އަލިފާނުގައި ގިނަ ލިޔެކިޔުންތަކެއް ގެއްލިއްޖެ، ރިކަވާކުރެވޭތޯ ދަނީ ބަލަމުން: އާޒިމް

ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގި ޓިނު ބިލްޑިންގާއި އެންވަޔަރުމަންޓް މިނިސްޓްރީ ހިންގި ގްރީން ބިލްޑިންގްގައި މިދިޔަ ބުރާސްފަތި ދުވަހު ރޯވި އަލިފާނުގެ ހާދިސާގައި މާލޭ ސިޓީ ކައުންސިލްގެ ވައިޓަލް ރަޖިސްޓްރޭޝަން އޮފީހުގައި ހުރި ގިނަ އަދަދެއްގެ ލިޔެކިޔުންތައް ވެސް ގެއްލިފައިވާ ކަމަށް މާލޭ މޭޔަރު އާދަމް އާޒިމް ވިދާޅުވެއްޖެ އެވެ.

މާލޭގެ ރައްޔިތުންގެ އުފަންދުވަހުގެ ސެޓްފިކެޓް ފަދަ މުހިންމު ލިޔުންތައް ބެލެހެއްޓުމާއި ހިދުމަތްތައް ދެމުން އައީ ރޯވި އިމާރާތުގެ ބައެއްގަ އެވެ. އަލިފާނުގައި، ތިން މިނިސްޓްރީ ހިންގާ އިމާރާތްތައް ވަނީ އަނދައި ހުލިވެފަ އެވެ. އެމްއެންޑީއެފުން ކުރި މަސައްކަތުން، އެ އިމާރާތްތަކުގެ ތެރެއިން ސަލާމަތްކުރެވުނީ ނިސްބަތުން ވަރަށް މަދު ލިއުންތަކެކެވެ.

ވައިޓަލް ރަޖިސްޓްރޭޝަންގައި ރޯވުމުން، ކައުންސިލުން މިދިޔަ ބުރާސްފަތި ދުވަހު ވަނީ އެ ތަނުން ދެމުން އައި ހުރިހާ ހިދުމަތެއް ހުޅުމާލޭ އަމިން އެވެނިއުގެ ފުރަތަމަ ފަންގިފިލާގައި ހުންނަ ސިޓީ ކައުންސިލްގެ އޮފީހަށް ބަދަލު ކޮށްފަ އެވެ.

އެކަމަކު އަލުން މާލޭގައި އެ ހިދުމަތް ފެށުމަށް، ރޯވި އިމާރާތުގައި ހުރި ލިޔެކިޔުންތައް ވަނީ ގަލޮޅު މަދަރުސާގައި ހުރި ހޯލަކަށް ބަދަލުކޮށްފަ އެވެ.

އެ ތަނުގައި ހުންނަވައި އާޒިމް މިއަދު ނޫސްވެރިންނަށް ވިދާޅުވީ ގެއްލުން ލިބުނު ތަކެތީގެ އެސެސްމެންޓް މިހާރު ހަދަމުން އަންނަ ކަމަށާއި ލިބުނު ގެއްލުން އެނގޭނީ އެ އެސެސްމެންޓް ނިމުމުން ކަމަށެވެ.

ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީހަކީ އުފަންދުވަހުގެ ސެޓްފިކެޓާއި މަރުވާ މީހުންގެ ރެކޯޑުތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ވެސް ބަލަހައްޓަމުން އަންނަ ތަނެވެ.

އޭނާ ވިދާޅުވި ގޮތުގައި އަލިފާނުގައި ވަރަށް ގިނަ ލިޔެކިޔުންތައް ވަނީ ގެއްލިފަ އެވެ. ރިކަވާ ކުރެވޭނެ ގޮތްތައް ހޯދައި ބަލަމުން އަންނަ ކަމަށް ވެސް ވިދާޅުވި އެވެ.

"މިވަގުތު ސަލާމަތް ކުރެވެން ހުރި އެއްޗެހި ސަލާމަތްކޮށް، ޑޮކިއުމެންޓްތައް ލިބެން ހުރި ތަނެއް ބަލައި އެކަން ކުރަމުން މި އަންނަނީ. ވަރަށް އަވަހަށް ހިދުމަތް ފަށާނަން،" އާޒިމް ވިދާޅުވި އެވެ.

އާޒިމް ވިދާޅުވީ މިހާރު ހުރީ ކޮން ޑޮކިއުމެންޓެއްތޯ އަދި ނެތީ ކޮން އެއްޗެއްތޯ ބަލައި ތަރުތީބު ކުރުމުގެ މަސައްކަތް ކުރަމުން އަންނަ ކަމަށެވެ.

"ޑޮކިއުމެންޓްސް ތައް ވަރަށް ބޮޑަށް ތަރުތީބު ކުރެވިގެން ނޫނީ މުވައްޒަފުންނަށް ހިދުމަތް ދޭން އުނދަގޫ ވާނެ،" އާޒިމް ވިދާޅުވި އެވެ.

އާޒިމް ވިދާޅުވި ގޮތުގައި މުވައްޒަފުން ތިބޭނެ ތަނެއް ވަރަށް އަވަހަށް ކަނޑައެޅިގެން ދާނެ އެވެ. އެކަމަށް ދައުލަތުގައި ތަކުރާރުކޮށް އެދިފައިވާ ކަމަށާއި ތަނެއް ހަމަޖެހުމާ އެކު 24 ގަޑިއިރު މަސައްކަތް ކޮށްގެން ވެސް ހިދުމަތް ދެވޭ ވަރު ކުރާނެ ކަމަށް ވިދާޅުވި އެވެ.

މި މަސައްކަތަށް މާދަމާ ސަރުކާރުން އިތުރު ސުކޫލެއްގެ ހޯލު ހަމަޖައްސައިދޭނެ ކަން އަންގާފައިވާ ކަމަށާއި އޭރުން ވެސް މަސައްކަތުގެ ސްޕީޑު އަވަސް ވާނެ ކަމަށް އޭނާ ވިދާޅުވި އެވެ.

"ސިޓީ ކައުންސިލަށް ތަންތަން ދިނުމަކީ ދައުލަތުގެ ޒިންމާއެއް. ސިޓީ ކައުންސިލަށް ބޮޑު އިމާރާތެއް ނުލިބި މާލޭގެ ހުރިހާ ރައްޔިތުންނަށް ހިދުމަތް ދިނުމަކީ ދަތި ކަމެއް. އަޅުގަނޑުމެން ތަކުރާރުކޮށް އެކަމަށް އެދެމުން މި ދަނީ،" އާޒިމް ވިދާޅުވި އެވެ.

އާޒިމް ވިދާޅުވީ ސިޓީ ކައުންސިލް ހިންގާނެ އިމާރާތެއް ނެތުމަކީ އަބަދުވެސް ކަންބޮޑުވުމެއް ކަމަށާއި މިހާރު ވެސް ހިންގަމުން އަންނަނީ އަށް ހިދުމަތެއް އަށް ތަނެއްގައި ކަމަށެވެ. އޭގެ ބަދަލުގައި ހިދުމަތް ދިނުމަށް ފެންވަރު ރަނގަޅު އިމާރާތެއް އެޅުމަށް ނިންމާފައިވާ ކަމަށް ވެސް އާޒިމް ވިދާޅުވި އެވެ.