މިއީ ވިއްސާރާގައި މާލެއަށް އެންމެ ގެއްލުން ބޮޑު ފަހަރު: އެންޑީއެމްއޭ

މާލެއަށް މިދިޔަ ހަފްތާ ބަންދުގައި ކުރި ގަދަ ވިއްސާރާގައި ގެތަކަށް ވެފައިވާ ގެއްލުން 2.2 މިލިއަން ރުފިޔާއަށް އަރާ ކަމަށާއި މިއީ މިހާތަނަށް ވިއްސާރާގައި މާލެއަށް އެންމެ ގެއްލުން ބޮޑު ފަހަރު ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފި އެވެ.

މާލެއަށް ހުއްޓާނުލައި ވެހުނު ބޯ ވާރޭގައި މުޅި މާލޭގައި ފެންބޮޑުވެ، ހިފައިގެންގުޅޭ ސާމާނާއި އުޅަނދުތަކަށް ވެސް ވަރަށް ބޮޑަށް ގެއްލުންވި އެވެ.

ފެން ބޮޑުވުމާ ގުޅިގެން ލިބުނު ގެއްލުންތަކުގެ އެސެސްމަންޓް ހެދުމަށް ފަހު އެންޑީއެމްއޭ އިން ބުނީ މާލެއިން 145 ގެއަކަށް ގެއްލުންވި ކަމަށެވެ. އޭގެ ތެރެއިން 115 ގެއެއްގެ އެސެސްމަންޓް ވަނީ ހަދައިފަ އެވެ. އެކަމަކު 13 ގެއަކުން އެސެސްމަންޓް ހަދަން ބޭނުން ނުވާތީ އެ ގެތަކުގެ އެސެސްމަންޓެއް ނުހަދަ އެވެ.

ވެރިފަރާތަށް ނުގުޅިގެންނާއި ގެއަށް ނުވަދެވިގެން އަދި އިތުރު ސަބަބުތަކާ ހުރެ 17 ތަނެއްގެ އެސެސްމަންޓް ނުހެދެ އެވެ.

ފެންބޮޑުވުމުގެ ހާދިސާގައި ދެ މިލިއަނަށް ވުރެ ބޮޑު ގެއްލުމެއް ލިބުނުއިރު މީގެ ތެރޭގައި ވިޔަފާރިކުރާ ތަންތަނާއި ގުދަން ފަދަ ތަންތަނަށް ލިބުނު ގެއްލުން ނުހިމެނޭ ކަމަށް އެންޑީއެމްއޭ އިން ބުންޏެވެ.

"މިއީ މާލެއަށް ބޯކޮށް ވާރޭ ވެހިގެން މިހާތަނަށް ހިންގުނު އެންމެ ބޮޑު އޮޕަރޭޝަން އަދި އެންމެ ބޮޑު ގެއްލުމެއްވެ، އެންމެ ގިނައިން މީހުން ރައްކާތެރި ތަންތަނަށް ބަދަލުކުރަންޖެހުނު ފަހަރު،" އެންޑީއެމްއޭ އިން ބުންޏެވެ.

އެންޑީއެމްއޭ އިން ބުނީ ފެންބޮޑުވުމުގެ އޮޕަރޭޝަނަށް 61،000ރ. ހަރަދުވި ކަމަށެވެ. ރިލީފްގެ ގޮތުގައި، ހާލުގައި ޖެހުނު ފަރާތްތަކަށް ވަގުތީ ބޯހިޔާވަހިކަމާއި ކެއުން ބުއިމަށް 200،000ރ. ގެ އެހީތެރިކަން ފޯރުކޮށްދިނެވެ.

ރަށްރަށަށް ލިބުނު ގެއްލުން:

- އުދަ އަރައިގެން ރ. އިނގުރައިދޫ އާއި ނ. ނަރުދޫން ރިޕޯޓްކުރި

- ބޯކޮށް ވާރޭވެހި ފެންބޮޑުވެގެން ރިޕޯޓްކުރީ އަށް ރަށަކުން (ފ. ނިލަންދޫ، ދ. ކުޑަހުވަދޫ، ދ. މީދޫ، ފ. މަގޫދޫ، އދ. މާމިގިލި، ކ. ގުރައިދޫ، ފ. ފީއަލި، އަދި ކ. ހިންމަފުށި).

- އޭގެ ތެރެއިން ހަތަރު ރަށެއްގެ 73 ގެއަކަށް ގެއްލުންވެގެން އެސެސްމަންޓް ފޯމު ހުށަހެޅި. އެއީ ދ. މީދޫ އިން 43 ފޯމު، އދ. މާމިގިލިން 3 ފޯމު، ފ. މަގޫދޫ އިން 5 ފޯމު އަދި ފ. ނިލަންދޫ އިން 22 ފޯމު.

- ރަށްރަށުގެ މީހުން އުޅޭ ގެތަކަށް ލިބުނު ގެއްލުން އަށް ލައްކަ ރުފިޔާއަށް އަރާ. އޭގެ ތެރޭގައި ދަނޑުބިންތަކާއި ވިޔަފާރިތަކާއި ގުދަންތަކަށް ލިބުނު ގެއްލުން ނުހިމެނޭ.

މޫސުމާ ބެހޭ ގައުމީ އިދާރާ (މެޓް) ގެ ތަފާސްހިސާބުތަކުން ދައްކާ ގޮތުގައި ޖެނުއަރީ 3 ވަނަ ދުވަހުން ފެށިގެން 4 ވަނަ ދުވަހުގެ ނިޔަލަށް 24 ގަޑިއިރުގެ ތެރޭގައި 161.9 މިލިމީޓަރުގެ ވާރޭ ވެހުނުވެ. އެއީ 24 ގަޑިއިރުގެ ތެރޭގައި މާލެއަށް މިހާ ބޯކޮށް ވާރޭވެހުމުގެ ފުރަތަމަ ފަހަރެވެ. ތިން ވަނަ ދުވަހު މެންދުރު ފަހު 3:00 އިން ފެށިގެން 6:00 އާ ހަމައަށް ތިން ގަޑިއިރުގެ ތެރޭގައި 109.8 މިލިމީޓަރުގެ ވާރޭވެހުނެވެ. އެއީ އެހާ ކުޑަ ވަގުތުކޮޅެއްގެ ތެރޭގައި މިހާ ބޯކޮށް ވާރޭވެހުމުގެ ވެސް ރެކޯޑެކެވެ.