ތިނަދު އާއި ރަކީދޫގެ ސެޓެލައިޓް ސްކޫލުގައި ކިޔަވާނެ ދަރިވަރަކު ނެތި ހުހަށް!

ވ. އަތޮޅުގެ ދެ ރަށެއްގައި ކިޔަވައިދޭން ފެށި ސެޓެލައިޓް ސްކޫލްތަކުގައި ތިބި ކުދިން މާލޭގެ ސްކޫލްތަކަށް ބަދަލުވުމުން ތިނަދު އާއި ރަކީދޫގެ ސްކޫލްތައް ބަންދުކުރާ ހިސާބަށް ހިނގައްޖެ އެވެ.

އެންމެ ފުރަތަމަ ސެޓެލައިޓް ސްކޫލް ހުޅުވީ 2022 ވަނަ އަހަރު ބ. ފެހެންދު އާއި ވ. ތިނަދޫގަ އެވެ. ތިނަދޫ ސްކޫލުގައި ކިޔަވައިދޭން ފެށީ އެންމެ ކުއްޖަކާއެކު އެވެ. ނަމަވެސް ފަހުން އެ އަދަދު ހަތަރަކަށް އިތުރުވި އެވެ.

ކިޔަވާނެ ކުދިން މަދުވެގެން 2008 ގައި ރަކީދޫ ސްކޫލް ބަންދު ކުރުމަށް ފަހު، އެންމެ ތިން ދަރިވަރުންނަށްޓަކައި އެ ސްކޫލް ސެޓެލައިޓް ނިޒާމުގެ ދަށުން ހުޅުވީ މިދިޔަ އަހަރުގެ އޮގަސްޓް މަހު ފެށި ދިރާސީ އަހަރާ އެކު އެވެ. ރަކީދޫ ސްކޫލްގައި ކިޔަވަން ފެށި ތިން ކުދިންނަކީ ވެސް އެއްބަނޑު އެއްބަފާ ތިން ކުދިންނެވެ.

އެކަމަކު "މިހާރު" އަށް އެނގިފައިވާ ގޮތުގައި ރަކީދޫގައި ކިޔެވި ތިން ކުދިން މިހާރު ވަނީ ހުޅުމާލެ ސްކޫލަކަށް ބަދަލު ވެފަ އެވެ. ތިނަދޫ ސްކޫލްގައި ވެސް ވެސް އެންމެ ފަހުން ހުރި ކުއްޖާ މިހާރު އެހެން ސްކޫލަށް ބަދަލުވާން ވަނީ އެދިފަ އެވެ. އެހެންވެ އެ ދެ ސްކޫލްގައި ވެސް ކިޔަވާނެ ކުއްޖަކު މިހާރު ނެތެވެ.

ތައުލީމީ ދާއިރާގެ ބޭފުޅުން ވިދާޅުވާ ގޮތުގައި އެއް ކުއްޖަކު ނުވަތަ ދެ ކުއްޖަކު އެކަނި ސްކޫލަކަށް ގޮސް އޮންލައިންކޮށް ކިޔެވުމަކީ ސްކޫލުން ލިބެން ޖެހޭ ތައުލީމު ފުރިހަމަވާނެ ކަމެއް ނޫނެވެ.

"އެ ކުދިން ސްކޫލަށް ދާ ގޮތަށް މި ތިބެނީ ކަންފަތުގައި ހެޑްފޯނެއް އަޅައިގެން. ކުދިންނާ ވާހަކަ ދެއްކުން، އެއް ކުއްޖަކު އަނެއް ކުއްޖަކާ މި އޮންނަ ގުޅުން، ސޯޝަލް ވުން، އެބައި އެއްވެސް ވަރަކަށް އެ ސްކޫލުތަކުގައި ނޯވޭ. އެ ކުއްޖަކާ އެ ކުއްޖެއް،" ދާއިރާގެ ބޭފުޅަކު ވިދާޅުވި އެވެ.

ސެޓެލައިޓް ސްކޫލްގައި ކިޔަވައިދޭނީ ވީޑިއޯ މެދުވެރިކޮށެވެ. ނަމަވެސް ކޮންމެ ކްލާސް ރޫމެއްގައި ވެސް ޓީޗަރުން ހާޒިރުވެ ތިބޭނެ އެވެ. ސެޓެލައިޓް ސްކޫލްތަކުގެ މައި ހަބެއްގެ ގޮތުގައި ބޭނުންކުރަމުން އައީ ހުޅުމާލޭގައި ހުންނަ ހުރަވީ ސްކޫލެވެ. އޮންލައިންކޮށް ކިޔަވައިދޭނީ ވެސް އެ ސްކޫލުގެ ޓީޗަރުންނެވެ. ސެޓެލައިޓް ސްކޫލްގެ ކުދިން ބޭނުންވާ ކޮމްޕިއުޓަރު އަދި އިންޓަނެޓުގެ ހިދުމަތް ހަމަޖައްސާނީ ސަރުކާރުންނެވެ.

ފެހެންދު އާއި ތިނަދޫ ސްކޫލް ސެޓެލައިޓްކޮށް ކިޔަވައި ދިނުމަށް ބަދަލުކުރުމުގެ ގޮތުން މަރާމާތަށް އެކަނި 3،626،948ރ. ހަރަދުވި އެވެ. ރަކީދޫގައި ސެޓެލައިޓް ނިޒާމަށް ކިޔަވައިދޭން ސްކޫލަށް ކުރި ހަރަދު 3.5 މިލިއަން ރުފިޔާ އަރަ އެވެ.