އިންޑިއާގެ ފުޓްބޯޅައަށް މަޑުޖެހުން: މި އަހަރު އެންމެ މެޗަކުން ވެސް މޮޅެއް ނުވި

މި އަހަރުގެ އެއްވެސް މެޗަކުން މޮޅެއް ނުހޯދި އިންޑިއާގެ ގައުމީ ފުޓްބޯޅަ ޓީމުން އަހަރު ނިންމާލަން ޖެހިއްޖެ އެވެ.

މި އަހަރުގެ ފީފާ ވިންޑޯގެ އެންމެ ފަހު ބުރު މި ހަފުތާގައި ނިމެނެ އެވެ. މި އަހަރު އިންޑިއާގެ އެންމެ ފަހު މެޗުގައި ރޭ މެލޭޝިއާ އާ ދެކޮޅަށް ކުޅެ ބަލިނުވެ ސަލާމަތްވީ ރާހުލް ބެކޭ ޖެހި ލަނޑުން ނަތީޖާ ހަމަހަމަ ކޮށްގެންނެވެ.

އިންޑިއާއިން ވަނީ މި އަހަރު 11 މެޗު ކުޅެފަ އެވެ. ހަ މެޗު ވީ ބައްޔެވެ. ފަސް މެޗުން އެއްވަރު ވި އެވެ. ބައިކޮޅަށް 11 ލަނޑު ވަން އިރު، ޖެހުނީ އެންމެ ހަތަރު ލަނޑެވެ.

މިއީ ފަހުގެ ތާރީހުގައި އެއްވެސް މެޗަކުން މޮޅެއް ނުހޯދި އިންޑިއާ އިން އަހަރު ނިންމާލަން ޖެހުނު ފުރަތަމަ ފަހަރެވެ. މީގެ ކުރިން މެޗަކުން މޮޅު ނުވެ އިންޑިއާއިން އަހަރު ނިންމާލީ 2014 ގަ އެވެ. އެ އަހަރު ކުޅުނީ ދެ މެޗެވެ.

އިންޑިއާގެ ގޯލްޑް މެޝިންގެ ގޮތުގައި މަޝްހޫރު ވެފައިވާ ކުރީގެ ކެޕްޓަން ސުނިލް ޗެތުރީ ވަނީ މި އަހަރު ޖޫން މަހު ގައުމީ ޓީމުން ރިޓަޔާކޮށްފަ އެވެ. ޓީމަށް ގެނައި އަނެއް ބަދަލަކީ މިދިޔަ ފަސް އަހަރުވަންދެން ޓީމުގައި ހުރި ކޯޗު ކްރޮއޭޝިއާގެ އީގޯ ސްޓިމަޗް މަގާމުން ވަކި ކުރުމެވެ.

އޭޝިއަން ކަޕްގައި އިންޑިއާ ކުޅުނު ތިން މެޗުން ވެސް ބަލިވުމުން، އޭނާގެ މަސައްލަތް ބެލުމަށް ފަހު އިންޑިއާގެ ފެޑެރޭޝަނުން ނިންމީ ޖޫން މަހު އޭނަ މަގާމުން ވަކި ކުރުމަށެވެ.

މިހާރުގެ ކޯޗު މަނޯލޯ މާކްއޭޒްއާ ޓީމުގެ ކޯޗުކަން ހަވާލު ކުރީ ޖުލައި 20 ވަނަ ދުވަހު އެވެ. އިންޑިއާގެ ގައުމީ ކޯޗުގެ މަގާމު އޭނާ އަދާކުރަނީ ގޯއާ އެފްސީގެ ހެޑް ކޯޗުގެ މަގާމު ވެސް އަދާކުރަމުންނެވެ. އިންޑިއާގެ ފެޑެރޭޝަނުން ވަނީ ކްލަބްގެ ހެޑް ކޯޗުގެ މަގާމު އަދާކުރުމުގެ ހުއްދަ ވެސް އޭނާ އަށް ދީފަ އެވެ.