ހަސީނާ ހައްޔަރުކުރަން ބަންގްލާދޭޝްގެ ކޯޓަކުން އަނެއްކާވެސް އަމުރެއް

ބަންގާލްދޭޝްގެ ބޮޑުވަޒީރުކަމުން އިސްތިއުފާ ދެއްވުމަށް ފަހު ފިއްލަވައިގެން އިންޑިއާއަށް ވަޑައިގެން އުޅުއްވާ ޝައިހް ހަސީނާ ހައްޔަރުކުރުމަށް ބަންގްލާދޭޝްގެ ކޯޓަކުން އަނެއްކާވެސް އަމުރެއް ނެރެފި އެވެ.

މިދިޔަ އޮގަސްޓް މަހުގެ ތެރޭގައި ދަރިވަރުން ގެނައި އިންގިލާބަކުން ވެރިކަން ވައްޓާލުމާ އެކު އިންޑިއާއަށް ވަޑައިގަތް އުމުރުން 77 އަހަރުގެ ހަސީނާގެ މައްޗަށް އިންސާނިއްޔަތާ ޚިލާފު ޖަރީމާތަކެއް ހިންގި ކަމުގެ ތުހުމަތުގައި މީގެ ކުރިން ވެސް ވަނީ ހައްޔަރުކުރުމުގެ އަމުރެއް ނެރެފަ އެވެ.

ހަސީނާގެ 15 އަހަރުގެ ވެރިކަމުގައި އިންސާނީ ހައްގުތަކަށް އަރައިގަތުމުގެ ސީރިއަސް އަމަލުތައް ހިންގާފައިވާއިރު، އޭގެ ތެރޭގައި ސިޔާސީ ވާދަވެރިން ގިނަ ބަޔަކު ބަންދުކުރުމާއި، ގާނޫނީ ހަމަތަކުން ބޭރުން މީހުން މެރުން ހިމެނެ އެވެ.

ޑޮމެސްޓިކް އިންޓަނޭޝަނަލް ކްރައިމްސް ޓްރައިބިއުނަލް (އައިސީޓީ)ގެ ޗީފް ޕްރޮސެކިއުޓާ ތާޖުލް އިސްލާމް ވިދާޅުވީ ދެވަނަ އަމުރު ނެރުނީ ހަސީނާގެ ވެރިކަމުގައި ގެއްލުވާލާފައިވާ މީހުންގެ މައްސަލައިގައި ކަމަށެވެ.

ބަންގްލަދޭޝްގެ ސަލާމަތީ ބާރުތަކުން 500 އަށް ވުރެ ގިނަ މީހުން ވަގަށް ނެގި ކަމަށް ތުހުމަތު ކުރެވޭއިރު، ބައެއް މީހުން އެތައް އަހަރެއް ވަންދެން ސިއްރު ފެސިލިޓީތަކުގައި ބަންދުކޮށްގެން ގެންގުޅެފައިވެ އެވެ.

"ޝައިހް ހަސީނާ އާއި އޭނާގެ އަސްކަރީ އެޑްވައިޒަރާއި އަސްކަރިއްޔާގެ ބޭފުޅުންނާއި ގާނޫނު ތަންފީޒުކުރާ އެހެނިހެން އޮފިޝަލުން ހިމެނޭ ގޮތަށް އިތުރު 11 މީހެއްގެ މައްޗަށް ކޯޓުން ވަނީ އަމުރު ނެރެފައި،" ނޫސްވެރިންނާ ވާހަކަ ދައްކަވަމުން އިސްލާމް ވިދާޅުވި އެވެ.

ބަންގްލަދޭޝްއިން ވަނީ ހަސީނާގެ މައްޗަށް ހިންގާ ޝަރީއަތަކަށް ހާޒިރުކުރުމަށް އޭނާ ބަންގްލާދޭޝްއާ ހަވާލުކުރުމަށް މިދިޔަ ޑިސެމްބަރު މަހު އިންޑިއާގައި އެދިފަ އެވެ. އެކަމަކު އިންޑިއާއިން މިކަމުގައި ޖަވާބެއް ނުދެ އެވެ.

އިސްލާމް ވިދާޅުވީ ކޯޓުން ބޭނުންވަނީ މިހާރުވެސް ޝަރީއަތް ކުރިއަށް ގެންދަން ކަމަށެވެ.

"އަޅުގަނޑުމެން ބޭނުންވަނީ ވީހާ ވެސް އަވަހަކަށް ޝަރީއަތް ނިންމަން. އެކަމަކު އޭގެ މާނައަކީ ގާނޫނާ ހިލާފުވުން ނުވަތަ އެކަށީގެންވާ އިޖުރާއާތެއް ނެތި ހުކުމެއް އިއްވުމެއް ނޫން،" ނޫސްވެރިންނާ ވާހަކަ ދައްކަވަމުން އޭނާ ވިދާޅުވި އެވެ.

ހަސީނާ މަގާމުން ދުރުވާން މެދުވެރިވި ހަމަނުޖެހުންތަކުގައި 700 އަށް ވުރެ ގިނަ މީހުން މަރާފައިވާ ކަމަށް ތުހުމަތުކޮށް ސަލާމަތީ ބާރުތަކުގެ އެތައް ބަޔަކު ވެސް ހައްޔަރުކޮށް މައްސަލަ ދަނީ ބަލަމުންނެވެ.