ގޭންގު ލީޑަރެއްގެ ދަރިއަކު ބަލިވީ ސިހުރުން ކަމަށް ބުނެ ހައިޓީގައި 200 މީހުން މަރާލައިފި

ހައިޓީގައި އުޅޭ ނުރައްކާތެރި ގޭންގު ލީޑަރެއްގެ ދަރިއަކު ބަލިވުމުން އެއީ ސިހުރުގެ ސަބަބުން ދިމާވި ކަމެއްގެ ގޮތުގައި ބަލައި، އޭނާގެ އަމުރަށް 200 ވަރަކަށް މީހުން މަރާލައިފި އެވެ.

ހައިޓީގެ ސަރުކާރުން ބުނީ މިދިޔަ ހަފްތާ ބަންދުގައި މި ގަތުލުއާންމު ހިންގީ ސިހުރުހަދާ ކަމަށް މީހުންނަށް އަމާޒުކޮށްގެން ކަމަށެވެ.

ވެރިރަށް ޕޯޓޯ ޕްރިންސްގައި ހިންގި މި ލާއިންސާނީ އަމަލުތަކާ ގުޅޭ ގޮތުން، މަދަނީ ޖަމިއްޔާއެއް ކަމަށްވާ ކޮމިޓީ ފޯ ޕީސް އެންޑް ޑިވެލޮޕްމަންޓް (ސީޕީޑީ) އިން ބުނީ ގޭންގު ލީޑަރުގެ ދަރިއެއް ބަލިވީ ވޫޑޫ ދީނުގެ މީހުންގެ ސިހުރުން ކަމަށް ބުނެ މަރާފައިވަނީ އެ ދީނުގެ މީހުން ކަމަށެވެ.

"އޭނާ ނިންމީ އުމުރުން ދުވަސްވީ މީހުންނާއި ވޫޑޫ ހަދާ މީހުން އަނިޔާވެރިކަމާ އެކު މަރަން. އޭނާ ގަބޫލުކުރާ ގޮތުގައި މި މީހުންނަކީ އޭނާގެ ދަރިއަން ނުބައި ރޫހުތައް ފޮނުވުމުގެ ބާރު ލިބިފައިވާ ބައެއް،" ސީޕީޑީން ބުންޏެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ މިހަމަނުޖެހުންތައް ކުށްވެރިކުރައްވައިފަ އެވެ. އޭނާ ވިދާޅުވީ އުމުރުން ދުވަސްވީ 127 ފިރިހެނުންނާއި އަންހެނުންނާ އެކު 184 މީހުން މަރާފައިވާ ކަމަށެވެ.

ބޮޑުވަޒީރު އެލިކްސް ޑިޑިއޭ ފިލްސް-އައިމޭގެ އޮފީހުން ބުނީ "މި ނުރައްކާތެރި ޖަރީމާއަކީ ސީދާ އިންސާނިއްޔަތަށް ދިން ހަމަލާއެއް" ކަމަށެވެ.

ސީޕީޑީ އާއި އދ. އިން ވެސް ބުނީ މީހުން މަރާފައި ވަނީ ވެރިރަށުގެ ހުޅަނގު އައްސޭރިފަށުގެ އަވަށެއް ކަމަށްވާ ސީޓް ސޮލެއިލްގައި ކަމަށެވެ.

"މީހުން މަރަން ގެންދަނީ ގޭންގު ލީޑަރުގެ ދަށުން މަސައްކަތްކުރާ މީހުން ގޭގެޔަށް ވަދެ މީހުން ހޯދައިގެން، ގޭންގުގެ ބާރުގަދަ ހިސާބުތަކަށް ގެންގޮސްގެން،" ސީޕީޑީ އިން ބުންޏެވެ.

"އިތުބާރުކުރެވޭ ފަރާތްތަކުން ބުނާ ގޮތުގައި ސަތޭކައަށް ވުރެ ގިނަ މީހުން މަރާލައި، އެ މީހުންގެ ހަށިތަކަށް ބޮޑެތި އަނިޔާތައް ދިނުމަށް ފަހު މަގުމަތީގައި އަންދާފައިވެ އެވެ." ސީޕީޑީ ބަޔާނުގައިވެ އެވެ.

އެފްރިކާގެ އަޅުން ހެއިޓީއަށް ތައާރަފްކުރި ވޫޑޫއަކީ އެގައުމުގެ ސަގާފަތުގެ ހާއްސަ ކަމަކަށް ވަނީ ވެފަ އެވެ. ފްރާންސްގެ އިސްތިއުމާރީ ވެރިކަމުގައި އެ ދީން މަނާކޮށްފައި ވަނިކޮށް ރަސްމީކޮށް ދީނެއްގެ ގޮތުގައި ހައިޓީ ސަރުކާރުން 2003 ވަނަ އަހަރު އޮތީ ބަލައިގެންފަ އެވެ.

ބޮޑެތި ހަމަނުޖެހުންތައް ހިނގާ ހައިޓީގައި މިދިޔަ ފެބްރުއަރީ މަހު ހާލަތު ގޯސްވެ ގޭންގު މީހުން ވަނީ ސަރުކާރު ވައްޓާލަން ވެސް މަސައްކަތްކޮށްފަ އެވެ. ގޭންގުތަކުން މިހާރު ޕޯޓޯ ޕްރިންސް ސިޓީގެ 80 ޕަސެންޓް ކޮންޓްރޯލް ކުރެ އެވެ. އެމެރިކާ އާއި އދ.ގެ އެހީތެރިކަމާ އެކު ކެންޔާއިން އިސްނަގައިގެން އެހީތެރިކަން ފޯރުކޮށްދޭ މިޝަނެއް ކުރިއަށް ގެންދިޔަ ނަމަވެސް، ހަމަނުޖެހުންތައް ދަނީ އިތުރުވަމުންނެވެ.