ޓްރަމްޕަށް ސާބިތުވި ދައުވާ ބާތިލްކުރުމާ މެދު ގޮތެއް ނިންމަނީ

އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕްގެ މައްޗަށް ސާބިތުވެފައިވާ ޖިނާއީ ކުށަށް އަދަބު ކަނޑައަޅަން ތާވަލްކޮށްފައި ވާއިރު އެ ދައުވާ ބާތިލްކުރުމާ މެދު އަންގާރަ ދުވަހު ގޮތެއް ނިންމާނެ އެވެ.

ޓްރަމްޕްގެ މައްޗަށް ސާބިތުވެފައި ވަނީ ބަރަހަނާ ފިލްމުކުޅޭ އަންހެނަކާ އެކި ބޭއްވި ނަހަމަ ގުޅުން ސިއްރުކުރުމަށް 2016 ވަނަ އަހަރުގެ ރިޔާސީ އިންތިހާބާ ދިމާކޮށް ވިޔަފާރީގެ ރެކޯޑްތައް އޮޅުވާލުމެވެ. ޖޫރީން މިދިޔަ މެއި މަހު ވަނީ މި މައްސަލައިގައި ޓްރަމްޕްގެ މައްޗަށް ހުށަހެޅި ކުށުގެ 34 އަމަލު ވެސް ސާބިތުވާ ކަމަށް ނިންމައިފަ އެވެ.

މި މަހުގެ 26 ވަނަ ދުވަހު ހުކުމް އިއްވަން ހަމަޖައްސާފައި ވާއިރު، ރައީސުންނަށް ލިބިދޭ ހިމާޔަތާއި ރައްކާތެރިކަމާ ބެހޭގޮތުން ސުޕްރީމް ކޯޓުން އެންމެ ފަހުން ނިންމި ނިންމުމަށް ބަލައި، ފަނޑިޔާރު ހުއާން މާޗަން މި ދައުވާ ބާތިލްކުރެއްވުމުގެ ފުރުސަތު އެބަ އޮތެވެ. އެހެން ވެއްޖެ ނަމަ އެކަން ވާނީ ވެރިކަމާ ހަވާލުވެ ވަޑައިގަތުމުގެ ކުރިން ޓްރަމްޕަށް ލިބިވަޑައިގަންނަވާ ގާނޫނީ ވަރަށް ބޮޑު ކާމިޔާބީއަކަށެވެ.

ސުޕްރީމް ކޯޓުން ނިންމާފައިވާ ގޮތުގައި ރައީސަކު މަގާމުގައި ހުންނަވައިގެން ކުރައްވާ ވަރަށް ގިނަ ކަންކަމަކީ ރަސްމީ ހައިސިއްޔަތުގެ ތެރެއިން ކުރައްވާ ކަންކަމެވެ، އެހެންވެ އެ ކަންކަމަށް ބޮޑު އިމްތިޔާޒެއް ލިބިގެންވާ ކަމަށް ވަނީ ނިންމައިފަ އެވެ.

އިންތިހާބާ ދިމާކޮށް ޓްރަމްޕްގެ ވަކީލުން ވަނީ ސުޕްރީމް ކޯޓުގެ ނިންމުމާ ގުޅިގެން އެ މައްސަލަ ބޭރުކޮށްލުމަށް އެދިވަޑައިގެންފަ އެވެ. އެކަމަކު ދައުލަތުގެ ވަކީލުން ވަނީ އެކަމާ ވަރަށް ބޮޑަށް ދެކޮޅު ހައްދަވައިފަ އެވެ.

ސުޕްރީމް ކޯޓުގެ ނިންމުންތަކަށް ބަލައި މައްސަލަ ބޭރުކޮށްލައިފި ނަމަ، އުމުރުން 78 އަހަރުގެ ޓްރަމްޕަށް އަދަބު ކަނޑައެޅުމެއް ނޯންނާނެ އެވެ.

އެހެން ނޫން ނަމަ، ޓްރަމްޕްގެ ގާނޫނީ ޓީމުން މަސައްކަތްކުރާނެ ކަމަށް ބެލެވެނީ އަންނަ އަހަރުގެ ޖެނުއަރީ 20 ވަނަ ދުވަހު ރައީސްކަމާ ހަވާލުވެ ވަޑައިގެން، ކޮމާންޑަ އިން ޗީފްގެ ގޮތުގައި ހުންނަވާނެ ޓްރަމްޕުގެ ޒިންމާތައް އަދާކުރެއްވުމަށް ހުރަސްއެޅޭނެ ކަމަށް ބުނެ އަދަބު ފަސްކުރަން ނުވަތަ އެއްވެސް އަދަބެއް ކަނޑައެޅިޔަ ނުދިނުމަށެވެ.