ސޮނީ ފިޝިންގެ "ކަނޑު ފޯރި" އަންނަ މަހު، ރަޖިސްޓްރީވާން ހުޅުވާލައިފި

ސޮނީ ފިޝިން އިން މިދިޔަ އަހަރު ތައާރަފްކުރި "ކަނޑު ފޯރި" މަސްރޭހުގެ ދެ ވަނަ އެޑިޝަން އަންނަ މަހުގެ 18 ވަނަ ދުވަހު ބޭއްވުމަށް އިއުލާނުކޮށް، ރަޖިސްޓްރޭޝަނަށް ހުޅުވައިފި އެވެ.

މާލެ ސަރަހައްދުގައި ބޭއްވުމަށް ހަމަޖެހިފައިވާ މި މުބާރާތުގައި ބައިވެރިވެވޭނީ މަދުވެގެން ފަސް މެމްބަރުން އަދި ގިނަވެގެން 10 މެމްބަރުން ހިމެނޭ ޓީމުތަކަށެވެ. މި މުބާރާތުގައި ވާދަކުރުމުގެ ފުރުސަތު ދިނުމަށް ހަމަޖެހިފައި ވަނީ 15 ޓީމަށެވެ. މުބާރާތަށް ރަޖިސްޓްރީވުމަށް 1500ރ. ގެ ފީއެއް ދައްކަން ޖެހޭނެ އެވެ.

ސޮނީ ފިޝިންއިން "ކަނޑު ފޯރި" މަސް ރޭހަށް ޖުމްލަ 78,000ރ. ގެ ޕްރައިޒް ޕޫލެއް ވަނީ ހުށަހަޅައިފަ އެވެ. އޭގެ ތެރޭގައި އެކި ވަނަތަކަށް ހުށަހަޅާފައިވާ ފައިސާގެ އިނާމާއި ވައުޗަރު ހިމެނެ އެވެ.

މި މުބާރާތުގެ އެއް ވަނައަށް ހުށަހަޅާފައި ވަނީ 25,000ރ. ގެ ފައިސާގެ އިނާމާއި 10,000ރ. ގެ ވައުޗަރެކެވެ. ދެވަނަ އަށް ހުށަހަޅާފައި ވަނީ 15,000ރ. ގެ ފައިސާގެ އިނާމާއި 8,000ރ. ގެ ވައުޗަރެކެވެ. ތިން ވަނަ އަށް ހުށަހަޅާފައި ވަނީ 10,000ރ. ގެ ފައިސާގެ އިނާމާއި 5000ރ. ގެ ވައުޗަރެވެ.

މުބާރާތުގެ އެންމެ މޮޅު މަސްވެރިޔާއަށް 5000ރ. ފައިސާގެ އިނާމާއި 2000ރ. ގެ ވައުޗަރެއް ލިބޭނެ އެވެ.

މި މުބާރާތަށް ރަޖިސްޓްރީ ކުރެވޭނީ އަންނަ ބުރާސްފަތި ދުވަހުގެ ނިޔަލަށެވެ.

"ކަނޑު ފޯރީ"ގެ ފުރަތަމަ މުބާރާތް ބޭއްވީ މިދިޔަ އަހަރުގެ ފެބްރުއަރީ މަހު އެވެ.