މަސައްކަތްކޮށްފި ނަމަ ރައްޔިތުންނަށް މުއްސަނދިކަން ލިބޭނެ ސިނާއަތަކަށް ހެދޭނީ މަސްވެރިކަން: ރައީސް

ރަނގަޅަށް މަސައްކަތްކޮށްފި ނަމަ ރައްޔިތުންނަށް މުއްސަނދިކަން ލިބޭނެ ސިނާއަތަކަށް ހެދޭނީ މަސްވެރިކަން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދެކުނުގެ އަތޮޅުތަކަށް ކުރައްވާ ދަތުރުފުޅުގެ އެންމެ ފަހު މަންޒިލް، ގއ. ދެއްވަދޫގައި ބޭއްވި ޖަލްސާގައި އެ މަނިކުފާނު ވިދާޅުވީ ރަށް ގިރުމާއި ބަނދަރުގެ މައްސަލައާ ކުނި މެނޭޖުކުރުމުގެ މައްސަލަ ހައްލުކުރަން ސަރުކާރުން ހުރިހާ އެއްބާރުލުމެއް ދޭނެ ކަމަށެވެ.

އެކަން ހައްލުވުމުން ޖުމްލަކޮށް މި ރަށުގެ މަސްވެރިކަމުގެ ސިނާއަތަށް ކުރިއެރުންތައް ލިބިގެންދާނެ ކަމަށް އެ މަނިކުފާނު ވިދާޅުވި އެވެ.

މަސްވެރިންނާ ގުޅިފައިވާ އެންމެ މުހިއްމު އެއް ވައުދު، މަސްކިރުވާތާ 48 ގަޑިއިރު ތެރޭގައި މަސްވެރިންނަށް ފައިސާ ދިނުމުގެ ވައުދު ފުއްދަވަމުން އަންނަ ކަމަށާއި ދެން ހުރި ކަންތައްތައް ވެސް ކުރިއަށް އޮތް ތަނުގައި ހިނގާނެކަން ރައީސް ފާހަގަކުރެއްވި އެވެ.

"ވަރަށް ގިނަ ކަންތައްތައް ފަށައިގަންނަން އެބަ ބޭރުގެ އެހީ ހޯދައިގެންނާއި އަދި ސަރުކާރުގެ ބަޖެޓުގެ ތެރެއިން މަސްވެރި ސިނާއަތް ފުޅާކޮށް މަސްވެރިންނަށް އެ އިންޑަސްޓްރީ ފުޅާކުރަން މަގުފަހިކޮށްދިނުމަށް އަދި އިތުރު ފަރާތްތައް ވެސް މި އިންޑަސްޓްރީއަށް ވަނުމަށް ހިތްވަރު ލިބޭނެ ގޮތަށް ބޭނުންވަނީ މި އިންޑަސްޓްރީ ކުރިއަރުވަން. މަސްވެރިކަމުގެ ސިނާއަތަކީ އަޅުގަނޑުމެންގެ އަތްމަތީގައި އޮތް ސިނާއަތެއް،" ރައީސް ވިދާޅުވި އެވެ.

އެ މަނިކުފާނު ވިދާޅުވީ މަސްވެރިކަމަކީ ބޭރުގެ ގައުމުތަކުގައި ދިމާވާ ނުރައްކާތެރި ކަންކަމާއި ހާދިސާތަކާ ސީދާ ބޮޑަށް ގުޅުމެއް ނެތް އަދި ކުރިއެރުވެން ދިވެހިންގެ އަތްމަތީގައި އޮތް ލޭނާރު ކަމަށެވެ.

"ރަނގަޅަށް މަސައްކަތްކުރެވިއްޖެއްޔާ އެންމެ ބޮޑު އާމްދަނީއެއް ޖީޑީޕީގެ ނިސްބަތުން އެތެރެކުރެވޭނެ، ރައްޔިތުންނަށް މުއްސަނދިކަން ލިބޭނެ ސިނާއަތަކަށް ހެދެން އޮތީ ވެސް މަސްވެރިކަން. އެހެންވީމަ، އެ ވިސްނުމުގައި ސަރުކާރުން މަސްވެރިންނާއެކީގައި މި ދަނީ މަސައްކަތްކުރަމުން. ކުރިއަށް އޮތް ތަނުގައި މި ކަންތައް އެއަށްވުރެ ވެސް ރަނގަޅުވާނެ،" ރައީސް ވިދާޅުވި އެވެ.

އެ ރަސްމިއްޔާތުގައި ކައުންސިލްގެ ނައިބު ރައީސް އަހުމަދު ފަޒްހާދު ވަނީ މި ރަށަށް ހަތަރު ކަމެއް ކޮށްދިނުމަށް އެދިވަޑައިގެންފަ އެވެ.

އޭގެ ތެރޭގައި ބަނދަރުގެ ދަތިކަމާއި މަސްވެރިންނަށް ދިމާވާ ދަތިތައް ހައްލުކުރަން އަދި ރަށްގިރުމުގެ މައްސަލަ ހައްލުކޮށްދިނުމާއި އެއާޕޯޓު އަޅައިދޭން އެދިވަޑައިގަތެވެ.

ރައީސް މުއިއްޒު ވިދާޅުވީ ރިޔާސީ އިންތިހާބުގެ ކެމްޕެއިން ތެރޭގައި މި ރަށުގައި ސިޓީ ހޮޓަލެއް އަޅައިދިނުމަށް ވައުދުވެވަޑައިގެންފައިވާތީ، ފީސިބިލިޓީތައް ބެލުމަށް ފަހު އެކަން ކޮށްދެއްވާނެ ކަމަށެވެ. އަދި އެއާޕޯޓުގެ ނަން ނުގެންނަވައި، ރައީސް ވިދާޅުވީ ކައުންސިލްގެ ހިޔާލު އުފަލާ އެކު ބަލައިގަންނަވާ ކަމަށެވެ.

އެކަމަކު، އެއާޕޯޓު އެޅުމާ ގުޅޭގޮތުން އިތުރު އެއްވެސް ވާހަކަފުޅެއް ނުދައްކަވަ އެވެ.

"އުއްމީދުކުރައްވަންވީ ވީހާ ވެސް ޕޮޒިޓިވްކޮށް. ރައްޔިތުން އެދޭ ގޮތަށް މަސައްކަތްކުރަން އަޅުގަނޑު އަބަދު ވެސް ބޭނުންވަނީ. ރައްޔިތުން ގާތަށް މި އަންނަނީ ވެސް އެ ބޭނުމުގައި. ކައިރިއަށް، ތިޔަ ބޭފުޅުން ގާތަށް އައިސްގެން ތި ބޭފުޅުން ބޭނުންވާ ކަންކަން ވަރަށް ފަސޭހައިން އަޑުއަހަން އަޅުގަނޑު ބޭނުންވޭ. މާ ދުރުގައި، މާލޭގައި ހުރެގެން ސިޓީބިޓީގެ ތެރެއިން، ނިޒާމުގެ ތެރެއިން މި ޕްރޮސެސްގެ ތެރެއިން ފިލްޓާވެގެން އަންނަ ކަންކަމަކީ އެއް ނޫން އަޅުގަނޑު ހަމައެކަނި ބޭނުންވާ ކަންތައްތަކަކީ،" އެ މަނިކުފާނު ވިދާޅުވި އެވެ.

ރައީސް ވަނީ މި ރަށުގެ ތަރައްގީއަށް ކޮށްދެއްވާނެ ބައެއް ކަންތައްތައް ހިއްސާކުރައްވައިފަ އެވެ. އެ ކަންކަމަކީ ރައްޔިތުންގެ އުއްމީދާ ގުޅިފައިވާ ކަމަކަށް ވާތީ، އެކަންތައް ހާސިލްވެއްޖެނަމަ އާއިލާތަކާއި ކުރިއަށް އޮތް ޖީލަށް ފައިދާތައް ކުރާނެ ކަމަށް ވިދާޅުވި އެވެ.

މި އަހަރުގެ ބަޖެޓުގެ ތެރެއިން ސިއްހީ އަދި ތައުލީމީ ދާއިރާއިން ކުރިއަރުވަން މަސައްކަތްކުރުމާއި މި ރަށު ސިއްހީ މަރުކަޒަށް ކުޑަކުދިންގެ ޑޮކްޓަރަކާއި އެކްސްރޭ ނެގުމުގެ ހިދުމަތް ފަށައިދޭނެ ކަމަށް ރައީސް ވިދާޅުވި އެވެ. އޭގެ އިތުރުން މަލްޓިޕާޕަސް ހޯލެއް ހަމަޖައްސައިދިނުމާއި ޒުވާނުން ކުޅިވަރު ކުޅޭނެ ވަސީލަތް ގާއިމްކުރާނެ ކަމަށް ވެސް އެމަނިކުފާނު ވިދާޅުވި އެވެ.

އެސްޓީއޯ ސީއެސްއާރުން އައުޓްޑޯ ޖިމެއް ހަދައި، ހުއްޓިފައި އޮތް އައިސްޕްލާންޓުގެ ހިދުމަތް ވެސް އަލުން ފަށައިދޭނެ ކަމަށް ވެސް ވިދާޅުވި އެވެ. ދެއްވަދޫ އޮންނަ ހިސާބުން ސީ އެމްބިއުލާންސްގެ ހިދުމަތް ލިބުމަށް ދަތިވާތީ، އެކަން ފުޅާކުރާއިރު މި ރަށަށް އެ ހިދުމަތް ހަމަޖެހިގެންދާނެ ކަމަށް ރައީސް މުއިއްޒު ވިދާޅުވި އެވެ.