ޓްރަމްޕަށް ކުރި އިންތިހާބަށް ނުފޫޒު ފޯރުވުމުގެ ދައުވާ އަނބުރާ ގެންދަން ހުއްދަ ދީފި

އެމެރިކާގެ އިންތިހާބީ ރައީސް ޑޮނަލްޑް ޓްރަމްޕްގެ މައްޗަށް އުފުލާފައިވާ އިންތިހާބަށް ނުފޫޒު ފޯރުވުމުގެ ދައުވާއެއް އަނބުރާ ގެންދިއުމުގެ ހުއްދައަށް ޕްރޮސެކިއުޓަރުން އެދުމުން ފަނޑިޔާރަކު އެ ހުއްދަ ދެއްވައިފި އެވެ.

ފަނޑިޔާރު ތާނިޔާ ޗުޓްކަން މިގޮތަށް ހުއްދަ ދެއްވީ، ގާނޫނީ ވަކި ސަބަބަކަށް ބިނާ ނުކޮށް، ގައުމުގެ ރައީސުންނަށް ދައުވާ ނުކުރުމަށް ޖަސްޓިސް ޑިޕާޓްމަންޓުން ގެންގުޅޭ އުސޫލަށް ރިއާޔަތްކުރައްވަ އެވެ.

ޓްރަމަޕަށް ނާކާމިޔާބުވި އިންތިހާބުގެ ނަތީޖާ އަނބުރާލުމަށް އެކި މައްސަލަތައް އުފައްދައި ނުފޫޒު ފޯރުވަން މަސައްކަތްކުރި ކަމަށް ބުނެ އުފުލި ދައުވާ އަކީ އޭނާގެ މައްޗަށް އުފުލާފައި ޖިނާއީ އެތައް ދައުވާއެއްގެ ތެރެއިން އެއް ދައުވާ އެވެ. ރައީސްކަމަށް އަލުން އިންތިހާބުވި އިރު ވެސް ޖިނާއީ ބައެއް ދައުވާތައް ޓްރަމްޕަށް ސާބިތުވެ އެކަމަކު އޮތީ އަދަބު ކަނޑައެޅުމާ ހިސާބުގަ އެވެ.

އިންތިހާބަށް ނުފޫޒު ފޯރުވުމުގެ ދައުވާ އަނބުރާ ގެންދިއުމުގެ ހުއްދަ ދިނުމުގެ މާނަ އަކީ ޓްރަމްޕް ވެރިކަމުގައި ހުންނަވާ ހަތަރު އަހަރު އޭނާގެ މައްޗަށް އެ ދައުވާ ކުރިއަށް ނުގެންދިއުމެވެ. އެކަމަކު ގާނޫނީ ސަބަބެއް ނެތި، ހަމައެކަނި އާންމު އުސޫލަކަށް ބިނާކޮށް މައްސަލަ އަނބުރާ ގެންދިއުމުގެ މާނަ އަކީ ހަތަރު އަހަރު ފަހުން ޓްރަމްޕް ވައިޓް ހައުސް އިން ނުކުމެވަޑައިގަތުމުން އެ މައްސަލަ އަލުން ކުރިއަށް ގެންދެވޭ ގޮތަށް ބޭއްވުމެވެ.

"އެންމެ އެކަށީގެންވާ ގޮތަކީ، އާންމު އުސޫލަށް ބިނާކޮށް މައްސަލަ ބޭރުކޮށްލުން" ކަމަށް ފަނޑިޔާރު ޗުޓްކަން ވިދާޅުވި އެވެ.

"މަގާމުގައި ހުންނެވި ރައީސަކަށް ލިބިދޭ އިމްތިޔާޒަކީ ވަގުތީ ކަމެއް. މަގާމުން ވަކިވުމުން ނެތި ދާ ކަމެއް،" ފަނޑިޔާރު ވިދާޅުވި އެވެ.

އުމުރުން 78 އަހަރުގެ ޓްރަމްޕު، މިހާރުގެ ރައީސް ޖޯ ބައިޑަންއާ ވާދަކޮށް ބަލިވި 2020 ވަނަ އަހަރުގެ އިންތިހާބުގެ ނަތީޖާ ބާތިލްކުރަން ރޭވި ކަމުގެ ތުހުމަތާއި ވެރިކަން ގެއްލުމަށް ފަހު ގިނަ އަދަދެއްގެ ސިއްރު ލިޔުންތައް ނައްތާލި ކަމުގެ ތުހުމަތު ކުރެވުނު ނަމަވެސް އެ މައްސަލަތައް ކޯޓާ ހިސާބަކަށް އަދި ނާދެ އެވެ.

މީގެ އިތުރުން ފްލޮރިޑާގައި ޓްރަމްޕުގެ މައްޗަށް އުފުލާފައިވާ ދައުވާ ބާތިލްކުރި މައްސަލަ އިސްތިއުނާފުކުރުމަށް ފަހު އެ އިސްތިއުނާފް އަނބުރާ ގެންނަން ވެސް އެ މައްސަލަ ގެންގުޅުއްވާ ޕްރޮސިކިއުޓަރު ވަނީ ހޯމަ ދުވަހު ހުށަހަޅުއްވައިފަ އެވެ. ޓްރަމްޕްގެ ވެރިކަމުގައި އޭނާ އައްޔަން ކުރެއްވި ފަނޑިޔާރަކު މި އަހަރުގެ ކުރީކޮޅު އެ މައްސަލަ ބޭރުކޮށްލީ ގާނޫނާ ހިލާފަށް ޕްރޮސިކިއުޓަރު އައްޔަންކޮށްފައިވާ ކަމަށް ބުނެ އެވެ.