ޕާޓީ ބަދަލުކުރުމުން މަޖިލިހުގެ މެންބަރުކަން ގެއްލޭ ގޮތަށް ގާނޫނުއަސާސީ އިސްލާހުކޮށްފި

ރައްޔިތުންގެ މަޖިލީހުގެ މެންބަރަކު ތަމްސީލު ކުރައްވާ ސިޔާސީ ޕާޓީ ބަދަލުކޮށްފި ނަމަ ނުވަތަ އެ ޕާޓީން ވަކިކޮށްފި ނަމަ މެންބަރަކު ކަން ގެއްލޭ ގޮތަށް ގާނޫނުއަސާސީ އަށް ހުށަހެޅި އިސްލާހު މަޖިލީހުން މިއަދު ފާސްކޮށްފި އެވެ.

ސަރުކާރުގެ ފަރާތުން ހުޅުދޫ ދާއިރާގެ ޕީއެންސީގެ މެންބަރު މުހައްމަދު ޝާހިދު ގާނޫނުއަސާސީ އަށް ހުށަހެޅުއްވި އެ އިސްލާހުގެ ފުރަތަމަ ކިޔުން މަޖިލީހުގައި އިއްވީ މިއަދެވެ. އެ ބިލްގެ ބަހުސް ފަށައި ގަޑިއެއްހާއިރު ތެރޭގައި ބަހުސްކޮށް ނިންމާލައި މުޅި މަޖިލީހުގެ ކޮމިޓީ އަށް ފޮނުވި އެވެ.

އެ ބިލަށް އެމްޑީޕީން ކަންބޮޑުވުން ފާޅުކޮށް އަދި ޕީއެންސީގެ ބައެއް މެންބަރުން ވެސް ހިޔާލު ތަފާތުވެފައިވީ ނަމަވެސް ކޮމިޓީ މަރުހަލާ ވެސް ވަރަށް އަވަހަށް ނިންމާލުމަށް ފަހު، އެންޓި ޑިފެކްޝަނާ ގުޅޭ މާއްދާތަކަށް އެއްވެސް ބަދަލެއް ނުގެނެސް ފާސްކުރި އެވެ.

އެ ކޮމިޓީ ރިޕޯޓު ފާސް ކުރުމާ މެދު ގޮތެއް ނިންމަން މިއަދު ހަވީރު ބޭއްވި މަޖިލީހުގެ ޖަލްސާގައި ނެެގި ވޯޓުގައި 78 މެންބަރުން ވޯޓު ދެއްވީ ފެންނަ ކަމަށެވެ. އަދި ފާސްކުރަން ނުފެންނަ ކަމަށް 13 ވޯޓު ދެއްވި އެވެ. މިއަދުގެ ޖަލްސާ އަށް ވަޑައިގެންނެވި ޕީއެންސީގެ ހުރިހާ މެމްބަރުން ވެސް ވޯޓު ދެއްވީ ގާނޫނުއަސާސީ އަށް އެ އިސްލާހު ގެންނަން ފެނިވަޑައިގަންނަވާ ކަމަށެވެ.

އެ ވޯޓުގައި މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ ބައިވެރިވެވަޑައިގެންފަ އެވެ.

ގާނޫނުއަސާސީ އިސްލާހު ކުރަން ބޭނުންވަނީ މަޖިލިހުގައި މިހާރު ތިއްބަވާ 83 މެމްބަރުންގެ ތެރެއިން 70 މެމްބަރުންގެ ވޯޓެވެ.

ސަރުކާރުގެ ފަރާތުން ގާނޫނުއަސާސީ އަށް ހުށަހެޅި އިސްލާހުގައި ބުނާގޮތުން ވަކި ސިޔާސީ ޕާޓީއެއްގެ ފަރާތުން މަޖިލިސް އިންތިހާބުގައި ވާދަކޮށްގެން އިންތިހާބުވުމަށް ފަހު، އެ ދައުރުގެ ތެރޭގައި އެ ޕާޓީއަކުން ވަކިވެއްޖެ ނަމަ ނުވަތަ ޕާޓީން ވަކިކޮށްފި ނަމަ ނުވަތަ އެހެން ޕާޓީއެއްގެ މެންބަރަކަށް ވެއްޖެ ނަމަ އެ މީހަކު މަޖިލިހުގެ މެންބަރުކަމުން ވަކިވާނެ އެވެ.

އޭގެ އިތުރުން މަޖިލިހުގެ މެންބަރަކު މިހާރު ތަމްސީލް ކުރައްވާ ސިޔާސީ ޕާޓީން އަމިއްލަ އަށް ވަކިވެއްޖެ ނަމަ ނުވަތަ ވަކި ކޮށްފި ނަމަ ނުވަތަ އެހެން ޕާޓީއަކާ ގުޅިއްޖެ ނަމަ ވެސް ގޮނޑި ގެއްލޭނެ ކަމަށް އެ އިސްލާހުގައި ވެ އެވެ.

އަމިއްލަ ގޮތުން ވާދަކޮށްގެން އިންތިހާބުވާ މެންބަރަކު ސިޔާސީ ޕާޓީއަކާ ގުޅިވަޑައިގެންފި ނަމަވެސް އެ މެންބަރެއްގެ ގޮނޑި ގެއްލޭނެ ކަމަށް އެ އިސްލާހުގައި ބަޔާންކޮށްފައި ވެ އެވެ.

މުޅި މަޖިލީހުގެ ކޮމިޓީގައި އެ މާއްދާތައް އިސްލާހު ކުރުމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި އެވެ. އެ އިސްލާހުގައި ބުނެފައި ވަނީ މެންބަރު ކަމުން ވަކިކޮށްފި ނަމަ އެ ދާއިރާއެއްގެ ރައްޔިތުންގެ ވޯޓަކަށް ދާން ޖެހޭނެ އެވެ.

ނަމަވެސް ޕީއެންސީގެ މެޖޯރިޓީ އޮތް މަޖިލީހުން އެ އިސްލާހުތައް ފާހެއް ނުކުރި އެވެ.

މެންބަރުން ގޮނޑި ގެއްލޭ ހާލަތްތައް ބަޔާން ކުރާ އެންޓި ޑިފެކްޝަން ގާނޫނެއް 19 ވަނަ މަޖިލީހުން ވެސް ވަނީ ފާސްކޮށްފަ އެވެ. އެ ގާނޫނުގައި ބުނާ ގޮތުން މެންބަރަކު ޕާޓީ ބަދަލުކޮށްފި ނަމަ ޖެހޭނީ މެންބަރުކަމުން އަމިއްލަ އަށް އިސްތިއުފާ ދޭށެވެ.

ނަމަވެސް އިސްތިއުފާ ނުދީފި ނަމަ ވާނެ ގޮތެއް އެ ގާނޫނުގައި ބަޔާން ކޮށްފައި ނެތެވެ. އަދި އެ ގާނޫނު ބާތިލް ކުރަން އަމިއްލަ ފަރާތަކުން ވަނީ ކޯޓަށް މައްސަލަ ވެސް ހުށަހަޅައިފަ އެވެ.

ބިލުގެ މަސައްކަތް މިއަދު ފަށައި މިއަދު ފާސް ކުރުމުގެ މަސައްކަތް ކުރާތީ އިދިކޮޅު އެމްޑީޕީގެ ސަޕޯޓަރުން ވަނީ މަޖިލިސް ދޮރުމަތީގައި އިހުތިޖާޖު ކޮށްފަ އެވެ. ހަމަ އެވަގުތު ޕީއެންސީގެ ސަޕޯޓަރުން ވެސް މަޖިލިސް ކައިރިއަށް އެއްވި އެވެ.