ވިއްސާރާގައި ގެއްލުން ލިބުނު 57 ގެއެއްގެ ޑެމޭޖް އެސެސްމަންޓު ހަދައިފި

މާލެ އާއި ނ. ހެނބަދު އަށް މި މަހު ކުރި ގަދަ ވިއްސާރައިގައި ގެއްލުން ލިބުނު 50 އަށް ވުރެ ގިނަ ގޭގޭގެ ގެއްލުންތަކުގެ އެސެސްމަންޓެއް ހަދައިފި އެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ނެރުނު ބަޔާނުގައި ބުނީ މާލެއަށް މިދިޔަ ހޮނިހިރު ދުވަހު ކުރި ވިއްސާރައިގައި އެހީތެރިކަން ބޭނުންވެގެން އެ އޮތޯރިޓީގެ ހޮޓްލައިނަށް ގިނަ ބަޔަކު ގުޅި ކަމަށެވެ. އޭގެ ތެރެއިން 49 ތަނެއްގައި 304 ވެލި ބަސްތާ ޖަހާފައިވާ ކަމަށް ބުންޏެވެ.

އެ ތަންތަނުގެ ތެރޭގައި ގުދަނާއި ފިހާރަ ފަދަ ތަންތަން ހިމެނެ އެވެ.

އެންޑީއެމްއޭ އިން ބުނީ ވަގުތުން އެހީތެރިކަން ބޭނުންވާ ކަމަށް ފާހަގަކުރެވުނު 12 ގެއެއްގެ ރެޕިޑް އެސެސްމަންޓް، ރެޑްކްރެސެންޓުގެ އެހީތެރިކަމާ އެކު ހަދާފައިވާ ކަމަށެވެ. އޭގެ ތެރެއިން އަށް ގެއެއްގެ 32 މީހުންނަށް އެއް ދުވަހަށް ބޯހިޔާވަހިކަމާއި ކެއުންބުއިން ހަމަޖައްސައިދީފައިވާ ކަމަށް ބުންޏެވެ.

އެ މީހުންނަށް ބޯހިޔާވަހިކަން ހަމަޖެއްސީ ކައްކައި، ކައިބޮއި ހެދުމާއި ނިދައި ފާހަނާ ކުރެވޭނެ ގޮތެއް ނެތުމުންނެވެ. އެކަމަކު، އެ އާއިލާތައް އާންމު ހާލަތަށް ބަދަލުވެފައިވާ ކަމަށް ބުންޏެވެ.

އެ އޮތޯރިޓީން ބުނީ ފެން ބޮޑުވުމުން ގެއްލުން ލިބުނު ކަމަށް ފާހަގަކުރެވުނު މާލޭގެ 30 ގެއެއްގެ އެސެސްމަންޓް، ރެޑް ކްރެސެންޓާ ގުޅިގެން ނިންމާފައިވާ ކަމަށެވެ. އާންމުކޮށް ހުރީ ހިފާ ގެންގުޅޭ ތަކެއްޗަށް ލިބުނު ގެއްލުން ކަމަށް އެ އޮތޯރިޓީން ބުންޏެވެ.

"މަދުމަދުން ސީލިން ފަދަ ތަންތަނަށް ލިބިފައިވާ ގެއްލުން ވެސް ފާހަގަކުރެވޭ. މިހާރު ކުރިއަށް ދަނީ މި ފޯމުތައް ވެރިފައިކޮށް ޕްރޮސެސްކުރުމުގެ މަސައްކަތް،" އެންޑީއެމްއޭގެ ބަޔާނުގައި ވެ އެވެ.

މިދިޔަ ހަފުތާގެ އަންގާރަ ދުވަހު ހެބަނދޫގެ އިތުރުން ނ. ކެނދިކުޅުދޫ އަދި ޅ. ކުރެންދު އަށް ކުރި ގަދަ ވިއްސާރައިގެ މައުލޫމާތު ހިއްސާ ކުރިޔަސް، ފެން ވަދެ ގެއްލުން ލިބިގެން ރިޕޯޓުކޮށްފައި ވަނީ ހެނބަދޫން އެކަންޏެވެ.

އެކަމަކު، އެއްވެސް ގެއަކުން މީހުން ބަދަލުކުރަން ޖެހޭ ފަދަ ހާލަތަކަށް ނުދާ ކަމަށް އެންޑީއެމްއޭ އިން ބުންޏެވެ.

ހެނބަދޫގެ ގޭގެ އަށް ފެން ވަދެ، ލިބުނު ގެއްލުންތައް ބެލުމަށް އެސެސްމަންޓް ހެދުމަށް ފަހު 27 ގެއަކުން މިހާރު ވަނީ އެންޑީއެމްއޭ އަށް ފޯމު ހުށަހަޅައިފަ އެވެ. އެ ތަންތަނުން ވެސް ގިނައިން ހުށަހަޅާފައި ވަނީ ހިފާ ގެންގުޅޭ ތަކެއްޗާއި އިމާރާތަށް ލިބުނު ގެއްލުމެވެ.

އެންޑީއެމްއޭ އިން މިހާރު އަންނަނީ އެ ފޯމުތައް ޕްރޮސެސްކުރުމުގެ މަސައްކަތް ކުރަމުންނެވެ.