ދައުލަތުގެ މުވައްޒަފުންގެ މުސާރަ އަށް 11 ބިލިއަން، 10 ޕަސެންޓު އިތުރު

ދައުލަތުގެ މުވައްޒަފުންގެ މުސާރަ އަށް މި އަހަރުގެ މިހާތަނަށް 11 ބިލިއަން ރުފިޔާ ހޭދަކޮށްފި އެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، މިއީ މިދިޔަ އަހަރުގެ އެ މުއްދަތަށް ވުރެ ގާތްގަނޑަކަށް 10 ޕަސެންޓު އިތުރު އަދަދެކެވެ. މިދިޔަ އަހަރު މުވައްޒަފުންގެ މުސާރައަށް ހޭދަކުރީ 9.9 ބިލިއަން ރުފިޔާ އެވެ.

މުވައްޒަފުންގެ މުސާރައަށް ކުރާ ހޭދަ އަކީ ރިކަރަންޓު ހަރަދުގެ ގާތްގަނޑަކަށް 40 ޕަސެންޓެވެ. އަދި ޖުމްލަ ބަޖެޓުގެ 28 ޕަސެންޓެވެ.

ދައުލަތުގެ ޖުމްލަ ހަރަދުގެ 70 ޕަސެންޓު ހޭދަކުރަނީ ރިކަރަންޓް ހަރަދުތަކަށެވެ. މި އަހަރަށް ލަފާކުރި ބަޖެޓުގައި މުވައްޒަފުންގެ މުސާރައަށް ވަނީ 14 ބިލިއަން ރުފިޔާ ހިމަނައިފަ އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައި ސިވިލް ސާވަންޓުންނާއި ޝަރުއީ ދާއިރާގެ މުވައްޒަފުންގެ މުސާރަތައް އެއްހަމަ ކުރަން 500 މިލިއަން ރުފިޔާ ހިމަނާފައި ވެ އެވެ. އެހެންވެ، އަންނަ އަހަރު މުވައްޒަފުންނަށް ކުރާ ހޭދަ އިތުރަށް ބޮޑުވުމުގެ ފުރުސަތު އެބަ އޮތެވެ.

ސަރުކާރުގެ އެކި އިދާރާތަކުގައި މަސައްކަތްކުރާ 50،000 އަށް ވުރެ ގިނަ މުވައްޒަފުންނަށް މުސާރަ ދިނުމަށް އަންނަ އަހަރު ވެސް ބަޖެޓުގައި 14 ބިލިއަން ރުފިޔާ ހިމަނާފައިވެ އެވެ. އޭގެ ތެރެއިން ސިވިލް ސާވިސްގައި 30،000 މުވައްޒަފުން މަސައްކަތް ކުރެ އެވެ. ބާކި ތިބި މުވައްޒަފުންނަކީ މިނިވަން މުއައްސަސާތަކުގައި މަސައްކަތް ކުރާ މުވައްޒަފުންނާއި ސިޔާސީ މުވައްޒަފުންނެވެ.