ނަޕޯލީ އަށް އެއް ވަނަ ގެއްލިއްޖެ، އެޓަލާންޓާ ފޯމުގައި

ލާޒިއޯ އަތުން 1-0 އިން ބަލިވެ ނަޕޯލީ އަށް އިޓާލިއަން ލީގުގެ އެއް ވަނަ މަގާމް ގެއްލިއްޖެ އެވެ.

އެއް ވަނައިގައި 34 ޕޮއިންޓް ހޯދައިގެން އޮތީ ހުކުރު ދުވަހުގެރޭ އޭސީ މިލާން އަތުން 2-1 އިން މޮޅުވި އެޓަލާންޓާ އެވެ. ނަޕޯލީ ދެ ވަނައިގައި އޮތީ 32 ޕޮއިންޓާ އެކު އެވެ. ރޭ ފިއޮރެންޓީނާ އަތުން މޮޅުވި ނަމަ ނަޕޯލީ އަށް އެއް ވަނަ މަގާމަށް އެރުނީހެވެ. ތާވަލުގެ ތިން ވަނައިގައި 31 ޕޮއިންޓާ އެކު އޮތީ ހުކުރު ދުވަހުގެރޭ ޕާމާ އަތުން 3-1 އިން މޮޅުވި އިންޓަ މިލާނެވެ. އެ ޓީމަށް އިތުރު މެޗެއް އެބައޮތެވެ.

ނަޕޯލީ ވަނީ މިދިޔަ ހަފުތާގައި އިޓާލިއަން ކަޕުގައި ވެސް ލާޒިއޯ އަތުން ބަލިވެފަ އެވެ. ރޭ ނަޕޯލީގެ ސްޓޭޑިއޯ ޑިއޭގޯ މަރަޑޯނާގައި ކުޅުނު މެޗުން ލާޒިއޯ މޮޅުވީ 79 ވަނަ މިނެޓުގައި ގުސްޓާވް އިސާކްސެން ޖެހި ގޯލުންނެވެ.

ނަޕޯލީގެ ކޯޗު އެންޓޯނިއޯ ކޮންޓޭ ބުނީ މި މެޗުން ބަލިވިޔަސް އޭނާގެ ޓީމު އޮތީ ރަނގަޅު ޓްރެކުގައި ކަމަށެވެ.

"އަހަރެން މިހިރީ ހިތްހަމަނުޖެހިފައެއް ނޫން. ކާމިޔާބީގެ މަގުގައި އަންނާނެ މިފަދަ އަޑިގުޑަންތައް ވެސް. ކުރިއަށް އޮތްތަނުގައި ވެސް އަންނާނެ. އަހަންނަށް ފެނުނީ އެޓޭކިން ގޭމެއް އަހަރެމެން ކުޅުނުތަން. އެއީ ހިތްހަމަޖެހުމެއް. ކުޅުމާ މެދު ހިތްހަމަޖެހޭ ބަލިވިޔަސް،" ކޮންޓޭ ބުންޏެވެ.

ޖިއަންޕިއޭރޯ ގަސްޕެރިނީ ކޯޗުކޮށްދޭ އެޓަލާންޓާ މި ސީޒަނުގައި ނެރެމުން އަންނަ ނަތީޖާތަކާ އެކު އެ ޓީމަކީ ލީގުގެ ފޭވަރިޓެއް ކަމަށް މީޑިއާތަކުން އަންނަނީ ބުނަމުންނެވެ. މިލާން މެޗަކީ އެ ޓީމު ޖެހިޖެހިގެން މޮޅުވި ނުވަ ވަނަ މެޗެވެ. އެ ޓީމަށް ދެން އޮތީ ޗެމްޕިއަންސް ލީގުގައި މާދަމާރޭ ޔޫރަޕުގެ ގަދަބާރު ރެއާލް މެޑްރިޑާ ދެކޮޅަށް ކުޅޭ މެޗެވެ.