ތިނަދޫއަށް ސިޓީއެއްގެ ދަރަޖަ ދިނުމުގެ މައްސަލަ މަޖިލީހަށް ހުށަހަޅައިފި

ގދ. ތިނަދޫއަށް ސިޓީއެއްގެ ދަރަޖަ ދިނުމުގައި ބޮޑު އޮޅުވާލުންތަކެއް ހުރި ކަމަށް ތުހުމަތުކޮށް، އެ މައްސަލަ ބަލަން ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

އެ މައްސަލަ މަޖިލީހަށް ހުށަހެޅުއްވީ ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީ އެވެ.

ސައުދުﷲ މަޖިލީހަށް ހުށަހެޅުއްވި ސިޓީގައި ވިދާޅުވީ ތިނަދޫ ސިޓީއަކަށް ބަދަލުކުރުމުގައި އެތައް ބަޔަކު ކަންބޮޑުވާ އަދި ގާނޫނާ ހިލާފު އެތައް ކަމެއް ހިނގާފައިވާތީ އަދި އެކަމުގެ ސަބަބުން ކުރިއަށް އޮތް ތަނުގައި ވެސް އެފަދަ ކަންކަން ހިނގާފާނެ ކަމެއް ބެލެވޭތީ، މަޖިލީހުން އެ މައްސަލަ ބަލައިދިނުމަށް އެދޭ ކަމަށެވެ.

ތިނަދޫގެ އާބާދީގައި 10،000 ހަމަނުވާތީ އެ ރަށުގެ ސިޓީގެ ދަރަޖަ ބާތިލުކުރަން ހައި ކޯޓަށް ދުސްތޫރީ މައްސަލައެއް ވެސް މިދިޔަ ހަފުތާގައި ވަނީ ހުށަހަޅައިފަ އެވެ.

ތިނަދޫއަށް ސިޓީއެއްގެ ދަރަޖަ ދީފައި ވަނީ ކުރީގެ ރައީސް އިބްރާހިމް މުހައްމަދު ސޯލިހް މިދިޔަ އަހަރުގެ ރިޔާސީ އިންތިހާބުގެ ކެމްޕެއިންގެ ތެރޭގަ އެވެ. އޭރުގެ ތަފާސްހިސާބުތައް ދައްކާ ގޮތުން ތިނަދޫގެ އާބާދީއަކީ ގާތްގަނޑަކަށް 8،000 އެެވެ. އޭގެ ތެރެއިން ރަށުގައި ދިރިއުޅެނީ 5،000 އެއްހާ މީހުން ކަމަށް ބެލެވެ އެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން ސިޓީއެއްގެ ދަރަޖަ ދެވޭނީ އާބާދީގައި 10،000 ހަމަވުމުންނެވެ. އެ ޝަރުތު ތިނަދޫގައި ހަމަނުވާ ކަމަށް ބުނެ ސިޓީގެ ދަރަޖަ ބާތިލުކުރަން ކޯޓަށް ހުށަހެޅުއްވީ އެންވަޔަރަމަންޓް މިނިސްޓްރީގެ ޑެޕިއުޓީ މިނިސްޓަރަކަށް ހުންނެވި މުހައްމަދު ރާގިބެވެ.

ރަގީބު އެ މައްސަލަ ކޯޓަށް ހުށަހެޅުއްވުމުން ސަރުކާރުން ވަނީ އޭނާ އެ މަގާމުން ވަކިކޮށްފަ އެވެ.

ރައީސް އޮފީހާ ދެކޮޅަށް ރާގިބު ހުށަހެޅުއްވި މައްސަލައާ ގުޅޭ ގޮތުން އޭނާ "މިހާރު"އަށް ކުރިން ވިދާޅުވީ އާބާދީގައި 10،000 ހަމަވާ ކަމަށް ބުނެ ތިނަދޫ ކައުންސިލުން ގެންގުޅެފައި ވަނީ އޮޅުވާލާފައިވާ ލިސްޓެއް ކަމަށާއި އެ ލިސްޓް ދިރާސާކުރުމުން ބޮޑެތި މައްސަލަތަކެއް ފާހަގަވި ކަމަށެވެ.

ރާގިބު ވިދާޅުވި ގޮތުގައި ތިނަދޫގައި މިހާރު އޮތް އާބާދީގެ އަދަދު ހޯދަން މައުލޫމާތު ހޯދައި ލިބިގަތުމުގެ ގާނޫނުގެ ދަށުން ޑީއެންއާރްއަށް ހުށަހެޅުމުން އެ ތަނުން ދޫކުރި މައުލޫމާތުން އެނގޭ ގޮތުގައި ވެސް ތިނަދޫގެ އާބާދީއަކީ 7،000 އެވެ.

އެހެންކަމުން، ގާނޫނުގައިވާ މިންގަނޑަށް ނުފެތެނީސް ތިނަދޫއަށް ސިޓީގެ ދަރަޖަ ދީފައިވަނީ ކައުންސިލުން އޮޅުވާލި ލިސްޓަށް ބަލައިގެން ކަމަށް ރާގިބު ވިދާޅުވެފައިވެ އެވެ. އަދި އެއީ ދައުލަތުގެ ލިޔުމެއް ގަސްދުގައި އޮޅުވާލައި، ދޮގު މައުލޫމާތު ދިނުން ކަމަށްވާތީ ކައުންސިލާއި ކުރީގެ ރައީސް އިބްރާހިމް މުހައްމަދު ސޯލިހް މައްސަލަ ބަލަން އެދިފައިވާނެ ކަމަށް ރާގިބު ވިދާޅުވި އެވެ.

ތިނަދޫއަށް ދީފައިވާ ސިޓީގެ ދަރަޖަ ބާތިލުކޮށްދޭން ވެސް މައްސަލައިގައި އޭނާ ވަނީ އެދިފަ އެވެ.