ތައިލެންޑުން އައި ދެ ދިވެއްސަކު ދެ ކިލޯގެ ޑްރަގާއެކު އަތުލައިގެންފި

ވައިގެ މަގުން ތައިލޭންޑުން ރާއްޖެ އައި ދެ ދިވެހިން، ދެ ކިލޯގެ ޑްރަގާއެކު ހައްޔަރުކޮށްފި އެވެ.

ކަސްޓަމްސް އިން ބުނީ، ޑްރަގާއެކު ހައްޔަރުކޮށްފައިވަނީ ބުރާސްފަތި ދުވަހު ރާއްޖެ އައި އުމުރުން 41 އަހަރާއި 21 އަހަރުގެ ދިވެހި ދެ ފިރިހެނުން ކަމަށެވެ.

އެ ދެ މީހުންގެ އަމަލުތައް ހުރި ގޮތާމެދު ޝައްކު ވެގެން ފާސްކޮށް ބެލި ބެލުމުން ޑްރަގް ފެނިފައިވަނީ ހަށިގަނޑުގައި ޑްރަގް ރައްކާކޮށްފައި ހުއްޓާ ކަމަށް ކަސްޓަމްސް އިން ބުންޏެވެ.

ކަސްޓަމްސް އިން ބުނީ އެ ތަކެތި ފުރަތަމަ މަރުހަލާގައި ޓެސްޓުކުރިއިރު، 32 ގްރާމް ހެރޮއިނަށް އަދި 2.1 ކިލޯގެ މެފެޑްރޯނަށް ޕޮޒިޓިވްވެފައިވާ ކަމަށެވެ. މި ތަކެތީގެ ޖުމްލަ ބަރުދަން 2.4 ކިލޯއަށް އަރާއިރު، މަގުމަތީ އަގު 5.5 މިލިއަން ރުފިޔާއަށް އަރާކަމަށް ކަސްޓަމްސް އިން ލަފާކުރެ އެވެ.

ކްރިމިނަލް ކޯޓުން ވަނީ މި ދެ މީހުންގެ ބަންދަށް 15 ދުވަސް ޖަހައިފަ އެވެ.

ބަންދު އަމުރުގައިވާ ގޮތުން މި ދެ މީހުންގެ ރާއްޖެ އައިރު އަރައިގެން ހުރި އިސްޓާކީނުގެ ތެރެއިންނާއި ބޮކްސާ ތެރެއިން ޑްރަގް ފެނިފައިވެ އެވެ.

އަތުލައިގަތް ޑްރަގާއި އެތަކެތި އެތެރެކުރި ދެ މީހުން ފުލުހުންނާ ހަވާލުކޮށްފައިވާ ކަމަށް ކަސްޓަމްސް އިން ބުނެ އެވެ.