ޖޭޑީއެސްގެ ރިޕޯޓިން ސެޝަނެއް ބާއްވައިފި

ޖަޕާނު ސަރުކާރުގެ ހިލޭ އެހީގެ ދަށުން ދޭ "ދަ ޕްރޮޖެކްޓް ފޯ ހިއުމަން ރިސޯސަސް ޑިވެލޮޕްމަންޓް ސްކޮލަޝިޕް" (ޖޭޑީއެސް)ގެ ސްކޮލަޝިޕް ނިންމި ފަސް ދަރިވަރުންނަށް ރިޕޯޓިން ސެސަޝަނެއް ބާއްވައިފި އެވެ.

މި ސެޝަނުގައި އެ ދަރިވަރުން ވަނީ، ދަރިވަރުންގެ ދިރާސީ ހޯދުންތަކާއި ތަޖުރިބާތައް ހިއްސާކޮށްފަ އެވެ.

މި ރިޕޯޓިން ސެޝަނުގައި ޖޭޑީއެސް އޮޕަރޭޓިން ކޮމިޓީގެ މެންބަރުންނާއި ރާއްޖެއަށް ކަނޑައަޅުއްވާފައި ހުންނަވާ ޖަޕާނުގެ ސަފީރު ޓަކެއުޗި މިދޯރި އާއި މިނިސްޓްރީ އޮފް ފޮރިން އެފެއާޒްގެ އިކޮނޮމިކް ކޯޕަރޭޝަންގެ ސެކްރެޓަރީ ޑރ. ހުސައިން ނިޔާޒް އާއި މިނިސްޓްރީ އޮފް ހަޔާ އެޑިއުކޭޝަން، ލޭބާ އެންޑް ސްކިލްސް ޑިވެލޮޕްމަންޓްގެ މިނިސްޓަރު ޑރ. އަބްދުއްރަހީމް ހަސަން އަދި ޖައިކާ މޯލްޑިވްސް އޮފީހުގެ ރެސިޑެންޓް ރެޕްރެޒެންޓެޓިވް ޓަކީ މޮޓޫ ބައިވެރިވެވަޑައިގެންނެވި އެވެ.

ޖޭޑީއެސް ސްކޮލާޝިޕަކީ ސިވިލް ސާވިސް އާއި މިނިވަން މުއައްސަސާތަކުގެ ދާއިމީ މުވައްޒަފުންނާއި ކޯޓުތަކާއި ގުޅުން ހުރި އިދާރާތަކާއި މަޖިލީހުގެ ދާއިމީ މުވައްޒަފުންނަށެވެ.

ސްކޮލާޝިޕްގެ އަމާޒަކީ ސަރުކާރުގެ އިދާރީ ހިންގުމަށް ބޭނުންވާ އިންސާނީ ވަސީލަތް އިތުރަށް ހަރުދަނާކޮށް، އެހީތެރިވެދިނުމުގެ ގޮތުން އެކި އިދާރާތަކުގެ މުވައްޒަފުންނަށް މާސްޓާސް ޑިގްރީ އަށް ކިޔެވުމުގެ ފުރުސަތު ފަހިކޮށްދީ، އެއީ ގައުމުގެ އިޖުތިމާއީ އަދި އިގްތިސާދީ ތަރައްގީގެ ޕްލޭންތައް އެކުލަވާލުމުގައި ފުރިހަމައަށް ބައިވެރިވާ، ގައުމީ ތަރައްގީގައި އިސްދައުރެއް އަދާކުރާނެ ބަޔަކަށް ހެދުމެވެ.

ސްކޮލާޝިޕްގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފަ އެވެ.

މި ސްކޮލާޝިޕުގައި ބައިވެރިވާން ބޭނުންވާ ފަރާތްތަކަށް މި މަހުގެ 24 ވަނަ ދުވަހުގެ ހަވީރު 4 ޖެހުމާ ހަމައަށް އެޕްލައި ކުރެވޭނެ އެވެ. ސްކޮލާޝިޕާ ގުޅޭ އިތުރު މައުލޫމާތު ޖޭޑީއެސްގެ ވެބްސައިޓުން ލިބޭނެ އެވެ.