ލާޒިއޯ ކޮޅަށް ހަ ގޯލް ޖަހައި އިންޓަ ފެންވަރު ދައްކާލައިފި

އިޓާލިއަން ލީގުގައި މި ސީޒަނުގައި އެންމެ ރަނގަޅު ފޯމެއްގައި އޮތް އެއް ޓީމު ކަމަށްވާ ލާޒިއޯ އަތުން 6-0 އިން މޮޅުވެ ޗެމްޕިއަން އިންޓަ މިލާނުން އެ ޓީމުގެ ފެންވަރު ދައްކާލައިފި އެވެ.

މި މޮޅާ އެކު އިންޓަ އޮތީ 34 ޕޮއިންޓް ހަމަކޮށްގެން ތިން ވަނައިގަ އެވެ. އެކަމަކު އެ ޓީމަށް އިތުރު މެޗެއް އޮތުމުން، އެއް ވަނަ އަށް އަރަން ބޮޑު އެޑްވާންޓޭޖެއް އެބައޮތެވެ. އެއް ވަނައިގައި މިހާރު އޮތީ 37 ޕޮއިންޓާ އެކު އެޓަލާންޓާ އެވެ. ދެ ވަނައިގައި 35 ޕޮއިންޓާ އެކު އޮތީ ނަޕޯލީ އެވެ. ލާޒިއޯ އޮތީ 31 ޕޮއިންޓާ އެކު ފަސް ވަނައިގަ އެވެ.

ލާޒިއޯގެ ސްޓޭޑިއަމުގައި ރޭ ކުޅުނު މި މެޗު ބެލެވިފައި އޮތީ ވަރަށް ވާދަވެރިވާނެ ކުރިމަތިލުމެއް ކަމަށެވެ. މި މެޗުން މޮޅުވެގެން ލާޒިއޯ އަށް އިންޓަގެ މައްޗަށް ތިން ޕޮއިންޓުގެ ލީޑެއް ނެގެން އޮތުމުންނާ ވެސް އެކު އެވެ. އެކަމަކު އިންޓަ އިން މެޗު ކާމިޔާބުކުރީ އެއަށް ވުރެ މާ ފަސޭހަކޮށެވެ.

އިންޓަ އިން ގިނަ ލަނޑުތަކެއް ޖެހި ނަމަވެސް އެ ޓީމަށް ފުރަތަމަ ގޯލާ ހަމަޔަށް ދެވުނީ ފުރަތަމަ ހާފުގެ ފަހުކޮޅެވެ. މި ގޯލު 41 ވަނަ މިނެޓުގައި ޕެނަލްޓީއަކުން ވައްދާލީ ހަކާން ޗަނައޮގްލޫ އެވެ. ދެ ވަނަ ގޯލް ފުރަތަމަ ހާފުގެ ފަހު މިނެޓުގައި ވައްދާލީ ފެޑެރިކޯ ޑިމާކޯ އެވެ. ދެ ވަނަ ހާފުގެ ކުރީކޮޅު ނިކޯލޯ ބަރެއްލާ އާއި ޑެންޒެލް ޑުމްފްރައިސް ކައިރިކައިރީގައި ދެ ގޯލު ޖަހައި އިންޓަގެ ލީޑު ފުޅާކޮށްދިނެވެ. އެ ޓީމުގެ ފަސް ވަނަ ގޯލް 77 ވަނަ މިނެޓުގައި ކާލޯސް އޮގަސްޓޯ ވައްދާލިއިރު ފަހު ގޯލް 90 ވަނަ މިނެޓުގައި ޖެހީ މާކަސް ތުރާމް އެވެ.

އިންޓަގެ ކޯޗު ސިމޯނީ އިންޒާގީ ބުނީ އެ ޓީމުގެ ކުޅުންތެރިން ދައްކަމުން އަންނަ ކުޅުމާއި، ކުރަމުން އަންނަ ބުރަ މަސައްކަތާ މެދު ވަރަށް ބޮޑަށް ހިތްހަމަޖެހޭ ކަމަށެވެ.

އިންޓަ އަށް ދެން އޮތީ އިޓާލިއަން ކަޕުގައި އުދިނޭޒީއާ ދެކޮޅަށް ކުޅޭ މެޗެވެ. އޭގެ ފަހުން ލީގުގައި ކޯމޯ އާއި ކަލިއާރީއާ ދެކޮޅަށް ކުޅުމަށް ފަހު އިޓާލިއަން ސުޕަ ކަޕުގައި ވާދަކުރަން ސައޫދީ އަރަބިއްޔާ އަށް ފުރާނެ އެވެ. އިންޒާގީ ބުނީ ދެން އޮތީ ބުރަ ދުވަސްކޮޅެއް ކަމަށާއި އެކަމަކު ކުޅުންތެރިން މި ކުޅުމާއި މަސައްކަތް ތަކުރާރުކުރާނެ ކަމަށް އުއްމީދުކުރާ ކަމަށެވެ.

މި ސީޒަނުގައި ރަނގަޅު ނަތީޖާތަކެއް ނެރެމުން އަންނަ ލާޒިއޯގެ ކޯޗު މާކޯ ބަރޯނީ މި ނަތީޖާގެ ޒިންމާ އޭނާ ނަގާ ކަމަށާއި، ސަޕޯޓަރުންގެ ކިބައިން މައާފަށް އެދޭ ކަމަށެވެ.

"އަހަރެމެން ފުރަތަމަ 40 މިނެޓު ވަރަށް ރަނގަޅަށް ކުޅުނިން. އޭގެ ފަހުން ހުރިހާ ކަމެއް ގޯހުން ގޯހަށް ދިޔައީ."