އާލިއާއަށް ކިޝޯރް ކުމާރަކީ ކާކު ކަމެއް ނޭނގޭ: ރަންބީރް

އިންޑިއާގެ ކުރީގެ ލެޖެންޑަރީ ލަވަކިޔުންތެރިޔާ ކިޝޯރް ކުމާރަކީ ކާކުކަން ބޮލީވުޑްގެ ތަރި އާލިއާ ބަޓަށް ނޭނގޭ ކަމަށް އޭނާގެ ފިރިމީހާ އަދި އެކްޓަރު ރަންބީރް ކަޕޫރް ބުނެފި އެވެ.

ރަންބީރް އެހެން ބުނީ އިންޑިއާގެ ގޯއާގައި މިހާރު ކުރިއަށް ގެންދާ މި އަހަރުގެ އިންޓަނޭޝަނަލް ފިލްމް ފެސްޓިވަލް އޮފް އިންޑިއާ (އައިއެފްއެފްއައި)ގައި ބޭއްވި ހާއްސަ ޓޯކް ޝެޝަނެއްގައި ވާހަކަދައްކަމުންނެވެ. އޭނާ އެހެން ބުނުމުން ގިނަ ބައެއްގެ ސަމާލުކަން ވަނީ އެކަމަށް ހުއްޓިފަ އެވެ.

އެ ޝެޝަންގައި އޭނާ ބޮޑަށް ދެއްކީ އިންޑިއާގެ ފިލްމީ ދާއިރާއަށް ހުރި ގޮންޖެހުންތަކާ ގުޅޭ ވާހަކަތަކެވެ.

"އަހަރެން އާލިއާއާ ފުރަތަމަ ބައްދަލުވި އިރު، އޭނަ އަހަރެން ގާތު އެހީ ކިޝޯރް ކުމާރަކީ ކާކުތޯ. އެހެންވީމާ، އެބަ އެނގޭދޯ، ދިރިއުޅުމަކީ މި ކަހަލަ ކަމެއްކަން. މީހުން އެކަން [ކިޝޯރް ކުމާރް ކަހަލަ ކުރީގެ ލެޖެންޑުން] ހަނދާން ނެތެން ފަށައިފިކަން އާ އާޓިސްޓުން އައުމުން. އެހެންވީމާ އަހަރެން ދެކޭ ގޮތުގައި އަހަރެމެންގެ ފެށުން އައި ހިސާބު ހަނދާން އާކުރުމަކީ ވަރަށް މުހިންމު ކަމެއް،" ރަންބީރް ބުންޏެވެ.

ކިޝޯރް ކުމާރަކީ އިންޑިއާގައި އެފަދަ ދެވަނައެއް ނެތް ލަވަކިޔުންތެރިއެއްގެ ގޮތުގައި މަޝްހޫރުވި ރީތި އަޑެއްގެ ވެރިއެކެވެ. އަދި ލަވަކިޔުމުގެ އިތުރުން އޭނާ ފިލްމުތައް ވެސް ކުޅުނެވެ.

އާލިއާގެ ބައެއް ފޭނުން ސިފަކުރި ގޮތުގައި، މިއީ ރަންބީރް އާލިއާއަށް ކުރި ޖެއްސުމެކެވެ.

އާލިއާ ލިޕްސްޓިކް ޖައްސާ ގޮތް ދައްކައިދޭ ވީޑިއޯއެއް މިދިޔަ އަހަރު ވައިރަލްވި އެވެ. ތުންފަތުގައި ލިޕްސްޓިކް މާ ބޮޑަށް ހޭކުމުގެ ބަދަލުގައި އޭނާ މަތިމަތިން ހާކާލަނީ އެވެ. މާ ބޮޑަށް ލިޕްސްޓިކް ނުހާކަނީ ރަންބީރަށް އެގޮތް ކަމުނުދާތީ ކަމަށް އާލިއާ އެ ވީޑިއޯގައި ބުންޏެވެ.

ރަންބީރަށް ކަމުދަނީ ލިޕްސްޓިކް ނުހާކަ ހުރުމުން ކަމަށް އާލިއާ ބުނުމާ އެކު، އޭނާގެ ފޭނުން ވަނީ ކެކިއަރައިގެންފަ އެވެ. އަދި އެއީ، ރަންވީރް "ޓޮކްސިކް" ކަމުން އުޅޭ ގޮތެއް ކަމަށް ބުނެ ގިނަ ބަޔަކު އޭނާއަށް ފާޑުކިޔެވެ.

އެހެންވެ، އާލިއާއަށް ކިޝޯރް ކުމާރް ނޭނގޭ ކަމަށް ރަންބީރް ބުނުމަކީ އެކަމަށް ބަދަލުހިފަން ކުރި ކަމެއް ކަމަށް އާލިއާގެ ފޭނުން ވަނީ ސިފަކޮށްފަ އެވެ. އެއީ، ކިޝޯރް ކުމާރް ކަހަލަ ލެޖެންޑަރީ މީހެއް އާލިއާ ކަހަލަ މަޝްހޫރު ތަރިއަކަށް ނޭނގުމަކީ ނާދިރުކަމެއް ކަމަށް ބުނެ އެވެ.