އެޓަލާންޓާ އަތުން މޮޅުވެ ރެއާލް މެޑްރިޑަށް ހަމަނޭވާއެއް

ޗެމްޕިއަންސް ލީގުގައި ރޭ އިޓަލީގެ އެޓަލާންޓާ އަތުން 3-2 އިން ލިބުނު މޮޅަކީ، މުބާރާތުގެ ގަދަ އަށް ޓީމުގެ ތެރޭ ހިމެނި އަނެއް ބުރުން ސީދާ ޖާގައެއް ހޯދުމަށް ލިބޭނެ އެހީއަކަށް ވާނެ ކަމަށް ސްޕެއިނުގެ ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

ރޭގެ މެޗުގެ ކުރިން ރެއާލް ކުޅުނު ދެ މެޗުން، އޭސީ މިލާނާއި ލިވަޕޫލް އަތުން ވަނީ ބަލިވެފަ އެވެ. އެހެންވެ އެންމެ ފަހުގެ ޗެމްޕިއަން އަދި މުބާރާތުގެ އެންމެ ކާމިޔާބު ޓީމަށް އޮތީ ގަދަ އަށް ޓީމުގެ ތެރޭ ހިމެނެން ގޮންޖެހުން ކުރިމަތިވެފަ އެވެ.

ރޭގެ މޮޅާ އެކު އެ ޓީމު ވަނީ ނުވަ ޕޮއިންޓް ހަމަކޮށްފަ އެވެ. މިވަގުތު އެ ޓީމު އޮތީ 18 ވަނައިގަ އެވެ. އަނެއް ބުރުން ސީދާ ޖާގައެއް ލިބޭނީ އެންމެ ގިނަ ޕޮއިންޓް ހޯދާ އަށް ޓީމަށެވެ. އަނެއް 16 ޓީމަށް ޖެހޭނީ ޕްލޭއޮފް ކުޅޭށެވެ. ރެއާލަށް ދެން އޮތީ އަމިއްލަ ދަނޑުގައި އޮސްޓްރިއާގެ ރެޑްބުލް ސަލްޒްބާގާ ދެކޮޅަށް ކުޅޭ މެޗުގައި ރަށުން ބޭރުގައި ފްރާންސްގެ ބްރެސްޓްއާ ދެކޮޅަށް ކުޅޭ މެޗެވެ.

ރޭ ރެއާލް އަތުން ބަލިވި އެޓަލާންޓާ އޮތީ 11 ޕޮއިންޓާ އެކު ރެއާލަށް ވުރެ ކުރީގައި، ނުވަ ވަނައިގަ އެވެ.

އިޓާލިއަން ލީގުގެ އެއް ވަނައިގައި އޮތް އެޓަލާންޓާގެ ދަނޑުގައި ރޭ އެ ޓީމާއި ރެއާލް ކުޅުނު މެޗުގައި ލީޑު ނެގީ ރެއާލުންނެވެ. އެ ގޯލް 10 ވަނަ މިނެޓުގައި ޖެހީ ކީލިއަން އެމްބާޕޭ އެވެ. އެޓަލާންޓާ އިން އެއްވަރުކުރީ ފުރަތަމަ ހާފުގެ އިތުރު ވަގުތު ޕެނަލްޓީއަކުން ޗާލްސް ޑި ކެޓެލާރާ އެވެ.

އެކަމަކު ދެ ވަނަ ހާފުގެ ކުރީކޮޅު، 56 ވަނަ މިނެޓުގައި، ވިނީޝިއަސް ޖޫނިއާ ރެއާލަށް އަލުން ލީޑު ނަގައިދިނެވެ. އަދި އޭގެ ތިން މިނެޓު ފަހުން ޖޫޑް ބެލިންހަމް އެ ޓީމުގެ ލީޑު ފުޅާކޮށްދިނެވެ. އެޓަލާންޓާގެ އަޑެމޯލާ ލުކްމަން މެޗުގެ 65 ވަނަ މިނެޓުގައި އެ ޓީމަށް ތަފާތު ކޮށްދީ ރެއާލް ހާސްކޮށްލި އެވެ. އެޓަލާންޓާގެ މަޓެއޯ ރެޓެގީ އަށް ފަހު ވަގުތު މެޗު އެއްވަރުކުރަން ވެސް ރަނުގެ ފުރުސަތެއް ލިބި ބޭކާރުވި އެވެ.

"އަހަންނަށް ނޭގޭ ރެއާލަށް ގަދަ އަށް ޓީމުގެ ތެރޭގައި ހިމެނިދާނެކަމެއް. އެކަމަކު އެއީ ޓާގެޓަކީ. މި މެޗުން އެކަމަށް އުއްމީދު އާވެއްޖެ،" ރެއާލުގެ ކޯޗު އަންޗެލޮޓީ ބުންޏެވެ.

"މި މެޗުން މޮޅުވީ މޮޅަށް ކުޅެގެން، އަދި ބުރަކޮށް މަސައްކަތްކޮށްގެން. އެހެންވެ މި މޮޅާ އެކު އެ ޓާގެޓަށް ވާސިލްވާން ހިތްވަރު ލިބޭނެ. މި މޮޅާ އެކު ހަމަނޭވާއެއް ވެސް މި ވަނީ ލެވިފައި."

އެޓަލާންޓާގެ ކޯޗު ޖިއަން ޕިއޭރޯ ގަސްޕެރީނީ ވަނީ ބަލިވިޔަސް އޭނާގެ ޓީމުގެ ކުޅުންތެރިން ދެއްކި ކުޅުމާ މެދު ފަހުރުވެރިވާ ކަމަށް ބުނެފަ އެވެ.

"ދެ ޓީމުގެ ކުޅުމަށް ބަލާއިރު އެއްވަރުވި ނަމަ ރަނގަޅުވީސް. މޮޅަށް ކުޅެ ބަލިވީމާ މާޔޫސްވޭ. އެކަމަކު އަނެއްކޮޅުން މިއީ ހިތްވަރެއް ވެސް މެ."