ޑޮލަރު މާރުކުރުމަށް ދިން ދެ އިހުތިޔާރުން ވެސް ނުކުންނަނީ އެއް ނަތީޖާއެއް: ރައީސް

ބޭރު ފައިސާއާ ބެހޭ ގާނޫނެއް ހެދުމަށް މިހާރު ރައްޔިތުންގެ މަޖިލީހަށް ހުށަހަޅާފައިވާ ބިލުގައި ވިޔަފާރިތަކުން ބޭންކަށް ޑޮލަރު މާރު ކުރުމަށް ދެ އިހުތިޔާރެއް ދީފައި ވާއިރު އެ ގޮތުން ވެސް ނުކުންނަނީ އެއް ނަތީޖާއެއް ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތައްޔާރުކުރި އެ ބިލަށް އާންމުންގެ ހިޔާލު ހޯދުމަށް ފަހު ބަދަލުތަކާ އެކު ހުށަހެޅި އިރު، ކުރިން ކޮންމެ ޓޫރިސްޓަކަށް 500 ޑޮލަރު މާރުކުރަންޖެހޭ ގޮތަށް އޮތަސް ބައެއް އިސްތިސްނާތަކާ އެކު މިހާރު އޮތީ ކޮންމެ ޓޫރިސްޓަކަށް 500 ޑޮލަރުގެ މަގުން މާރުކުރުން ނުވަތަ އާމްދަނީގެ 20 ޕަސެންޓް މާރުކުރަންޖެހޭ ގޮތަށެވެ.

ކ. އަތޮޅަށް ކުރައްވާ ދަތުރުފުޅުގައި މިއަދު ހުރާގައި ރައީސް ވިދާޅުވީ ކުންފުނިތަކުން މާރުކުރަން ޖެހޭނީ ރިސޯޓުތަކާއި ގެސްޓްހައުސްތަކަށް ލިބޭ އާމްދަނީގެ 20 ޕަސެންޓް ކަމަށާއި އެހެންވެ، ޓޫރިޒަމް ހިދުމަތްދޭ ތަންތަނަށް ދެ އިހުތިޔާރެއް އޮތަސް، އޭގެ ނަތީޖާއަކަށް މާބޮޑު ބަދަލެއް ނާންނާނެ ކަމަށެވެ.

"އެހެންވީމާ ރިސޯޓުތަކުގެ ބޭފުޅުންނާ ކުރެވުނު މަޝްވަރާގެ އަލީގައި 500 ޑޮލަރު މާރުކުރަން ޖެހޭ ގޮތަށް ނުވަތަ ޖުމްލަ އާމްދަނީގެ 20 ޕަސެންޓް މާރުކުރަން ޖެހޭ ގޮތަށް ހަދަނީ. އެއީ ގާނޫނުން މަޖުބޫރު ކުރަނީ،" އެ މަނިކުފާނު ވިދާޅުވި އެވެ.

ރިސޯޓުތަކުގެ އިތުރުން ގެސްޓްހައުސްތަކުން، ކޮންމެ ޓޫރިސްޓަކަށް 25 ޑޮލަރުގެ ރޭޓުން ނުވަތަ މަހެއްގެ ތެރޭގައި ލިބޭ ބޭރު ފައިސާގެ އާމްދަނީގެ 20 ޕަސެންޓު މާރުކުރަން ޖެހޭނެ ކަމަށް ބިލްގައިވެ އެވެ.

ރައީސް ވިދާޅުވީ މި ބިލް މި މަހުގެ 15 ގައި މަޖިލީސް ޗުއްޓީއަށް ދިއުމުގެ ކުރިން ފާސްކުރާނެ އުންމީދުކުރައްވާ ކަމަށެވެ. ފާސް ކުރުމާ އެކު ބިލް ތަސްދީގުކުރައްވާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ މިއީ ބައިގްތިސާދަށް ހެޔޮ ބަދަލުތަކެއް ގެނައުމަށް ގެންނަ ބަދަލުތަކެއް ކަމަށެވެ.

އެމްއެމްއޭ އިން ކުރިން ލަފާކޮށްފައިވާ ގޮތުގައި ޑޮލަރު މާރުކުރުން ލާޒިމްވާ ގޮތަށް ހެދުމުން 750 މިލިއަން ޑޮލަރު (11 ބިލިއަން ރުފިޔާ) އަހަރެއްގެ ތެރޭގައި ލިބޭނެ އެވެ. ގަވައިދަށް އަލަށް ގެނައި ބަދަލުން ވެސް އެވަރުގެ އަދަދެއް އަހަރެއްގެ ތެރޭގައި ރާއްޖޭގެ ބޭންކިން ނިޒާމަށް ވަންނާނެ ކަމަށް އެމްއެމްއޭއިން ލަފާކުރެ އެވެ.