ސަލްމާން ރޮމޭނިއާ އިން ލޯބިވެރިޔަކު ހޯދައިފި

ސަލްމާން ރޮމޭނިއާ އިން ލޯބިވެރިޔަކު ހޯދައިފި ކަމަށް ބޮލީވުޑްގެ ޚަބަރުތައް ގެނެސްދޭ ނޫސްތަކުން ރިޕޯޓްކޮށްފި އެވެ.

ބައެއް ރިޕޯޓްތައް ބުނި ގޮތުގައި، ސަލްމާން މިހާރު ލޯބީގެ ގޮތުން ގުޅިގެން އުޅެނީ ރޮމޭނިއާގެ އެކްޓަރެއް ކަމަށްވާ ޔޫލިއާ ވަންޓާއާ އެވެ. އޭނާ ވަނީ ސަލްމާންގެ ބައެއް ފިލްމުތައް ކަމަށްވާ "ސުލްތާން" އަދި "ރޭސް 3"ގައި ވެސް މަސައްކަތްކޮށްފަ އެވެ.

ސަލްމާން ވަނީ އޭނާ ޝޯއެއް ދިނުމަށް މިދިޔަ ހަފުތާގައި ދުބާއީ އަށް ކުރި ދަތުރުގައި ޔޫލިއާގެ އާއިލާއާ ވެސް ބައްދަލުކޮށްފަ އެވެ. އޭނާ ދިޔައީ ޔޫލިއާގެ ބައްޕަގެ އުފަންދުވަސް ފާހަގަކުރުމަށް ބޭއްވި ރޭގަނޑުގެ ކެއުމަކަށެވެ.

އެ ރޭ ޔޫލިއާގެ މައިންބަފައިންނާ އެކު ސަލްމާން ނަގާފައިވާ ބައެއް ފޮޓޯތައް ވެސް ޔޫލިއާ ވަނީ އޭނާގެ އިންސްޓަގްރާމްގައި ހިއްސާކޮށްފަ އެވެ.

ސަލްމާން އާއި ޔޫލިއާ ލޯބީގެ ގޮތުން ގުޅިގެން އުޅޭ ކަމަށް ބުނެ، އެ އަޑުތައް ފެތުރިފައިވާތާ މިހާރު ދުވަސްކޮޅެއް ވެއްޖެ އެވެ. އެ ދެމީހުން އެކުގައި ވަރަށް ގިނަ އިވެންޓުތަކަށް ވެސް ދެ އެވެ. އެކަމަކު، އެ ދެމީހުންގެ މެދުގައި އޮންނަ ގުޅުމާ ބެހޭ ގޮތުން އަދި މިހާތަނަށް މީޑިއާއަށް އެއްވެސް ވާހަކައެއް ހިއްސާކޮށްފައި ނުވެ އެވެ.

ސަލްމާންގެ އާއިލާއިން ބާއްވާ ހަފުލާތަކަށް ވެސް ޔޫލިއާ ވަރަށް ގިނައިން ދެ އެވެ. އަދި ސަލްމާންގެ އާއިލާގެ މެމްބަރުންނާ ވެސް ވަރަށް ގާތް ގުޅުމެއް އޭނާ ބާއްވަ އެވެ.