޒުހޫރު ވަނީ ރައީސް އޮފީހަށާއި އެޗްޑީސީ އަށް ވެސް ސީޓީ ފޮނުއްވައިފަ އެވެ. އެކަމަކު ފެހި ސިގުނަލެއް ނުލިބެ އެވެ. ޒުހޫރާއި ސަރުކާރާ ދެމެދު އޮތް ގުޅުން ކުޑަކަން ވެސް މަންޒަރު ބަލަން ދުރުގައި ތިބި މީހުން ފާހަގަކުރެ އެވެ. ގުޅުން އޮތް ނަމަ އެ ގުޅުމެއް ފެންނަނީ ރަސްމީ ހައިސިއްޔަތުން ސްޕޯޓްސް މިނިސްޓްރީއާ އެކަންޏެވެ.

ކުރިން ވާހަކަ ދެއްކި، ކްލަބެގެ އޮފިޝަލް ވިދާޅުވީ މިހާރު އޮތް ނޯމަލައިޒޭޝަން ކޮމިޓީއާ އެކު ފުޓްބޯޅަ ރަނގަޅު ހާލަތަކަށް އަންނަ މަންޒަރު ނުފެންނަ ކަމަށެވެ.

"މި ކޮމިޓީއާ އެކު މިކަން ވާ ތަނެއް ހަމަގައިމު ވެސް އަޅުގަނޑަކަށް ނުފެނޭ،" އޭނާ ވިދާޅުވި އެވެ.

ނަމަވެސް ޒުހޫރު ވިދާޅުވީ ނޯމަލައިޒޭޝަންގެ މަސައްކަތް ރަނގަޅު މިސްރާބަކުން ކުރިއަށްދާ ކަމަށެވެ. އެއްވެސް ލިޔެކިޔުމެއް ވެސް، އޮފީހެއް ވެސް ނެތި ސުމަކުން ފަށައިގެން މިހާރު ހިނގައިގަންނަން ފެށިއްޖެ ކަމަށް އޭނާ ވިދާޅުވި އެވެ.

"އެޑްމިނިސްޓްރޭޓިވް އަދި ގަވަނިން ސެޓަޕް ހެދި، ސްޓްރަކްޗާތައް އެކުލަވާލެވި އެ ކަންކަމަށް މީހުން އެމްޕަވާ ކުރެވި، ދެ އަހަރު ވަންދެން ނުދެވި ހުރި ހުރިހާ މުސާރައެއް [މިވަގުތު އެފްއޭއެމްގައި މަސައްކަތް ކުރާ މުވައްޒަފުންނަށް] ދީ، ކޯޓުތަކުގައި ހުރި މައްސަލަތަކަށް އެޓެންޑްކޮށް، އެ މައްސަލަތަކަށް ފޯސްފުލުކޮށް ދައްކަންޖެހޭ ފައިސާތައް ވެސް މެނޭޖު ކުރެވި، މިހުރިހާ ކަމެއް ވެސް ކުރަމުން މިދަނީ ނޯމަލައިޒް ކުރުމަށް ދެއްތޯ،" ޒުހޫރު ވިދާޅުވި އެވެ.

"އެއާއެކީގައި ދެން ހުރި ކަންތައްތަކީ އިލެކްޝަނަށް މަގުފަހި ކުރުމާއި ފުޓްބޯޅަ ރެސިއުމް ކުރުން [ފެށުން]. ފުޓްބޯޅަ ރެސިއުމް ކުރުމަށް މި ފެބްރުއަރީ މަހު ފަހުކޮޅަށް ނިންމިފައި އެ ވަނީ."

އެކަމަކު، ޒުހޫރުގެ އެ ވާހަކަތަކާ ގުޅިގެން އެފްއޭއެމްގެ ކުރީގެ ސެކްރެޓަރީ ޖެނަރަލް ޝާހް އިސްމާއީލް ވިދާޅުވީ، ނޯމަލައިޒޭޝަން ކޮމިޓީގެ މަސައްކަތްތައް ހުރި މިސްރާބުން އެނގެނީ އިތުރު މުއްދަތުތަކަކަށް އެ މަގާމުތަކުގައި ދެމިތިބެން ބޭނުން ވެގެން އުޅޭ ކަން ކަމަށެވެ.

ނޯމަލައިޒޭޝަން ކޮމީޓީގެ ކޮންމެ މެމްބަރަކަށް މުސާރައިގެ ގޮތުގައި މަހަކު 4،000 ޑޮލަރު ފީފާއިން ދެ އެވެ.

"އެ ވާހަކަތަކަކުން އަޅުގަނޑަށް ވިސްނެނީ ފީފާ ޕެއިޑް ބޭފުޅުންގެ ގޮތުގައި އެ ބޭފުޅުން އެ މަގާމުތަކުގައި [އިތުރު މުއްދަތަކަށް] ތިބެން ބޭނުން ވެގެން އުޅޭ ތަން. އެއް އަހަރު ތެރޭ މަސައްކަތް ނުނިމުނީމާ އަނެއްކާ އިތުރު މުއްދަތަކަށް ނޯމަލައިޒޭޝަން ކޮމިޓީގެ ދައުރު އިތުރު ކުރަން ޖެހޭނެ ގޮތަށް އެ ކޮމިޓީން މަސައްކަތް އެ ކުރަނީ،" ޔޫތު، ސްޕޯޓްސް މިނިސްޓަރަކަށް ޒުހޫރު ހުންނެވި އިރު އެ މިނސްޓްރީގެ ސްޓޭޓް މިނިސްޓަރެއްގެ ގޮތުގައި މަސައްކަތް ކުރެއްވި ޝާހު ވިދާޅުވި އެވެ.

އޭނާ ވިދާޅުވި ގޮތުގައި އަދިވެސް ހާލަތު ފެންނަނީ ކުރިން ވެސް އޮތް ގޮތަށެވެ. އެހެން އިދާރާއެއް ހިންގާ ގޮތަށް ފުޓްބޯޅަ އެސޯސިއޭޝަނެއް ނުހިންގޭނެ ކަމަށާއި އެފްއޭ ހިންގުމުގެ ސިފައެއް ނޯމަލައިޒޭޝަން ކޮމިޓީގެ ކިބައިގައި ނެތް ކަމަށް ޝާހު ވިދާޅުވި އެވެ.

"ފުޓްބޯލް ހިންގުމަކީ ވަކި ޓޭސްޓެއްގައި އޭގެ ނޯހައު އެނގިގެން ކުރެވޭނެ ކަމެއް. ކިތަންމެ ދިގު މުއްދަތެއް ދިނަސް އެ ޓޭސްޓް ނެތް ބަޔަކަށް އެ ކަމެއް ނުކުރެވޭނެ،" އޭނާ ވިދާޅުވި އެވެ.

އެއް ބަޔަކު ބުނާގޮތުގައި ޒުހޫރުގެ ކޮމިޓީން އުނިވާ އަނެއް ކަމަކީ ފީފާގެ އިސްވެރިންނާ ގުޅުން ނެތުވެ.

އެނގިފައިވާ ގޮތުގައި ޒުހޫރާ ގުޅުން އޮތީ ފީފާގެ މެންބަރު އެސޯސިއޭޝަން (އެމްއޭ) ޑިޕާޓްމެންޓްގެ ސީނިއާ އޮފިޝަލަކާ އެވެ. ފީފާގެ އިސްވެރިއަކާ ގުޅުން އޮތް ކަމާ މެދު ޝައްކު ކުރާ މީހުން ގިނަ އެވެ. ދެކުނު ކޮރެއާގައި ބޭއްވި ފުޓްބޯޅައިގެ ބައްދަލުވުމުގެ ހަވާސާގައި ޒުހޫރު ވަނީ ފީފާގެ ރައީސް އިންފަންޓީނޯއާ ބައްދަލު ކުރައްވައި ރާއްޖޭގެ ހާލަތު ވިދާޅުވެ ދެއްވައިފަ އެވެ. ފީފާއިން އެހީތެރިވާނެ ކަމުގެ ޔަގީންކަން އާންމު އުސޫލުން އިންފަންޓީނޯ އެ ފަހަރު ވެސް ދެއްވި އެވެ.

އެކަމަކު މީގެ ކުރިން އެފްއޭއެމްގެ ލީޑަޝިޕާ ހަވާލުވާ ބޭފުޅުން، ފީފާގެ ނައިބު ރައީސުންނާއި ޖެނެރަލް ސެކްރެޓަރީއާ ހާއްސަ ގާތް ގުޅުން ބާއްވަ އެވެ. އެ ގުޅުން އޮތީ ފީފާގެ ބައްދަލުވުމުގެ ހަވާސާއިން ބައްދަލުވާ ގޮތަކަށް ނޫނެވެ. ސީދާ މުއާމަލާތު ކުރެވޭހާ ގާތްގުޅުންތަކެއް އެފްއޭއެމްގެ ކުރީގެ ވެރިންނާ އޮތެވެ.

"އާޒިމު ވިޔަސް، އިލްހާމް ވިޔަސް، ޝަވީދު ވިޔަސް، ޓޮމް ވިޔަސް، ބައްސާމް ވިޔަސް. މި ބޭފުޅުންނާ ފީފާގެ އިސްވެރިންނާ ރަސްމީ ޗެނަލް ތުރޫކޮށް ޑައިރެކްޓްލީ ވާހަކަ ދެއްކެވޭ. އެކަމަކު ޒުހޫރާ ފީފާގެ އިސްވެރިޔަކާ ސީދާ ގޮތުން އެއްވެސް ގުޅުމެއް ނެތް،" އެފްއޭއެމްގައި ކުރިން މަސައްކަތް ކުރެވި ބޭފުޅަކު ވިދާޅުވި އެވެ.

މި ސަރަހައްދުގެ ބައެއް ގައުމުތަކުގެ ފުޓްބޯޅަ އިދާރާތަކުގެ ވެރިންނާއި ފީފާގެ އިސްވެރިންނާ ގުޅުން އޮވެ އެވެ. އެކަމަކު ރާއްޖޭގެ ފުޓްބޯޅަ އިދާރާގެ މިހާރުގެ ޗެއާމަން ޒުހޫރާ އެ ގުޅުން ނެތުމަކީ ވެސް ކަންކަން މަޑުޖެހި، ބޭނުންވާ ހަލުވިމިނުގައި ކުރިއަށް ނުދެވޭ ސަބަބު ކަމަށް ފުޓުބޯޅައިގެ ކަންކަން ކައިރިން ބައްލަވާ އިސްބޭފުޅުން ދެކެވަޑައިގަންނަވަ އެވެ. ޕާކިސްތާނުގެ ފުޓްބޯޅަ ފެޑެރޭޝަން ނޯމަލައިޒް ނުކުރެވި ދިޔަހެން ރާއްޖޭގެ ފުޓްބޯޅަ ހަމަޔަކަށް ނޭޅި އޮންނަން ދިވެހިން ބޭނުމެއް ނުވާނެ އެވެ. އެކަމަކު، އަދި ރާއްޖެ ވެސް މި ދަނީ ޕާކިސްތާން ދިޔަ މަގުން ކަމަށް ބެލުމުގެ ފުރުސަތު އެބައޮތެވެ.