ހަސީނާ ހައްޔަރުކުރަން އައިސީސީގެ އެހީއަށް އެދެނީ

ބަންގްލާދޭޝްގައި މުޒާހަރާ ހޫނުވުމާ އެކު އިސްތިއުފާ ދެއްވައި އިންޑިއާ އަށް ވަޑައިގެން އުޅުއްވާ ކުރީގެ ބޮޑުވަޒީރު ޝައިހް ހަސީނާ އަނބުރާ ގައުމަށް ގެންދިއުމަށް އިތުރު މަސައްކަތްތައް ފަށާފައިވާ ކަމަށް ވަގުތީ ރައީސް މުހައްމަދު ޔޫނުސް ވިދާޅުވެއްޖެ އެވެ.

ބަންގްލާދޭޝް އިން މިހާރުވެސް ވަނީ އުމުރުން 77 އަހަރުގެ ހަސީނާ ހައްޔަރުކުމުގެ އަމުރެއް ނެރެފަ އެވެ. ހަސީނާ އެންމެ ފަހުން ފެނިފައިވަނީ އޭނާގެ ރަސްމީ ގެޔަށް މުޒާހަރާގެ ބައިވެރިން ވަދެގަންނަން އުޅުނު ވަގުތު ހެލިކޮޕްޓަރެއްގައި ވަޑައިގެން އިންޑިއާގެ ސަރަހައްދަކަށް ފައިބައިވަޑައިގަންނަވަނިކޮށެވެ.

ހަސީނާ ކޯޓަށް ހާޒިރުވާން އަމުރުކޮށްފައިވަނީ މީހުން މެރުމާއި އިންސާނިއްޔަތާ ހިލާފް އެކި އަމަލުތައް ހިންގުމުގެ ކުށުގެ ދައުވާތަކާ ގުޅިގެންނެވެ. ނަމަވެސް އޭނާ އިންޑިއާއަށް ވަޑައިގެން ގޮތަށް އެ ގައުމުގައި އަދިވެސް ހުންނެވީ އެވެ. ހަސީނާގެ އިތުރުން އޭނާގެ ސަރުކާރުގެ އިސް އެތައް ބަޔަކު ހައްޔަރުކޮށް މި ދައުވާތައް ވަނީ އުފުލައިފަ އެވެ.

ވަގުތީ ރައީސް ޔޫނުސް ވިދާޅުވީ މިވަގުތު އެންމެ ބޮޑު އަމާޒަކީ ހަސީނާގެ ވެރިކަން ނިމުމަކަށް ގެނައި މުޒާހަރާތައް ހުއްޓުވަން އަނިޔާވެރި އަމަލުތައް ހިންގި މީހުންނަށް ހައްގު އަދަބު ދިނުން ކަމަށެވެ.

"ޖުލައި-އޮގަސްޓުގެ މުޒާހަރާތަކުގެ ތެރޭގައި، މީހުން ގެއްލުވާލުމާއި، މެރުމުގެ ޒިންމާ އުފުލަންޖެހޭ މީހުންގެ މައްޗަށް ޝަރީއަތް ހިންގުމުގެ މަސައްކަތް މިހާރުވެސް ވާނީ ފަށާފައި،" ވަގުތީ ސަރުކާރަށް 100 ދުވަސް ވުމާ ގުޅިގެން ދެއްވި ބަޔާނުގައި ޔޫނުސް އިއްޔެ ވިދާޅުވި އެވެ.

ނޯބެލް ސުލްހައިގެ އިނާމު ހާސިލްކޮށްފައިވާ އުމުރުން 84 އަހަރުގެ ޔޫނުސް ސަރުކާރުގެ "ޗީފް އެޑްވައިޒަރު"ގެ މަގާމަށް ހަމަޖެއްސީ ހަސީނާގެ 15 އަހަރުގެ ވެރިކަން ނިމުނުތާ ދުވަސްތަކެއް ފަހުން، އޮގަސްޓް މަހުގެ ނުވަ ވަނަ ދުވަހު އެވެ.

ޔޫނުސް ގައުމާ މުހާތަބު ކުރައްވަމުން ވިދާޅުވީ އިންޓަނޭޝަނަލް ކްރިމިނަލް ކޯޓް (އައިސީސީ) ގެ ޗީފް ޕްރޮސެކިއުޓާ ކަރީމް ޚާންއާ ވެސް ބަންގްލާދޭޝްގެ މައްސަލަތަކާ ގުޅޭ ގޮތުން ވާހަކަ ދައްކަވާފައިވާ ކަމަށެވެ.

"ހުދުމުހުތާރު ވެރިޔާ އިންޑިއާއިން އަނބުރާ ގެނައުމުގެ މަސައްކަތް ފަށާނަން،" ހަސީނާއަށް އިޝާރާތްކުރައްވައި ޔޫނުސް ވިދާޅުވި އެވެ.

މި މަހު ކުރީކޮޅު ބަންގްލާދޭޝް އިން ވަނީ ހައްުޔަރުކުރަން ބޭނުންވާ މީހުން ހޯދަން އިންޓަޕޮލްގެ ރެޑް ނޯޓިސް ނެރުމަށް އެދޭނެ ކަމަށް ވެސް ބުނެފަ އެވެ.

އިންޑިއާ އަކީ ވެސް އިންޓަޕޮލްގެ މެންބަރު ގައުމެކެވެ. އެކަމަކު ރެޑް ނޯޓިސް ނެރުނަސް ހަސީނާ ހައްޔަރުކޮށް ބަންގްލާދޭޝްއާ ހަވާލުކުރަން އިންޑިއާއަށް ލާޒިމެއް ނުވާނެ އެވެ.

މެމްބަރު 196 ގައުމުގެ މެދުގައި ފުލުހުން ގުޅިގެން މަސައްކަތްކުރުމަށް ހަދާފައިވާ އޮންނަ އިންޓަޕޮލްގެ އުސޫލު އޮންނަ ގޮތުން ރެޑް ނޯޓިސް ނެރެފައި އޮތަސް މީހަކު ހައްޔަރުކުރާއިރު އެ ގައުމެއްގެ ގާނޫނުތަކަށް ވެސް ތަބާވާން ޖެހޭނެ އެވެ.