އެޕޯލޯއަށް 27 މިލިއަން ރުފިޔާ ދައްކަން ފެނަކައިގެ މައްޗަށް ހުކުމެއް

ފެނަކަ ކޯޕަރޭޝަނުން އެޕޯލޯ ހޯލްޑިންސް އަތުން ކްރެޑިޓް އުސޫލުން ނަގާފައިވާ މުދަލަށްވާ ފައިސާގެ ތެރެއިން މިހާތަނަށް ނުދީ ހުރި 27.1 މިލިއަން ރުފިޔާ ތިން މަސް ތެރޭ ދައްކަން ފެނަކައިގެ މައްޗަށް ސިވިލް ކޯޓުން ހުކުމްކޮށްފި އެވެ.

އެޕޯލޯއިން ފެނަކައާ ދެކޮޅަށް ސިވިލް ކޯޓުގައި ދައުވާ ކުރީ 2020 ވަނަ އަހަރުން ފެށިގެން އެ ކުންފުންޏަށް ފެނަކައިން ދޭންޖެހޭ ފައިސާ ހޯދުމަށެވެ. އަދި އެ ފައިސާ ދޫނުކޮށް ލަސްކުރަމުންދާތީ ލިބެމުންދާ ގެއްލުމުގެ ބަދަލާއި ގާނޫނީ ހަރަދަށް ދިޔަ ފައިސާ ނަގައިދިނުމުގެ ހައްގު އޮތްކަން ކަނޑައަޅައިދޭން އެދިފައިވެ އެވެ.

މި މައްސަލާގައި ޖަވާބުދާރީވާން ފެނަކައަށް ދިން މުއްދަތުގައި ޖަވާބު ހުށަހަޅާފައެއް ނުވެ އެވެ. މައްސަލާގައި ގިނަ އަދަދެއްގެ ލިޔުންތައް ހިމެނޭ ކަމަށް ބުނެ އެ ތަކެތި ދިރާސާކުރަން އިތުރު މުއްދަތަށް ފެނަކައިން އެދުނީ ވެސް މުއްދަތު ހަމަވި ފަހުންނެވެ. އެހެންވެ، ކޯޓުން މައްސަލަ ކުރިއަށް ގެންދިޔައީ ފެނަކަގެ ދިފާއު ބަލައިނުގަނެ އެވެ.

ސިވިލް ކޯޓުން ހުކުމް ކުރީ އެޕޯލޯއިން ފޯރުކޮށްދިން މުދަލަށްވާ 27.1 މިލިއަން ރުފިޔާއަކީ ފެނަކައިން އެ ކުންފުންޏަށް ދައްކަން ޖެހޭ ފައިސާއެއް ކަމަށެވެ. އެހެންވެ، އެ ފައިސާ ތިން މަސް ތެރޭ ދައްކަން އަމުރު ކޮށްފައިވެ އެވެ.

ނަމަވެސް، ގެއްލުމުގެ ބަދަލު ނަގައިދިނުމުގެ ހައްގު އޮތް ކަމަށް ކަނޑައަޅާނެ ތަނެއް ނެތް ކަމަށް ހުކުމްގައިވެ އެވެ. އަދި ވަކީލުންގެ ފީ ވެސް ނަގައިދޭނެ ތަނެއް ނެތް ކަމަށް ހުކުމްގައި ކަނޑައަޅާފައިވެ އެވެ.

ފެނަކައިގެ ހަތަރު ބިލިއަން ރުފިޔާގެ ދަރަންޏެއް އޮތްއިރު، ގިނަ ފަރާތްތަކުން ވަނީ ފައިސާ ހޯދަން ފެނަކައާ ދެކޮޅަށް ދައުވާކޮށްފަ އެވެ. އޭގެ ތެރެއިން ބައެއް މައްސަލަތަކާ ގުޅިގެން ފެނަކައިގެ އެކައުންޓްތަކުން ވަކި އަދަދަކަށް ފައިސާ ހިފަހައްޓަން ވެސް ކޯޓުން އޮތީ އަމުރުކޮށްފަ އެވެ.