ރަހީނުކުރި މީހާގެ ބޯ ހުރީ ބާލުވާފައި، ފުލުހުންނަށް ވަދެވުނީ އިނގިލި ބުރިކުރަން އުޅެނިކޮށް!

ހިޔާ ފްލެޓުގެ އެޕާޓްމަންޓެއްގައި ރޭ ރަހީނުކުރި މީހާ ސަލާމަތްކުރަން ފުލުހުންނަށް ވަދެވުނުއިރު، އެ މީހާގެ ބޯ ބޭލުމަށް ފަހު، ތައްޔާރުވަމުން ދިޔައީ އެ މީހާގެ އިނގިއްޔެ ބުރި ކުރަން ކަމަށް ހޯމްލޭންޑު ސެކިއުރިޓީ މިނިސްޓަރު އަލީ އިހުސާން މިރޭ ވިދާޅުވެއްޖެ އެވެ.

އެޗް9 ގެ 20 ވަނަ ފްލޯގެ 11 ވަނަ އެޕާޓްމަންޓުގެ ތެރޭގައި 12 މީހުންގެ ގްރޫޕަކުން މީހަކު ރަހީނުކުރި މައްސަލައެއްގައި ފުލުހުން އަންނަނީ އެ ސަރަހައްދުގައި ހަރަކާތްތެރިވަމުންނެވެ. އެ އެޕާޓްމަންޓު ބަލައި ފާސްކުރުން އަދިވެސް ކުރިއަަށް އެބަގެންދެ އެވެ.

އެކަމާ ގުޅިގެން މިނިސްޓަރު އިހުސާން "މިހާރު"އަށް ވިދާޅުވީ ފުލުހުން އެޕާޓްމަންޓަށް ވަންއިރު، ރަހީނުކުރި ފިރިހެން މީހާގެ ބޯ ބާލުވާފައިވާ ކަމަށެވެ. އަދި ވަޅިން އިނގިލި ބުރިކޮށްލަން ހުރީ ތައްޔާރު ކޮށްފައި ކަމަށް އިހުސާން ވިދާޅުވި އެވެ.

"މިއީ ޑްރަގް މައްސަލަތަކާ ގުޅިގެން ފުލުހުން މީގެ ކުރިން ވެސް ދޭތެރެދޭތެރެއިން ފާސްކުރާ އެޕާޓްމަންޓެއް. މިރޭ އެ އެޕާޓްމަންޓުގެ ތެރޭގައި މީހަކު ރަހީނުކުރީ ޑްރަގް މައްސަލައަކާ ގުޅިގެންތޯ ނޫނިއްޔާ ފައިސާގެ މައްސަލައެއްތޯ ކަނޑައަޅައި ބުނަން އެނގޭނީ ތަހުގީގަށް ފަހު،" މިނިސްޓަރު ވިދާޅުވި އެވެ.

މި މައްސަލައިގެ ވިކްޓިމް އާއި ރަހީނުކުރި މީހުންނާ އޮތް ގުޅުމެއް ވެސް އަދި ނޭނގޭ ކަމަށް އިހުސާން ވިދާޅުވި އެވެ.

"އޭނާ ބުނީ ތިމަންނަ ދަނީ މަހަށޭ. ރަހީނުކުރި މީހުން ދަންނަމޭ ބުނީ. އިތުރަށް ތަހުގީގު ކުރުމުން ހަގީގަތް ސާފުވާނީ،" މިނިސްޓަރު ވިދާޅުވި އެވެ.

އެޕާޓަމަންޓުގެ ދޮރު ފަޅާލައިގެން އެ ތަނަށް ވަނީ ލިބުނު އިންޓެލިޖެންސް ރިޕޯޓަކާ ގުޅިގެން ކަމަށް އޭނާ ވިދާޅުވި އެވެ.

"އަޅުގަނޑުމެންގެ އިންޓެލް އަށް މައުލޫމާތު ލިބުނީ މި އެޕާޓްމަންޓުގެ ތެރޭގައި މީހަކު ރަހީނު ކޮށްގެން އުޅޭ ކަމަށް،" އިހުސާން ވިދާޅުވި އެވެ.

މި ރަހީނުގެ މައްސަލާގައި ހިމެނޭ 12 މީހުން މިހާރު ވަނީ ހައްޔަރުކޮށްފަ އެވެ.

ހިޔާގެ ފަސް ވަނަ ޓަވަރުގެ އެޕާޓްމަންޓަކަށް އޮޅުވާލައިގެން މީހުން ގެންގޮސް ރަހީނުކޮށް، ބަރަހަނާކޮށް ބްލެކްމެއިލް ކުރި މައްސަލައެއް ވެސް މިދިޔަ މެއި މަހު ފެންމަތިވި އެވެ. އެ މައްސަލައިގައި ތުހުމަތުކުރެވޭ މީހުންގެ ވަނަވަރު ވެސް ފުލުހުން އެ ފަހަރު އާއްމުކުރި އެވެ.

ހިޔާގެ އެކި ޓަވަރުތަކުގެ ބައެއް އެޕާޓްމަންޓުތައް ޑްރަގް އައްޑާއަކަށް ހަދައިގެން އުޅޭ މައްސަލަ މިރޭ ވެސް އެތައް ބަޔަކު ޖެއްސި އެވެ.

"އަޅުގަނޑުމެންނަށް މި ފްލޯގައި ވެސް އުޅެވޭ ވަރެއް ނުވޭ. ލިފްޓަށް އެރޭ ވަރެއް ނުވޭ. ފްލޯއަށް ނުކުތަސް އިވެނީ އެ ގުރޫޕްތައް އަޑުގަދަކުރާ އަޑު. ސިޑިމަތީގައި ވެސް ޑްރަގް ބޮއެ އެ ހަދަނީ އެންމެންގެ ކުރިމަތީގައި،" ހިޔާގެ ނުވަ ވަނަ ޓަވަރުގެ އެޕާޓްމަންޓެއްގައި ދިރިއުޅޭ މީހަކު ބުންޏެވެ.