އެއް ބިލިއަން ރުފިޔާ ޑްރަގްގެ މައްސަލާގައި ހައްޔަރުކުރި މީހުން 30 ދުވަހަށް ބަންދު

ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ އުޅުނު ސްރީލަންކާގެ ބޯޓަކުން އެއް ބިލިއަން ރުފިޔާގެ މަސްތުވާތަކެތި ފެނުނު މައްސަލާގައި އެ ބޯޓުގައި ތިބި ފަސް މީހުން 30 ދުވަހަށް ބަންދުކޮށްފި އެވެ.

އެމްއެންޑީއެފުން އެ ބޯޓު ހިފެހެއްޓީ މިދިޔަ އާދިއްތަ ދުވަހުގެ ރޭ ދަންވަރު ހދ. މަކުނުދޫގެ ބޭރުންނެވެ.

ކޯސްޓްގާޑާއި ފުލުހުންގެ ބެލުމުގެ ދަށުން އެ ބޯޓް ހދ. ކުޅުދުއްފުށި ބަނދަރަށް ގެންގޮސް، ބަލައި ފާސް ކުރުމުގެ ތެރެއިން ޖުމްލަ 468.6 ކިލޯގެ ޑްރަގް ފެނުނެވެ. މިއީ ފަހުގެ ތާރީހެއްގައި ރާއްޖެ ސަރަހައްދުން އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެކެވެ.

އެ ބޯޓުގައި ސްރީލަންކާއަށް ނިސްބަތްވާ ފަސް ފިރިހެނުން ތިބިއިރު، އޭގެ ތެރޭގައި ތިބީ 21 އަހަރުގެ ފިރިހެނަކާއި 22 އަހަރުގެ ދެ ފިރިހެނުންގެ އިތުރުން 37 އަހަރުގެ ފިރިހެނަކާއި 56 އަހަރުގެ ފިރިހެނެކެވެ.

ފުލުހުން ބުނީ އެ ފަސް މީހުން ކަސްޓޯޑިއަލް ޖަލެއްގައި 30 ދުވަހަށް ބަންދުކުރުމަށް ކުޅުދުއްފުށީ މެޖިސްޓްރޭޓް ކޯޓުން އިއްޔެ އަމުރު ކޮށްފައިވާ ކަމަށެވެ.

ފުލުހުން ބުނިގޮތުގައި ފުރަތަމަ މަރުހަލާގައި ހެދި ޓެސްޓްތަކުން އޭގެ ތެރެއިން 344 ކިލޯއަކީ މަސްތުވާތަކެތީގެ ބާވަތެއް ކަމަށް މެތު ކަމަށާއި އަދި 124.6 ކިލޯއަކީ ކޮކެއިން ކަން ދެނެގަނެވިފައިވާ ކަމަށެވެ. އަދި އެ ތަކެތީގެ މަގުމަތީ އަގު އެއް ބިލިއަން ރުފިޔާއަށް އަރާނެ ކަމަށް ވެސް ފުލުހުން ބުންޏެވެ.