ބާސާ އަށް ނޮވެމްބަރު ދިޔައީ ގޯހުން ގޯހަށް، ޑިސެމްބަރު ފެށީ ރަނގަޅަށް

ބާސެލޯނާ އަށް ނޮވެމްބަރު މަސް ދިޔައީ ގޯހުން ގޯހަށް ކަމަށާއި ޑިސެމްބަރު މަސް ރަނގަޅަށް ފެށުން އެއީ ބޮޑު ހިތްހަމަޖެހުމެއް ކަމަށް އެ ޓީމުގެ ކޯޗު ހެންސީ ފްލިކް ބުނެފި އެވެ.

ލަލީގާގައި ކުރިން ކުޅުނު ތިން މެޗުން ވެސް އެ ޓީމަށް މޮޅުވެވިފައެއް ނުވެ އެވެ. އެ ތިން މެޗު ވެސް ކުޅުނީ ނޮވެމްބަރު މަހު އެވެ. އެކަމަކު ޑިސެމްބަރު މަހު އެ ޓީމު ކުޅުނު ފުރަތަމަ މެޗުން ރޭ، ރެއާލް މަޔޯކާއާ ދެކޮޅަށް ކުޅެ 5-1 އިން ކާމިޔާބު ކުރި އެވެ.

ބާސާ މޮޅުވުމުގެ ޓްރެކަށް އެނބުރި އައުމުން ފްލިކް ބުނީ ނޮވެމްބަރު މަސް ނިމިގެން ދިޔަކަން ރަނގަޅު ކަމަށެވެ.

"އަހަރެން ދިޔައީ ހަނދާންކޮށް ދީ އިންޒާރު ދެމުން. އެ ގޯސް ހާލަތު ދިމާވެދާނެކަމަށް. ނޮވެމްބަރު މަސް ދިޔައީ ގޯހުން ގޯހަށް. އަހަރެން އުފާކުރަން މަސް ނިމިގެން ދިޔައީތީ. ޑިސެމްބަރު މި ފެށުނީ،" ފްލިކް ބުންޏެވެ.

މެޗުގައި ބާސާގެ ފުރަތަމަ ލަނޑު ޖެހީ 12 ވަނަ މިނެޓްގައި ފެރާން ޓޯރޭޒް އެވެ. ފުރަތަމަ ހާފު ނިމުމުގެ ކުރިން ވިދާތު މުރިކީ މަޔޯކާ އަށް ނަތީޖާ ހަމަހމަކޮށް ދިނެވެ.

މި މެޗުގައި ރަފީނިއާ ދެ ލަނޑު ޖެހި އެވެ. ދެ ވަނަ ހާފުގައި ބާސާ އަށް އަލުން ލިޑް ނަގައިދިނީ އޭނާގެ ޕެނަލްޓީންނެވެ. އޭނާގެ ދެ ވަނަ ލަނޑަކީ އަނިޔާއިން ރަނގަޅުވެގެން އެނބުރި އައި ލަމީން ޔަމާލްގެ ދިން ހިތްގައިމު ޕާހަކުން ޖެހި ލަނޑެވެ. އަނެއް ދެ ލަނޑު ޖެހީ ފްރެންކީ ޑި ޔޯން އާއި ޕައު ވިކްޓޯ އެވެ.

ފްލިކް ބުނީ ކުރީގެ މެޗުގައި ލަސްޕަލަމްސްއާ ދެކޮޅަށް ވެސް ގިނަ ހަމަލާތެއް ބާސާއިން އުފެއްދި ކަމަށެވެ. އެކަމަކު އެ މެޗުގައި އެ ފުރުސަތުތައް އެ ޓީމަށް ބޭނުމެއް ނުކުރެވުނެވެ.

"މި މެޗުގައި އަހަރެން ހިތްހަމަޖެހޭ. ފަސް ލަނޑު ޖަހައިފި،" އޭނާ ބުންޏެވެ.

ވާދަވެރި ރެއާލް މެޑްރިޑަށް ވުރެ އިތުރަށް ދެ މެޗު ކުޅެ ބާސާ އެއް ވަނައިގައި އޮތީ ހަތަރު ޕޮއިންޓްގެ ލީޑަކާ އެކު އެވެ.