ޑޮލަރު މާރުކުރުމުގެ ގަވާއިދުގެ ދަށުން އެންމެ ރިސޯޓެއް ފިޔަވައި ހުރިހާ ރިސޯޓަކުން ރަޖިސްޓްރީ ވެއްޖެ:އެމްއެމްއޭ

ރިސޯޓްތަކަށް ލިބޭ ޑޮލަރު ބޭންކްތަކުން މާރުކުރަންޖެހޭ ގޮތަށް ހެދި ގަވާއިދުގެ ދަށުން، އެންމެ ރިސޯޓެއް ފިޔަވައި ހުރިހާ ރިސޯޓްތަކަކުން އެކަމަށް ރަޖިސްޓްރީ ވެފައިވާ ކަމަށް މަރުކަޒީ ބޭންކް، އެމްއެމްއޭ އިން މިއަދު ބުނެފި އެވެ.

އެމްއެމްއޭ އިން ބުނީ، ބޭރު ފައިސާއާ ބެހޭ ގަވައިދުގެ ދަށުން 173 ރިސޯޓަކުން ރަޖިސްޓްރީ ވެފައިވާ ކަމަށެވެ. މިވަގުތު ރާއްޖޭގައި ހިންގަނީ 174 ރިސޯޓެވެ.

އެ ގަވާއިދަށް އަމަލުކުރަން ފެށީ 1 އޮކްޓޫބަރުން ފެށިގެންނެވެ. އަދި އޭގެ ފަހުން ވެސް ޓީޖީއެސްޓީއަށް ރަޖިސްޓްރީވާ ފަރާތެއްނަމަ އެ ފަރާތްތަކަށް ވެސް ރަޖިސްޓަރީ ވުމަށް 30 ދުވަހުގެ މުއްދަތެއް އެމްއެމްއޭއިން ދީފައިވެ އެވެ. ބޭރު ފައިސާއާ ބެހޭ ގަވާއިދުގެ ދަށުން ރަޖިސްޓްރީވާން ޖެހެނީ، އެމްއެމްއޭއިން އެކަމަށް ހާއްސަކޮށްފައިވާ ޕޯޓަލެއްގަ އެވެ. އެ ޕޯޓަލްގައި ރިސޯޓުތަކުގެ މައުލޫމާތުތައް ހިމަނަން ޖެހޭނެ އެވެ.

އެމްއެމްއޭ އިން ބުނީ ގަވާއިދާ ގުޅިގެން ބައެއް ރިސޯޓުތަކުން ޝަކުވާ ހުށަހަޅާފައިވާ ކަމަށެވެ. ނަމަވެސް، އަދި ޝަކުވާ ހުށަހެޅި ރިސޯޓުތަކުގެ އަދަދު ސާފެއް ނުވެ އެވެ.

މަރުކަޒީ ބޭންކް އެމްއެމްއޭ އިން އާންމުކުރި އާ ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.

ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. އަދި ކެޓަގަރީ "ބީ" ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.

އެ ގަވާއިދުގެ ދަށުން ޑޮލަރު މާރުކުރަން ފަށަން ޖެހޭނީ އަންނަ ޖެނުއަރީ މަހުގެ ފަހުކޮޅުން ފެށިގެންނެވެ. ޖެނުއަރީގައި ބޭންކަށް މާރުކުރާނީ އޮކްޓޫބަރު މަހު ރިސޯޓަކަށް އައި ޓޫރިސްޓުންގެ ބޮލަކަށް ޖެހޭ އަދަދުގެ ނިސްބަތުންނެވެ.

އެމްއެމްއޭއިން އެ ގަވާއިދަށް އެ ބަދަލު ގެނެސްފައިވަނީ ރާއްޖޭގެ ބޭންކިން ނިޒާމަށް ވަންނަމުންދާ ބޭރު ފައިސާގެ ނިސްބަތް އިތުރުކޮށް އަދި ބޭންކިން ނިޒާމުން ވިޔަފާރިތަކަށާއި އާންމުންގެ ބޭނުންތަކަށް ފޯރުކޮށްދޭ ބޭރު ފައިސާގެ ނިސްބަތް އިތުރުވާނެ ގޮތެއް ހޯދުމަށެވެ.

ޓޫރިޒަމް ދާއިރާއިން ރާއްޖޭގެ ބޭންކުތަކަށް 2019 ވަނަ އަހަރު މާރުކުރީ 153 މިލިއަން ޑޮލަރެވެ. އެކަމަކު މިދިޔަ އަހަރު މާރުކުރި މިންވަރު ވަނީ 68 މިލިއަން ޑޮލަރަށް ދަށަށް ގޮސްފަ އެވެ. އެހެންވެ، އެއީ ޖުމްލަ ޓޫރިޒަމް އާމްދަނީގެ އެންމެ ތިން ޕަސެންޓެވެ.

އަލަށް ގެނައި ބަދަލާ އެކު، ޓޫރިޒަމް ދާއިރާގެ ޖުމްލަ އާމްދަނީގެ 15 ވަރަކަށް ޕަސެންޓް ބޭންކްތަކުގައި މާރުކުރަން ލާޒިމްވެ އެވެ.