މަގާމުން އިސްތިއުފާ ނުދެއްވައި ފައްޔާޒު ޕްރައިމަރީއަށް ނުކުންނަވާތީ މޫސަގެ ކަންބޮޑުވުން!

މީގެ ހަތަރު ފަހުން ބާއްވާ ރިޔާސީ އިންތިހާބުގައި ވާދަކުރަން އެމްޑީޕީގެ ޕްރައިމަރީއަށް ކުރިމަތިލައްވާ ނަމަ، އެންމެ އިންސާފުވެރި ގޮތަކީ ޗެއާޕާސަންގެ މަގާމުން ފައްޔާޒު އިސްމާއިލް އިސްތިއުފާ ދެއްވުން ކަމަށް އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ މޫސަ) މިއަދު ވިދާޅުވެއްޖެ އެވެ.

މަސްމާރުކޭޓަށް މަސްވެރިންގެ ހާލަތު ބައްލަވައިލެއްވުމަށް އިއްޔެ ވަޑައިގެން އެ ތަނުގެ ފޮޓޯތައް އެމްޑީޕީގެ އެކްސް އެކައުންޓުން ހާމަކުރުމާ އެކު، އުފެދުނު ނުތަނަސްކަމުގެ ތެރޭގައި ފައްޔާޒު ވަނީ 2028 ވަަނަ އަހަރުގެ އިންތިހާބުގައި ވާދަކުރަން ޕްރައިމަރީ އަށް ނުކުންނަވާނެ ކަން އިއުލާން ކުރައްވައިފަ އެވެ. އެއާ އެކު، ފައްޔާޒުގެ ސަޕޯޓަރުން ގެންދަނީ އެކަމަށް ކެމްޕެއިން ކުރަމުންނެވެ.

ސިޔާސީ ކަންކަމުގައި ފައްޔާޒާ ދެމެދު ހިޔާލު ތަފާތުވުންތަކެއްގައި އުޅުއްވާ މޫސަ ވިދާޅުވީ އެމްޑީޕީގެ ޗެއާޕާސަނަކީ ޕާޓީގެ ވަރަށް ބާރުގަދަ މަގަމެއް ކަމަށާއި ޕްރައިމަރީ އަށް އަދި ތިން އަހަރަށް ވުރެ ގިނަ ދުވަސް އޮތްއިރު، އެ މަގާމުގެ ހައިސިއްޔަތުން ޕާޓީގެ ވަސީލަތްތައް ބޭނުން ކޮށްގެން ކެމްޕެއިން ކުރުމަކީ އެންމެ އިންސާފުވެރި ގޮތް ނޫން ކަމަށެވެ. އެމްޑީޕީގެ އިދާރީ ހިންގުމާއި ހުރިހާ ވަސީލަތްތަކާއި ފައިސާއެއް ވެސް ބަލަހައްޓަމުން ދާނީ ޗެއާޕާސަން ކަން މޫސަ ފާހަގަކުރެއްވި އެވެ.

"ޝައުގުވެރިކަން ހުރިއްޔާ މަގާމު ދޫކޮށްލަންވީ. އަޅުގަނޑުމެންގެ އެމްޑީޕީއަކީ ޑިމޮކްރަސީ އަށް ވަރަށް ބޮޑަށް ލޯބި ކުރާ އެ އުސޫލުތައް ދަމަހައްޓާ ކަމުގެ މިސާލު ދައްކައިގެން އުޅޭ ޕާޓީއެއް. އެހެންވީމާ އިއްޔެއްސުރެ ދެން ޕާޓީއެއްގެ އިސް މަގާމެއްގައި ހުރެގެން ޕްރައިމަރީ އަށް ކެމްޕެއިން ކުރުމަކީ ރަނގަޅު ކަމެއް ނޫން،" "މިހާރު" އާ ވާހަކަ ދައްކަވަމުން މޫސަ ވިދާޅުވި އެވެ.

އޭނާ ވިދާޅުވި ގޮތުގައި އެމްޑީޕީގެ ތާރީހުން ވެސް ފެންނަ އޮތް ރީތި އުސޫލަކީ އެއީ އެވެ. އޭގެ މިސާލެއްގެ ގޮތުން މޫސަ ދެއްކެވީ އެމްޑީޕީން އެންމެ ފުރަތަމަ ބޭއްވި ޕްރައިމަރީގައި އޭނަ އާއި ޑރ. މުހައްމަދު މުނައްވަރާ ވާދަކުރަން އޭރުގެ ޗެއާޕާސަން، ރައީސް މުހައްމަދު ނަޝީދު އެ މަފާމުން އިސްތިއުފާ ދެއްވުމެވެ.

"ރައީސް ނަޝީދު އެ ދުވަހު ވިދާޅުވި ދެން އިންތިހާބުގައި ނިމޭ ގޮތެއް ނިމެންދެން މަޑުކުރައްވާނީއޭ. އެހެންވީމާ އެމްޑީޕީން ގެންގުޅޭ އުސޫލަކީ އެއީ،" މޫސަ ވިދާޅުވި އެވެ.

މޫސަ ވިދާޅުވި ގޮތުގައި މިއީ އެތެރޭގެ އިންތިހާބާ އުޅުމުގެ ބަދަލުގައި އެމްޑީޕީ ވަރުގަދަކޮށް ހަރަކާތްތައް ފުޅާކޮށް އިދިކޮޅު ޕާޓީއެއްގެ ޒިންމާ އެންމެ ރަނގަޅަށް އަދާކުރަންވީ ވަގުތެވެ. ވެރިކަން ކުރާ ޕާޓީން މެންބަރުން އިތުރު ކުރަން ބޮޑު ކެމްޕެއިން ހިންގާއިރު، އެއީ އެމްޑީޕީން ވެސް ކުރަން ޖެހިފައި އޮތް ކަމެއް ކަމަށް މޫސަ ވިދާޅުވި އެވެ.

"ޕްރައިމަރީ އަށް އުޅެން އަދި މާ އަވަސް، އަދި ތިން އަހަރާއި ހަ ވަރަކަށް މަސް އެކަމަށް އެބަ އޮތް. އެމްޑީޕީއަކީ އަބަދުވެސް ރިޔާސީ އިންތިހާބު ގާތްވުމުން ޕްރައިމަރީއަކަށް ދާ ޕާޓީއެއް. މިއީ އެ ވަގުތެއް ނޫން،" މޫސަ ވިދާޅުވި އެވެ.

މޫސަ މިހެން ވިދާޅުވެފައިވާއިރު، އިއްޔެ ފައްޔާޒު މަސްމާރުކޭޓަށް ވަޑައިގެންނެވުމުން އެމްޑީޕީގެ ރައީސް އަބްދުﷲ ޝާހިދު ވެސް ވަނީ ހިތްހަމަނުޖެހުން ފާޅުކުރައްވައިފަ އެވެ. ޕްރައިމަރީގައި ވާދަކުރައްވާނެ ކަމަށް ބެލެވޭ ޝާހިދު ނުރުހުން ފާޅުކުރެއްވީ އޭނާ އަށް އެނގިވަޑައިގަތުމެއް ނެތި އެފަދަ ހަރަކާތެއް ކުރިއަށް ގެންގޮސްފައިވާތީ އެވެ. ފައްޔާޒާއި ޝާހިދުއާ ދެމެދު ޕްރައިމަރީގެ ވާދަވެރިކަން މިހާރު ވަނީ އުފެދިފަ އެވެ.

ނަމަވެސް، އެނގިފައިވާ ގޮތުގައި ފައްޔާޒު މަސްމާރުކޭޓް ސަރަހައްދަށް ވަޑައިގަތީ ދުރާލާ ރާވައިގެން ކުރިއަށް ގެންދިޔަ ހަރަކާތެއްގެ ތެރެއަކުން ނޫނެވެ. އޭނާ އެތަނަށް ވަޑައިގަތީ މަސްވެރިއަކާ ބައްދަލުވެ، އެ މީހާ ދިން ދައުވަތަކަށް ކުއްލި ގޮތަކަށެވެ.

ރިޔާސީ އިންތިހާބުގައި ކުރީގެ ރައީސް އިބްރާހިމް މުހައްމަދު ސޯލިހު (އިބޫ) އެމްޑީޕީގެ ފަރާތުން އަނެއްކާވެސް ނުކުންނަވާނެ ކަމަށް ބައެއް މީހުން ގަބޫލުކުރި ނަމަވެސް އެ މަނިކުފާނު އެ އަަށް އަދި ސާފު ޖަވާބެއް ނުދެއްވަ އެވެ.

މިދިޔަ ހަފުތާގެ އާދިއްތަ ދުވަހު ރާއްޖެ ޓީވީގެ "ފަށާއިރު" ޕްރޮގްރާމްގައި އެ ސުވާލު ކުރުމުން އިބޫ ވިދާޅުވީ، އެ މަނިކުފާނުގެ ސިޔާސީ ކުރިމަގާ ބެހޭ ގޮތުން އެމްޑީޕީގެ އިސްވެރިންނާ ވާހަކަފުޅު ދައްކަވާފައިވާ ކަަމަށާއި ކުރިއަށް ވަޑައިގަންނަވާނެ ގޮތް ވެސް އެ ބޭފުޅުންނާ ހިއްސާ ކުރައްވާފައިވާ ކަމަށެވެ. އިބޫ ވިދާޅުވި ގޮތުގައި އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމަށް "ހަތަރު ފަސް" މެމްބަރަކު މިހާރު ވެސް ޝައުގުވެރިކަން ފާޅުކުރައްވާފައިވެ އެވެ. އެއީ ވަރަށް ރަނގަޅު ކަމެއްގެ ގޮތުގައި ސިފަ ކުރައްވައި، އެ މަނިކުފާނު ވިދާޅުވީ ވާދަވެރި އެތެރޭގެ އިންތިހާބެއް ކުރިއަށް ގެންދިއުމަކީ ވަރަށް މުހިއްމު ކަމެއް ކަމަށެވެ.