ރިފޯމް ކޮމިޝަނަރަކަށް މީރާގެ ކުރީގެ ޑެޕިއުޓީ ކޮނިޝަނަރު އަސްމާ

ދައުލަތުގެ މާލީ ނިޒާމު ހަރުދަނާ ކުރުމަށް އުފެއްދި އިކޮނޮމިކް ރިފޯމް އޮފީހުގެ ކޮމިޝަނަރަކަށް، މީރާގެ ކުރީގެ ޑެޕިއުޓީ ކޮމިޝަނަރު އަސްމާ ޝަފީއު މިއަދު ހަމަޖައްސައިފި އެވެ.

ފިނޭންސް މިނިސްޓްރީން މި މަހުގެ 4 ވަނަ ދުވަހު ކުރި އިއުލާނުގައި ވަނީ އިކޮނޮމިކް ރިފޯމް ކޮމިޝަނަރުގެ މަގާމަށް ކުރިމަތިލާން ހުޅުވާލައިފަ އެވެ. އެ މުއްދަތު މި މަހުގެ 8 ގައި ހަމަވިއިރު ގިނަ ބޭފުޅުން ކުރިމަތިލެއްވި އެވެ.

އޭގެ ތެރެއިން، ދައުލަތުގެ އެކި ދާއިރާތައް ރިފޯމް ކުރުމާ ބެހޭ މަސައްކަތްތައް ހަލުވިކުރުމަށް ގާއިމްކޮށްފައިވާ އޮފީހަށް ހޮވިވަޑައިގެންފައިވަނީ އަސްމާ ކަމަށް ފިނޭންސްގެ މީޑިއާ އޮފިޝަލަކު ވިދާޅުވި އެވެ.

މީރާގައި 14 އަހަރު މަސައްކަތްކުރެއްވި އަސްމާ ވަނީ އެ ޓެކްސް އިދާރާގެ ޑެޕިއުޓީ ކޮމިޝަނަރުގެ މަގާމު އަދާކުރައްވައިފަ އެވެ. އޭނާގެ ފަސް އަހަރުގެ ދައުރު ހަމަވީ މިދިޔަ އޮކްޓޯބަރު 31 ގަ އެވެ.

ދެ އަހަރު ދުވަހުގެ ކޮންޓްރެކްޓެއްގެ ދަށުން އެ މަގާމުގައި މަސައްކަތް ކުރަން ޖެހޭނީ ފިނޭންސް މިނިސްޓްރީގަ އެވެ.

އެ މަގާމަށް ކުރިމަތިލެވޭނީ އެކައުންޓިން އެންޑް ފައިނޭންސިން ދާއިރާއިން ޑިގްރީ ނުވަތަ އެ އަށް ވުރެ މަތީ ފާސް ހާސިލް ކޮށްފައިވާ މީހަކަށެވެ. ދާއިރާގެ 10 އަހަރުގެ ތަޖުރިބާ ހުންނަންވާނެ ކަމަށް ވެސް އިއުލާންގައި ވެ އެވެ.

އިކޮނޮމިކް ރިފޯމް ކޮމިޝަނަރުގެ މަސްއޫލިއްުޔަތުތަކުގެ ތެރޭގައި ރިފޯމު ސްޓްރެޓެޖީ އެކުލަވައިލުމާއި އިނޮކޮމިކް، އެސްއޯއީ އަދި ފިސްކަލް ރިފޯމުތަކާ ގުޅޭ ރިޕޯޓުތައް އެކުލަވާލައި އެކަމާ ގުޅޭ ފްރޭމްވޯކްތައް އެކުލަވައިލައި ޕްލޭންތައް ރޭވުން ހިމެނެ އެވެ.

ސަރުކާރުގެ ހަރަދުތައް ކުޑަކުރުމަށްޓަކައި މުހިއްމު ފިޔަވަޅުތަކެއް އަޅަން އަންނަ އަހަރުގެ ބަޖެޓުގައި ޕްލޭންތައް ރާވާފައިވެ އެވެ. އޭގެ ތެރޭގައި ސަބްސިޑީ ޓާގެޓު ކުރުމާއި ކުންފުނިތަކުގެ ހަރަދުތައް ކުޑަކުރުމަށް އަޅާ ފިޔަވަޅުތައް ހިމެނެ އެވެ.