އެންސްޕާ އަށް ކުރާ ތުހުމަތު: ކުއްލި މައްސަލައިގެ "ހަގީގަތެއް ނެތް" ކަމަށް ބުނެ ބޭރުކޮށްލައިފި

"އެމްއެމް ޓީވީ" ގެ ނަމުގައި މިދިޔަ ހަފުތާގައި އިފުތިތާހުކުރި ޗެނަލް ހިންގާ ކުންފުނިން ކުއްޔަށް ދޫކުރާ ފްލޯތަކެއްގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގަން އެވޯޑްކުރި މައްސަލާގައި ރައްޔިތުންގެ މަޖިލިހަށް އިދިކޮޅުން ހުށަހެޅި ކުއްލި މައްސަލަ އެޖެންޑާގައި ނުހިމަނަން ނިންމައިފި އެވެ.

އެންސްޕާ އާ ގުޅޭ މައްސަލަ މަޖިލީހަށް ހުށަހެޅުއްވީ އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.

މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާލުވީ މީކާއިލް ކުއްލި މައްސަލައެއް ހުށަހެޅުއްވި ނަމަވެސް މަޖިލީހުގެ ގަވާއިދުގެ 197 ވަނަ މާއްދާގައި ބަޔާން ކުރާ ޝަރުތުތައް އެ މައްސަލާގައި ފުރިހަމަ ނުވާ ކަމަށެވެ.

އެ މާއްދާގައި ބުނެފައި ވަނީ އެ ކުއްލި މައްސަލައަކީ ހަގީގަތެއްގެ މައްޗަށް ބިނާކޮށް ހުށަހެޅޭ މައްސަލައަކަށް ވާން ޖެހޭ ކަމަށެވެ.

އެ ޝަރުތު ފުރިހަމަ ނުވާ ކަމަށް ވިދާޅުވެ އަބްދުއްރަހީމް ވަނީ އެ މައްސަލަ ހުށަނޭޅޭނެ ކަމަށް ވިދާޅުވެފަ އެވެ.

މީކާއިލްގެ މައްސަލާގައި ވިދާޅުވެފައި ވަނީ އެންސްޕާ އޮފީސް ހިންގުމަށްޓަކައި އޮފީސް އިމާރާތެއް ކުއްޔަށް ނެގުމަށް ޖޫން 25، 2024 ގައި ނޭޝަނަލް ޓެންޑާ ބޯޑް މެދުވެރިކޮށް ކޮށްފައިވާ އިއުލާނަކާ ގުޅިގެން ބިޑު ހުށަހެޅި ފަރާތްތަކުގެ ތެރެއިން މޯލްޑިވްސް މީޑިއާ ހައުސް ޕްރައިވެޓް ލިމިޓެޑަށް ބިޑް އެވޯޑް ކޮށްފައިވާ ކަމަށެވެ.

އެ އިމާރާތުގެ ހަތަރު ފްލޯއެއް ފަސް އަހަރު ދުވަހުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށް ފަހު، އޭގެ ތެރެއިން ދެ ފްލޯ އެމްއެމްޓީވީ ހިންގުމަށްޓަކައި ކުއްޔަކާ ނުލައި ދީފައިވާ ކަމަށް ސޯޝަލް މީޑިއާގައި ތުހުމަތުތަކެއް ކުރަމުންދާ ކަަމަށް މީކާއިލް ވިދާޅުވެފައިވެ އެވެ.

މޯލްޑިވްސް މިޑިއާ ހައުސް ޕްރައިވެޓް ލިމިޓަޑަކީ މީޑިއާގެ މަސައްކަތް ކުރުމަށް އުފައްދާފައިވާ ކުންފުންޏެއް ކަން އެ ކުންފުނީގެ ނަމުން ވެސް އެކަން ދޭހަވާއިރު އެންސްޕާ އަށް އޮފީހެއް ކުއްޔަށް ނެގުމާ ގުޅޭ ބިޑު މީޑިއާ ކުންފުންޏަކާ ހަވާލު ކުރުމުން ވެސް އެ މުއާމަލާތާ މެދު ޝައްކު ކުރެވޭ ކަމަށް މީކާއިލް ވިދާޅުވި އެވެ.

"...އޭގައި ހަގީގަތެއް އެކުލެވިގެންވާ ނަމަ އޭގެ މާނައަކީ އެންސްޕާ އޮފީސް ހިންގުމަށްޓަކައި ދައުލަތުގެ ބަޖެޓުން ހޭދަ ކުރާ ފައިސާގެ ބައެއް އެމްއެމްޓީވީ ހިންގުމަށްޓަކައި ހޭދަވަމުންދާ ކަން،" ކުއްލި މައްސަލާގައި ވިދާޅުވެފައިވެ އެވެ.

އެންސްޕާ ހިންގަން ނެޝަނަލް ޓެންޑަ ބޯޑުގެ އުސޫލުތަކުގެ ތެރެއިން އިއުލާން ކޮށްގެން ތިން ފްލޯ ނަގާފައި ވަނީ ކުރީގެ މިނިސްޓަރު އަހުމަދު ތަސްމީން އަލީގެ އާއިލީގެ މއ. ސީރާޒީ ގެއިންނެވެ. ނަމަވެސް އެނގިފައިވާ ގޮތުގައި އެއީ އެމްއެމްޓީވީ ހިންގާ މޯލްޑިވްސް މީޑިއާ ހައުސް އިން ދިގު މުއްދަތަކަށް ނަގާފައިވާ ފްލޯތަކުގެ ތެރެއިން ތިން ފްލޯ އެވެ. އެނގިފައިވާ ގޮތުގައި އެމްއެމްޓީވީ ހިންގަނީ އޭގެ ތެރެއިން އެއް ފްލޯގަ އެވެ. ބާކީ ފްލޯތައް ވަނީ އެ ކުންފުނިން އެކި ފަރާތްތަކަށް ކުއްޔަށް ދޫކޮށްފަ އެވެ.

"އެމްއެމް ޓީވީ" ޗެނަލް ހިންގާ ކުންފުނިން ކުއްޔަށް ދޫކުރާ ފްލޯތަކެއްގައި އެންސްޕާ ހިންގަން އެވޯޑް ކުރުމުގެ ފަހަތުގައި ކޮރަޕްޝަން ހިމެނޭ ކަމަށް ބުނެ ދައްކާ ވާހަކައިގެ ހަގީގަތް ސާފުކޮށްދިނުމަށްޓަކައި މިނިވަން ތަހުގީގަކަށް އެ އެޖެންސީން ވަނީ މިދިޔަ ހުކުރު ދުވަހު އޭސީސީގައި އެދިފަ އެވެ.

އެންސްޕާ އިން އޭސީސީގެ ރައީސް އާދަމް ޝާމިލަށް ފޮނުވި ސިޓީއެއްގައި ވަނީ އެ ކަމާ ގުޅޭ ފުރިހަމަ ތަހުގީގެއް ކުރުމަށް ފަހު، އެ ރިޕޯޓް ވީ އެންމެ އަވަހަކަށް އެ އެޖެންސީއާ ހިއްސާ ކުރުމަށް އެދޭ ކަމަށެވެ.

މީކާއިލްގެ މައްސަލާގައި ވަނީ އެމްއެމްޓީވީގައި މަސައްކަތް ކުރުމަށް ވަޒީފާ ދީފައިވާ ނޫސްވެރިންނާއި ޕްރެޒެންޓަރުންގެ ތެރޭގައި ދައުލަތުގެ އެކިއެކި އިދާރާތަކުގައި މަސައްކަތް ކުރަމުންދާ މުވައްޒަފުން ހިމެނޭ ކަމަށާއި އެ މުވައްޒަފުންނަށް އެމްއެމްޓީވީގައި އަދާކުރާ ވަޒީފާ އަށް ދޭން ޖެހޭ އުޖޫރަ ދެމުން ގެންދަނީ ދައުލަތުގެ އިދާރާތަކުގެ ބަޖެޓުން ކަމަށް ތުހުމަތު ކުރާ ކަމަށެވެ.