ބިލަބޮންގް އާއި ފިންލެންޑް އިންޓަނޭޝަނަލް ސްކޫލްގެ ގްރޭޑް 1 ގެ އެޑްމިޝަނަށް ހުޅުވާލަނީ

އަންނަ އެޕްރީލް މަހު ފަށާ ދިރާސީ އަހަރަށް ބިލަބޮންގް ހައި އިންޓަނޭޝަނަލް ސްކޫލާއި ފިންލެންޑް އިންޓަނޭޝަނަލް ސްކޫލުގެ ގްރޭޑް 1 ގެ އެޑްމިޝަނަށް މިއަދު ހުޅުވާލަން ނިންމައިފި އެވެ.

މިއަދު މެންދުރު ފަހު 3:00 އިން ފެށިގެން މި ދެ ސްކޫލުގެ ވެބްސައިޓް މެދުވެރިކޮށް ޖާގަ އަށް އެދި ހުށަހެޅޭނެ އެވެ.

ފިންލެންޑް އިންޓަނޭޝަނަލް ސްކޫލަކީ ކެންގަރޫ ކިޑްސް ޕްރީ ސްކޫލު ހިންގާ އިމާރާތުގައި 2019 ވަނަ އަހަރުން ފެށިގެން ހިންގަމުން އަންނަ އިންޓަނޭޝަނަލް ސްކޫލެކެވެ.

މި ސްކޫލުގެ ޕްރިންސިޕަލް ޑރ. އޭޔާ ވެލަންނޭ ވިދާޅުވީ އެ ސްކޫލަށް ދަރިވަރުން ވެއްދުމުގައި ބެލެނިވެރިން އެންމެ ގަޔާވާ އެއް ކަމެއްގެ ގޮތުގައި ފާހަގަކުރެވިފައި ވަނީ ފިންލެންޑްގެ ކޯ ކަރިކިއުލަމް، ރާއްޖޭގެ އާދަކާދަ އާއި ސަގާފަތަށް ފެތޭނެ ގޮތަށް ބަދަލުކޮށް ސީދާ ރާއްޖެއިން އެ ފުރުސަތު ލިބުން ކަމަށެވެ.

އެއީ، ރާއްޖޭގައި ފިންލެންޑް ސްކޫލް ހުޅުވީއްސުރެ ޑިމާންޑު ބޮޑުވެ، ޖާގަތައް އަބަދުވެސް ވެސް ފުލްވެފައި އޮންނަ ސަބަބެއް ކަމަށް ޑރ. އޭޔާ ވިދާޅުވި އެވެ.

"އަޅުގަނޑުމެންގެ ކަރިކިއުލަމާއި ކިޔަވައިދިނުން ބައްޓަންވެފައި އޮންނަނީ މައުލޫމާތު ހިތުދަސްކުރުވުމަށް ވުރެ ބޮޑަށް ދަރިވަރުން އެންމެ ތުއްތުއިރުންސުރެ ދަރިވަރުން އަމިއްލަ އަށް ވިސްނާ ދިރާސާކޮށްގެން މައުލޫމާތާއި ކަންކަން ހިނގާ ގޮތް ދަސްކޮށްދީ، އެކުއްޖެއްގެ ކިޔެވުމުގެ ފުރިހަމަ ޒިންމާ އެކުއްޖަކު އަމިއްލައަށް ނެގުމަށް،" އޭޔާ ވިދާޅުވި އެވެ.

"އަދި ވާދަވެރިކަމުގެ ބަދަލުގައި ކޮންމެ ކުއްޖަކަށް ވެސް އެ ކުއްޖެއްގެ ހުންނަ ހާއްސަ ހުނަރެއް ދެނެގަނެ، އެކަން ތަރައްގީކުރަން މަސައްކަތްކޮށްދީ، ކޮންމެ ކަމެއްގައި ވެސް އެ ކުއްޖަކަށް ވީ ވަރަކުން ބައިވެރިވުން އިތުރު ކުރުމަށް. އަދި އާންމުކޮށް ކިޔަވައިދޭ މާއްދާތަކުގެ އިތުރަށް އަޅުގަނޑުމެންގެ ސްކޫލްގައި ވަޑާމުގެ ތަފާތު އާލާތްތަކާ އެކު ގާއިމްކޮށްފައިވާ ކްރާފްޓް ރޫމްގައި ހިންގާ ކްރާފްޓް ކްލާސް އަދި ހޯމް އިކޮނޮމިކްސް ކްލާހަކީ ވެސް ދަރިވަރުންގެ މެދުގައި ވަރަށް މަގުބޫލު ކްލާސްތަކެއް."

ބިލަބޮން ހައި އިންޓަނޭޝަނަލް ސްކޫލަކީ ރާއްޖޭގެ އެންމެ ފުރަތަމަ އިންޓަނޭޝަނަލް ސްކޫލެވެ. މި ސްކޫލުގެ ޕްރިންސިޕަލް އިސްމާއިލް ސައުދުﷲ އެ ސްކޫލްގެ އެންމެ ހާއްސަކަމެއްގެ ގޮތުގައި ސިފަކުރެއްވީ އެ ސްކޫލްގެ ޒަމާންވީ އަދި ގިނަ ބައެއްގެ މަގުބޫލުކަން ލިބިފައިވާ ކަރިކިއުލަމެވެ.

"އަޅުގަނޑުމެންގެ ސްކޫލްގެ ގްރޭޑް 1 އަށް ވަންނަ ގިނަ އަދަދެއްގެ ދަރިވަރުންނަކީ ކެންގަރޫ ކިޑްސް ޕްރީސްކޫލް ނިންމުމަށް ފަހު ވަންނަ ދަރިވަރުން. އެގޮތުން، ޕްރީ ސްކޫލުން ފައްޓާ ކަރިކިއުލަމް ހުއްޓުމެއް ނެތި ޕްރައިމަރީގައި ވެސް ކުރިއަށް ގެންދިއުމަށް ލިބޭ ފުރުސަތަކީ ގިނަ ބެލެނިވެރިން ފާހަގަކުރާ ކަމެއް،" އޭނާ ވިދާޅުވި އެވެ.

ސައުދުﷲ ވިދާޅުވީ އެސްކޭޖީގައި މިހާރު ކިޔަވަމުން އަންނަ ދަރިވަރުން ގްރޭޑް 1 އަލަށް ފަށައިގަންނަ އިރު އެންމެ އިސް އެއް ކަމެއްގެ ގޮތުގައި އުނގެނުމުގެ އަސާސީ ހުނަރުތައް ތަރައްގީ ކުރަން ސްކޫލުން ހާއްސަ ސަމާލުކަމެއް ދޭނެ ކަމަށެވެ.

"ދިމާވާ ކޮންމެ އުނދަގޫ ހާލަތެއްގައި ވެސް، ދަރިވަރުންގެ ދުޅަހެޔޮ ކަމާއި ތައުލީމު ލިބިދިނުމުގެ ހައްގަކީ އަޅުގަނޑުމެން އެންމެ އިސްކަންދޭނެ ކަންތައް. އެގޮތުން ސްކޫލުގެ އެކިއެކި ހަރަކާތްތަކުގެ ތެރެއިން ދަރިވަރުންގެ އިޖުތިމާއީ، ނަފްސާނީ، އަދި ޖިސްމާނީ ދުޅަހެޔޮކަން އިތުރު ކުރުމުގެ ހަރަކާތްތަކެއްގެ ތެރެއިން އުނގެނުން ބައްޓަން ކުރުމަށް އަޅުގަނޑުމެން އަބަދުވެސް ސަމާލުކަން ދެން،" ސައުދުﷲ ވިދާޅުވި އެވެ.

މި ދެ ސްކޫލަކީ ކޮންމެ އަހަރަކު ވެސް އެސްކޭޖީ ނިންމާ ދަރިވަރުންނަށް ގްރޭޑް އެކަކުން ފުރުސަތު ހޯދުމަށް ބެލެނިވެރިންގެ މެދުގައި ވަރަށް ބޮޑު ވާދަވެރި ކަމެއް އޮންނަ ދެ ސްކޫލެވެ. މި ދެ ސްކޫލުން ޖާގަ ހޯދުމުގެ އެޑްމިޝަނަށް ހުޅުވާލާ ވަގުތަށް ސަމާލުކަން ދިނުމަކީ ޖާގަ ހޯދުމުގެ ފުރުސަތު އިތުރުވާނެ ކަމެއްގެ ގޮތުގައި މި ދެ ސްކޫލުން ބުނެ އެވެ.

ފިންލެންޑް އިންޓަނޭޝަނަލް ސްކޫލާއި ބިލަބޮން ހައި އިންޓަނޭޝަނަލް ސްކޫލްގެ ގްރޭޑް 1 ގެ އެޑްމިޝަނާ ގުޅޭ މައުލޫމާތުތައް އެ ސްކޫލްތަކުގެ ވެބްސައިޓާއި ސޯޝަލް މީޑިއާ ޕޭޖުތަކުގައި ހުންނާނެ އެވެ.