ޓްރަމްޕަށް ސާބިތުވި ކުށަށް ވެރިކަމާ ހަވާލުވުމުގެ ކުރިން އަދަބު ކަނޑައަޅަނީ

އެމެރިކާގެ އިންތިހާބީ ރައީސް ޑޮނަލްޑް ޓްރަމްޕުގެ މައްޗަށް ސާބިތުވެފައިވާ ޖިނާއީ ކުށަށް އަދަބު ކަނޑައެޅުން އޭނާ މި މަހުގެ 20 ވަނަ ދުވަހު މަގާމުގެ ހުވާކުރެއްވުމުގެ 10 ދުވަސް ކުރިއަށް ތާވަލްކޮށްފި އެވެ.

ބަރަހަނާ ފިލްމު ކުޅޭ މީހަކާ އެކު ބޭއްވި ނަހަމަ ގުޅުން ސިއްރުކޮށްދޭން ޝަރުތުކޮށް، ކެމްޕެއިން ފައިސާއިން އެ މީހާއަށް ހަރަދުކޮށް އެކަން ފޮރުވަން ވިޔަފާރީގެ ހިސާބުތައް އޮޅުވާލި މައްސަލައިގައި މީގެ ކުރިން ވަނީ ކުށް ސާބިތުވާ ކަމަށް ޖޫރީން ނިންމައިފަ އެވެ. ޓްރަމްޕުގެ ވަކީލުންގެ ހުށަހެޅުންތައް ބަލައިގަނެވެން ނެތް ކަމަށް ނިންމަވައި ހުކުމް ދަމަހައްޓާފައި ވާއިރު ކުށަށް އަަދަބު ކަނޑައަޅަން، އެ މައްސަލަ ބައްލަވާ ފަނޑިޔާރު ހުއާން މާޗަން ތާވަލްކުރެއްވީ މި މަހުގެ 10 ވަނަ ދުވަހަށެވެ.

ނަމަވެސް ފަނޑިޔާރު މިކަމުގައި ގޮތް ކަނޑައަޅުއްވައި އާންމުކުރެއްވި 18 ސަފުހާގެ ނިންމުމުގައި ވިދާޅުވެފައި ވަނީ ކުށުގެ އަދަބަކަށް ޖަލަށް ލުމުގެ ވިސްނުމެއް ނުގެންގުޅުއްވާ ކަމަށާއި އެހެންވެ ޓްރަމްޕް ކޯޓަށް ވަޑައިގެންނެވިޔަސް ނުވަތަ އޮންލައިންކޮށް ބައިވެރިވެ ވަޑައިގަތް ނަމަވެސް މައްސަލައެއް ނެތް ކަމަށެވެ.

މިނިވަންކަން ހިފެހެއްޓޭ ގޮތަށް ހުކުމެއް ނުކުރައްވާނެ ކަމަށާއި ހުކުމުގައި އިތުރު ޝަރުތުތަކެއް ނުހިމެނޭނެ ކަމަށް ވެސް ފަނޑިޔާރު ހުއާން ވިދާޅުވި އެވެ.

ކިތަންމެ ލުއިކޮށް އަދަބު އައި ނަމަވެސް ޓްރަމް ވާނީ ޖިނާއީ ކުށެެއް ސާބިތުވެ ހުރެ އެމެރިކާގެ ރައީސް ކަމަށް ވަޑައިގަންނަވާ ފުރަތަމަ ލީޑަރަށެވެ.

އުމުރުން 78 އަހަރުގެ ޓްރަމްޕަށް ހަތަރު އަހަރުގެ ޖަލު ހުކުމެއް އިއްވޭ ގޮތަށް ގާނޫނުތައް ހުރި ނަމަވެސް، ނޮވެމްބަރު މަހު ބޭއްވި ރިޔާސީ އިންތިހާބު ކާމިޔާބު ކުރެއްވުމުގެ ކުރިން ވެސް ގާނޫނީ މާހިރުން ލަފާކުރައްވާފައި ވަނީ ޖަލު ހުކުމެއް ނާންނާނެ ކަމަށެވެ.

"ޖަލު ހުކުމެއް ނުކުރަން ނިންމާ ސަބަބު ހާމަކުރުމަކީ މިދަނޑިވަޅުގައި ރަނގަޅު ގޮތް ކަމަށް ދެކެން،" ޖަލު ހުކުމެއް ޓްރަމްޕުގެ މައްޗަށް ތަންފީޒުކުރުމަކީ މިވަގުތު ކުރެވޭ ގޮތަށް އޮތް ކަމެއްގެ ގޮތުގައި ޕްރޮސެކިއުޓަރުން ވެސް ގަބޫލު ނުކުރައްވާކަން ފާހަގަކުރައްވަމުން ފަނޑިޔާރު ވިދާޅުވެފައިވެ އެވެ.

އަދަބު ކަނޑައެޅުން ފަސްކުރުމަށް ޓްރަމްޕުގެ ފަރާތުން އިސްތިއުނާފަށް ހުށަހަޅުއްވާނެ ކަމަށް ބެލެވޭއިރު އޭނާ ވަނީ ފަނޑިޔާރުގެ ނިންމެވުމަށް ފާޑު ވިދާޅުވެފަ އެވެ. ޓްރަމްޕް އޭނާގެ ސޯޝަލް މީޑިއާ ޕްލެޓްފޯމް "ޓްރޫތު" ގައި ލިޔުއްވާފައިވަނީ މިއީ "ޣައިރު ގާނޫނީ ސިޔާސީ ހަމަލާއެއް" ކަމަށެވެ.