މަނީ ޗޭންޖަރުންގެ 163 ލައިސަންސް ބާތިލްކޮށްފި

އާ މަނީ ޗޭންޖިން ވިޔަފާރިއާ ބެހޭ ގަވާއިދުގެ ދަށުން މުއްދަތު ހަމަވި އިރު 98 ފަރާތަކުން ލައިސެންސަށް އެދިފައިވާތީ، ކުރިން ދީފައި ހުރި 163 ލައިސަންސް ބާތިލްކޮށްފައިވާ ކަމަށް މަރުކަޒީ ބޭންކު، އެމްއެމްއޭ އިން މިއަދު ބުނެފި އެވެ.

އާ ގަވައިދަށް އަމަލު ކުރަން ފެށުމުގެ ކުރިން 212 ފަރާތަކަށް މަނީ ޗޭންޖާ ލައިސަންސް ދީފައިވެ އެވެ. ނަމަވެސް ލައިސަންސަށް އެދުމަށް ދިން ދެ މަސް ތެރޭގައި މިހާރު އެ ހިދުމަތްދޭ ފަރާތްތަކުގެ ތެރެއިން ލައިސަންސަށް އެދި ހުށަހެޅީ 49 ފަރާތުންނެވެ.

ލައިސަންސް ބާތިލް ކުރި ފަރާތްތަކުގެ ތެރޭގައި ހިމެނެނީ 99 ކޮމާޝަލް ވިޔަފާރި އާއި 64 ރިސޯޓެވެ.

މިހާރު ހިންގަމުން އަންނަ މަނީ ޗޭންޖަރުންގެ 35 ކޮމާޝަލް ވިޔަފާރި އާއި 14 ރިސޯޓަކުން ވަނީ ލައިސެންސް އާ ކުރުމަށް އެދިފަ އެވެ.

މިދިޔަ އޮކްޓޫބަރު 1 ގައި އާންމުކުރި "މަނީ ޗޭންޖާ ކަމުގެ ލައިސެންސް ލިބިގެން ބޭރު ފައިސާ ގަނެ ވިއްކާ ފަރާތްތަކުން ކަންކަން ކުރަންވީ ގަވައިދު" ގައިވާ ގޮތުން ދެ ޓިއާއެއްގެ ދަށުން ލައިސަންސް ދޫކުރާނެ އެވެ. ޓިއާ 1 އަކީ ބޭރު ފައިސާ ގަތުމާއި ވިއްކުމުގެ ވިޔަފާރިކުރުމުގެ ލައިސަންސެވެ. ޓިއާ 2 އަކީ ބޭރު ފައިސާ ވިއްކުމުގެ ވިޔަފާރިކުރުމުގެ ލައިސެންސެވެ.

ޓިއަ 1 ގެ ދަށުން އެޕްލިކޭޝަން ފީގެ ގޮތުގައި 20،000ރ. ދައްކަން ޖެހެ އެވެ. ލައިސަންސް އަހަރީ ފީއަކީ 24،000ރ. އެވެ. ދުވާލެއްގެ މައްޗަށް އެއް ކަސްޓަމަރަކަށް ނަގުދު ފައިސާއިން އެންމެ ގިނަވެގެން މުއާމަލާތް ކުރެވޭނީ 50،000ރ. ނުވަތަ އެ އަށް ޖެހޭ ބޭރު ފައިސާގެ އަދަދަކަށް ވާން ޖެހޭނެ ކަމަށް އެ ގަވައިދުގައި ވެ އެވެ.

މި ގަވާއިދުގެ ދަށުން ޓިއަ 2 ގައި ހިމެނެން ޖެހޭނީ ޓޫރިޒަމާ ބެހޭ ގާނޫނުގެ ދަށުން ޓޫރިސްޓުން ރިސޯޓު ހިންގަން ހުއްދަ ނުވަތަ ލައިސަންސް ލިބިފައިވާ ކުންފުނިތަކަށެވެ. ޓިއަ 2 ގެ ދަށުން ލައިސަންސް އެޕްލިކޭޝަން ފީގެ ގޮތުގައި ދައްކަން ޖެހޭނީ 1،300 ޑޮލަރެވެ. ލައިސަންސް އަހަރީ ފީގެ ގޮތުގައި 1،800 ޑޮލަރެވެ.

ޓިއަ 2 ގައި ހިމެނޭ ފަރާތްތަކުން ބޭރު ފައިސާ ވިއްކުމުގެ މުއާމަލާތް ކުރަން ވާނީ ބޭންކެއް މެދުވެރިކޮށް ނުވަތަ ޓިއަ 1 ގައި ހިމެނޭ ފަރާތަކާ އެކު އެވެ. ލައިސަންސް ލިބިފައިވާ ކޮންމެ ފަރާތަކުން ވެސް ސެކިއުރިޓީ ޑިޕޮސިޓްގެ ގޮތުގައި 50،000 ޑޮލަރު ބަހައްޓަން ޖެހެ އެވެ.

ޓިއަ 1 ގެ ދަށުން ލައިސަންސް އަށް އެދުނީ 44 ފަރާތުންނެވެ. ޓިއަ 2 ގެ ދަށުން ލައިސަންސް ހޯދަން އެދުނީ ފަސް ފަރާތަކުންނެވެ.

އެމްއެމްއޭ އިން ބުނީ، ލައިސަންސް ހޯދަން އެދުނު ފަރާތްތަކަށް ލައިސެންސް ދޭނީ، ގަވައިދުގައިވާ ޝަރުތުތައް ފެތޭ ކުންފުނިތަކަށެވެ. އާ ގަވައިދުގެ ދަށުން މަނީ ޗޭންޖިން ވިޔަފާރިތަކުގައި އުޅެވޭނީ ދިވެހިންނަށެވެ. އަދި ކުންފުނިތަކުގެ މާލީ ހިސާބުތައް އެމްއެމްއޭއާ ހިއްސާ ކުރަން ޖެހޭނެ އެވެ.