އޭޓީއެމްތަކުން ކްރިޕްޓޯކަރަންސީ އެކްސްޗޭންޖު ކުރެވޭ ކަމަށް ބުނެ ފަތުރަނީ ސައްހަ މައުލޫމާތެއް ނޫން: ބީއެމްއެލް

ބޭންކް އޮފް މޯލްޑިވްސް (ބީއެމްއެލް) ގެ ކަސްޓަމަރުންނަށް ހިދުމަތް ދެމުން އަންނަ އެއްވެސް ވަސީލަތެއް މެދުވެރިކޮށް ކްރިޕްޓޯ އެކްސްޗޭންޖް ކުރުމުގެ ހިދުމަތެއް ނުދޭ ކަމަށް އެ ބޭންކުން މިރޭ ބުނެފި އެވެ.

ބީއެލްމް އިން އެހެން ބުނީ، ޓްރޭޑް ކޮށްގެން ހޯދާ ކްރިޕްޓޯ ކަރަންސީ އެ ބޭންކުގެ އޭޓީއެމްތަކުން އެކްސްޗޭންޖު ކުރެވޭ ކަމަށް ދޭހަވާ ގޮތަށް ބުނެ ރައްޔިތުންގެ މަޖިލިހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ އެކްސްގައި ވީޑިއޯއެއް އާންމު ކުރުމުންނެވެ.

އެ ވީޑިއޯއާ ގުޅިގެން ބައެއް ކަސްޓަމަރުން ސުވާލު ކުރަމުން ދާތީ، ނެރުނު ނޫސްބަޔާނެއްގައި ބީއެމްއެލް އިން ބުނީ، ކްރިޕްޓޯ އެކްސްޗޭންޖް ކުރުމުގެ ހިދުމަތަކީ އެ ބޭންކުން ފޯރުކޮށްދޭ ހިދުމަތެއް ނޫން ކަމަށެވެ.

"ބޭންކް އޮފް މޯލްޑިވްސްގެ އޭޓީއެމްތަކުން އެމެރިކަން އެކްސްޕްރެސް، ވިސާ، މާސްޓަކާޑުގެ އިތުރުން އެހެނިހެން އިންޓަނޭޝަނަލް ބްރޭންޑްތަކުގެ ކާޑުން މުއާމަލާތް ހިންގޭނެ އެވެ. މިފަދަ ބައިނަލްއަގުވާމީ ކާޑުތަކުން، ކަނޑައެޅިފައިވާ ލިމިޓްތަކެއްގައި ބީއެމްއެލް އޭޓީއެމް މެދުވެރިކޮށް މުއާމަލާތް ކުރެވުނު ނަމަވެސް މި ދެންނެވި ވީޑއޯގައި ބަޔާންކޮށްފައިވާ ގޮތަށް އެއްވެސް ކާޑެއް ބޭނުންކޮށްގެން އެކައުންޓުން 100،000 ޑޮލަރުގެ އަދަށްވާ ދިވެހި ފައިސާ އެއްފަހަރާ ނުނެގޭނެ އެވެ،" ބޭންކުގެ ބަޔާނުގައި ވެ އެވެ.

ބީއެމްއެލްގެ އޭޓީއެމާއި ލޯގޯ ބޭނުންކޮށްގެން ކަސްޓަމަރުންނަށާއި އާންމުންނަށް އޮޅޭ ގޮތަށް، ކްރިޕްޓޯ އެކްސްޗޭންޖް ކުރުމުގައި އެ ބޭންކުން ޝާމިލުވެ، އެކަމަށް މަގުފަހި ކޮށްދޭ ކަމަށް ދޭހަވާ ގޮތަށް ވީޑިއޯއެއް އާންމު ކޮށްފައި ވާތީ ބޭންކުން ހިތާމަކުރާ ކަމަށް ވެސް ބުންޏެވެ. އަދި އެ އަމަލު ބީއެމްއެލް އިން ކުށްވެރި ކުރި އެވެ.

ކިންގްސް ކެޕިޓަލް ކުންފުނިން އިންވެސްޓްމަންޓް ސްކީމެއް ތައާރަފްކޮށް، ގިނަ ބައެއްގެ އަތުން ފައިސާ އަތުލި މައްސަލާގައި ޓެކުމުގެ 13 ދައުވާއެއް އުފުލާފައިވާ އަލްހާން އާންމުކުރި ވީޑިއޯގައި ދައްކަނީ ކްރިޕްޓޯ ވޮލެޓަކުން ދޭ ވިސާ ކާޑެއް މެދުވެރިކޮށް ބީއެމްއެލްގެ އޭޓީއެމަކުން ފައިސާ ނަގާ ތަނެވެ.

އެ ވީޑިއޯގައި އޭނާ ބުނާ ގޮތުގައި އެ ކާޑު މެދުވެރިކޮށް، ޓްރޭޑް ކޮށްގެން ހޯދާ ފައިސާ ކާޑަށް ނަގައިގެން އެ ބޭނުންކޮށްގެން ބީއެމްއެލްގެ އޭޓީއެމުން ފައިސާ ނެގޭނެ އެވެ. ކާޑުން އެއްފަހަރާ 100،000 ޑޮލަރު ނެގޭނެ ކަމަށް ވެސް ވީޑިއޯގައި އޭނާ ބުނެ އެވެ. އެކަމަކު، އެއީ ދޮގެކެވެ.

ރާއްޖޭގައި ހިންގާ ވިޔަފާރީގެ އެއްވެސް މުއާމަލާތެއްގައި ކްރިޕްޓޯ ކަރަންސީ ބޭނުން ކުރުމަކީ ގާނޫނީ ގޮތުން ތަންދޭ ކަމެއް ނޫން ކަމަށް މަރުކަޒީ ބޭންކް، އެމްއެމްއޭ އިން ވެސް ކުރިން ބުނެފައިވެ އެވެ.

ޑިޖިޓަލް ކަރަންސީއަށް ދުނިޔޭގައި މަގްބޫލުކަން އިތުރުވަމުން ދިޔަ ނަމަވެސް އަދި ވެސް ގިނަ ގައުމުތަކަކުން މިގޮތަށް ވިޔަފާރީގެ މުއާމަލާތްތައް ކުރަން ރަސްމީކޮށް ހުއްދައެއް ނުދެ އެވެ. ޗައިނާ އިން ވަނީ ކްރިޕްޓޯ ކަރެންސީ ބަލައި ނުގަންނަން ނިންމައިފަ އެވެ.

ކްރިޕްޓޯ ކަރަންސީއަކީ އެއްވެސް ބައެއްގެ ކޮންޓްރޯލެއް އޮންނަ ފައިސާއެއް ނޫނެވެ. ނަމަވެސް މިފަދަ ޑިޖިޓަލް ފައިސާއަށް އޮތް ޑިމާންޑް ބޮޑުވެ، އަގުތައް އަންނަނީ އުފުލެމުންނެވެ.