ބަންގްލާދޭޝްގެ އިންތިހާބު އަންނަ އަހަރުގެ ފަހުކޮޅު ނުވަތަ 2026 ގައި

އަންނަ އަހަރުގެ ފަހުކޮޅު ނުވަތަ 2026 އަހަރުގެ ކުރީކޮޅު ބަންގްލާދޭޝްގެ އާންމު އިންތިހާބު ބާއްވަން މަސައްކަތްކުރަމުން އަންނަ ކަމަށް އިންތިގާލީ ލީޑަރު މުހައްމަދު ޔޫނުސް އިއްޔެ ވިދާޅުވެއްޖެ އެވެ.

ކުރީގެ ބޮޑުވަޒީރު ޝެއިޚް ހަސީނާގެ ވެރިކަން ވައްޓާލުމަށް މިދިޔަ އޮގަސްޓް މަހުގެ ތެރޭގައި ދަރިވަރުން އިސްނަގައިގެން ކުރި ބޮޑެތި މުޒާހަރާތަކަށް ފަހު ގައުމުގެ "ޗީފް އެޑްވައިޒަރު" ގެ މަގާމަށް އައްޔަންކުރި ޔޫނުސް އަށް ވަނީ އިންތިހާބުގެ ތާރީހެއް ކަނޑައެޅުމަށް ޕްރެޝަރު ބޮޑުވެފަ އެވެ.

އުމުރުން 84 އަހަރުގެ ޔޫނުސްއަށް، މުޅި ގައުމުގެ ނިޒާމު އަލުން ކޮޅަށް ޖެހުމުގެ ޒިންމާ ހަވާލުވެފައި ވާއިރު އޭނާ ތަކުރާރުކޮށް ވިދާޅުވަމުން ގެންދަވަނީ މިއީ ގޮންޖެހުމެއް ބޮޑު ބުރަ މަސައްކަތެއް ކަމަށެވެ.

"2025 ވަނަ އަހަރު ނިމުމުގެ ކުރިން ނުވަތަ 2026 ވަނަ އަހަރުގެ ފުރަތަމަ ކުއާޓަރުގެ ތެރޭގައި އިންތިހާބުގެ ތާރީހުތައް ކަނޑައެޅިދާނެ،" ދައުލަތުގެ ޓީވީގައި ދެއްވި ބަޔާނެއްގައި ޔޫނުސް ވިދާޅުވި އެވެ.

ބަންގްލަދޭޝްގެ ވެރިރަށް ޑާކާގައި ހުންނަ ބޮޑުވަޒީރުގެ ގަނޑުވަރަށް އެތައް ހާސް ބަޔަކު ވަދެގަންނަން މަސައްކަތް ފެށުމާ އެކު ހަސީނާ، 77، ބޮޑުވަޒީރުކަން ދޫކުރައްވައި ފިއްލަވައިގެން ހެލިކޮޕްޓަރެއްގައި ވަޑައިގެން މިހާރު އުޅުއްވަނީ އިންޑިއާގަ އެވެ.

ހަސީނާގެ ސަރުކާރަށް ކޯޓުތަކާއި ސިވިލް ސާވިސް ސިޔާސީ ކުރުމުގެ އިތުރުން، ޑިމޮކްރެޓިކް ބާރުތައް ނިގުޅައިގަތުމުގެ ގޮތުން ވަކި މީހަކަށް ކާމިޔާބުވާ ގޮތަށް އިންތިޚާބު ބޭއްވުމުގެ ތުހުމަތު ވެސް ކޮށްފައިވެ އެވެ.

ހަސީނާގެ 15 އަހަރުގެ ވެރިކަމުގައި އިންސާނީ ހައްގުތަކަށް އަރައިގަތުމުގެ ސީރިއަސް އަމަލުތައް ހިންގާފައިވާއިރު، އޭގެ ތެރޭގައި ސިޔާސީ ވާދަވެރިން ބަންދުކުރުމާއި، ޝަރުއީ ހުކުމަކާނުލައި މީހުން މެރުން ހިމެނެ އެވެ.