ގުޅޭ ގޮތަށް ހެދުން އަޅާތާ 37 އަހަރު

ސްޓައިލް ނުވަތަ ފެޝަނަކީ ހަމައެކަނި ޒުވާނުންނަށް ހާއްސަ ކަމެއް ނޫނެވެ. ކޮންމެ އުމުރެއްގެ މީހަކަށް ވެސް އެމީހެއްގެ އަމިއްލަ ސްޓައިލެއް ހުށަހަޅާލެވޭނެ އެވެ. ޖަޕާނުގެ، އުމުރުން ދުވަސްވީ މި ދެމަފިރިންނަކީ މިކަމުގައި ނަމޫނާއެކެވެ.

މި ދެމަފިރިން ކައިވެނި ކޮށްގެން އުޅޭތާ 37 އަހަރު ވެއްޖެ އެވެ. މި ދެމީހުންގެ ލޯބި ކޮންމެ ދުވަހަކު މުޅި ދުނިޔެއަށް ދައްކާލަނީ އެ ދެމަފިރިން ގުޅުވާލައިގެން ހެދުން އަޅާފައި ތިބޭ ގޮތުގެ ފޮޓޯ އިންސްޓަގްރާމަށް ލައިގެންނެވެ. އެކަމަކު ކައިވެނިކުރީންސުރެ މި ދެ މީހުން ހެދުން އަޅަމުން އަންނަނީ އެކަކު އަނެކަކާ ގުޅޭ ގޮތަށެވެ.

"ބޮންޕޮން511" ކިޔާ އިންސްޓަގްރާމް ޕޭޖުގައި ކޮންމެ ދުވަހަކު ވެސް މި ދެމަފިރިން އެ މީހުންގެ ހެދުންތައް ދައްކާލަ އެވެ. ކުލަ ގުޅުވާލައިގެން، ފިރިމީހާ ގަމީހަކާއި ނަލަ ޖެކެޓެއް ލާފައި ހުރެ އެވެ.

އަނބިމީހާ ވެސް ފިރިމީހާ ލައިގެން ހުންނަ ކުލަތަކާ އެއްގޮތް ކުލައެއް ނުވަތަ ޕެޓާނެއްގެ ހެދުމެއް ލައިގެން ހުރެ އެވެ. މި ސްޓައިލިޝް ދެމަފިރިންގެ އިންސްޓަގްރަމް ޕޭޖު ފޮލޯކުރާ 80،000 މީހުންވެ އެބަތިއްބެވެ.

އުމުރުން 60 އިން މަތީގެ މި ދެމަފިރިން މަޝްހޫރު ޑިޒައިނާ ބްރޭންޑުތައް ލައި އުޅެ އެވެ. އޭގެ ތެރޭގައި މަގުބޫލު ބްރޭންޑު ކޮމް ދެ ގާސޮން އަދި ޔުނިކްލޯ ހިމެނެ އެވެ. އެކަމަކު އެމީހުން ބުނިގޮތުގައި އަބަދު ލައި އުޅެނީ ބޮޑެތި ބްރޭންޑުތަކެއް ނޫނެވެ.

މީގެ 20 އަހަރު ކުރިން ކުޑަ ފިހާރައަކުން ގަތް ސްކާޓެއް ލައިގެން ނަގާފައިވާ ފޮޓޯއެއް ވެސް އަންހެން މިހާ ލައިގެން ހުއްޓާ އިންސްޓްރާމްކޮށްފައިވެ އެވެ.

މިދެމަފިރިންގެ ސްޓައިލް ފޮޓޯތަކަށް ގިނަ ބައެއްގެ ތައުރީފު ލިބިފައިވެ އެވެ. އަދި މިހާރު ދުނިޔޭގެ އެކި ބޮޑެތި މަޖައްލާތަކުގައި އެމީހުންގެ ސްޓައިލިޝް ކަމުގެ ވާހަކަ ވަނީ ޝާއިއުކޮށްފަ އެވެ. އަދި މިދެމަފިރިންގެ ނަލަ ސްޓައިލްގެ ސަބަބުން އަމިއްލަ ސްޓައިލަކަށް ނަލަކޮށް ހެދުން އަޅަން އިތުރު ހިތްވަރެއް ލިބިއްޖެކަމަށް ވެސް ގިނަ ބަޔަކު ބުނެފައިވެ އެވެ.