ވިޔަފާރިތަކަށް ބީއެމްއެލްގެ މާސްޓަ ބިޒްނަސް ޕްރިޕެއިޑް ކާޑެއް

ބޭންކް އޮފް މޯލްޑިވްސް (ބީއެމްއެލް) އިން ކުދި އަދި މެދުފަންތީގެ ވިޔަފާރިތަކާއި ކޯޕަރޭޓް ކަސްޓަމަރުންނަށް ހާއްސަކޮށް މާސްޓަ ބިޒްނަސް ޕްރިޕެއިޑް ކާޑެއް މިއަދު އިފުތިތާހުކޮށްފި އެވެ.

ހޮޓެލް ޖެންގައި ބޭއްވި ރަސްމިއްޔާތެއްގައި އެ ކާޑު އިފުތިތާހުކުރީ އެ ބޭންކުން މިހާރު ކުރިއަށް ގެންދާ ބިޒްނަސް އެކްސްޕޯގަ އެވެ.

ބީއެމްއެލް އިން ބުނި ގޮތުގައި، އެ ކުންފުނިން ބިޒްނަސް ޑެބިޓް ކާޑެއް ނެރުނީ ޕެޓީކޭޝް މެނޭޖު ކުރުން ފަދަ ބޭނުންތަކަށް މި ފަދަ ކާޑެއް ވިޔަފާރިތަކަށް ބޭނުން ބޮޑުވެފައި ވާތީ އެވެ. ބީއެމްއެލް އިން ވަނީ ބިޒްނަސް ޕްރިޕެއިޑުގެ ޑޮލަރު ކާޑަކާއި ރުފިޔާ ކާޑެއް ނެރެފަ އެވެ.

ބިޒްނަސް ޕްރިޕެއިޑް ރުފިޔާ ކާޑު ބޭނުންކުރެވޭނީ ހަމައެކަނި ރާއްޖޭގަ އެވެ. މި ކާޑުން އޭޓީއެމްތަކާއި ޕީއޯއެސް ކާޑު މެޝިނާއި އީކޮމާސް ޕްލެޓްފޯމުގައި ބޭނުން ކުރެވޭނެ އެވެ. މި ކާޑުގައި ދުވާލަކަށް ދެލައްކަ ރުފިޔާގެ ލިމިޓެއް ހިމެނޭ އިރު ކާޑަށް އެންމެ ގިނަވެގެން ރީލޯޑް ކުރެވޭނީ 500،000ރ. އާ ހަމައަށެވެ.

ބިޒްނަސް ޕްރިޕެއިޑް ޔޫއެސްޑީ ކާޑު ރާއްޖެ އާއި ރާއްޖެއިން ބޭރުގެ މުއާމަލާތްތަކަށް ބޭނުން ކުރެވޭނެ އެވެ. މި ކާޑުން ދުވާލަކު 50،000 ޑޮލަރާ ހަމައަށް ބޭނުން ކުރެވޭނެ އެވެ. އެ ކާޑަށް އެންމެ ގިނަވެގެން ރީލޯޑު ކުރެވޭނީ 100،000 ޑޮލަރާ ހަމައަށެވެ.

ބީއެމްއެލްއިން ބުނީ ކާޑުތަކުގެ ލިމިޓް ބޮޑުކުރަން ބޭނުން ނަމަ ވިޔަފާރިތަކަށް އެ ފުރުސަތު ވެސް އޮންނާނެ ކަމަށެވެ.

ޕެޓީކޭޝް މެނޭޖު ކުރުމުގެ އިތުރުން މި ކާޑަކީ މާސްޓަކާޑް "އީޒީ ސޭވިންގްސް" ޕްރޮގުރާމުގައި ހިމެނޭ ކާޑަކަށް ވުމުން މި ކާޑު ބޭނުންކޮށްގެން އެޑޯބް އެކްރޮބެޓް، ގޫގުލް ވޯކްސްޕޭސް ފަދަ ޕްރޮޑަކްޓުތައް ގަތުމުން ޑިސްކައުންޓު ލިބޭނެ އެވެ. އަދި މި ކާޑަކީ މާސްޓަކާޑުގެ "ޕްރައިސްލެސް" ޕްރޮގުރާމްގައި ހިމެނޭ ކާޑަކަށްވުމުން މި ކާޑު ބޭނުން ކޮށްގެން ބުކްކުރާ ފްލައިޓުތަކާއި ހޮޓެލްތަކަށް ހާއްސަ ޓްރެވަލް އޮފާތަކެއް ލިބޭނެ އެވެ. އަދި މި ކާޑުން ހުރިހާ ޒޯހޯ ޕްރޮޑަކްޓުތަކަކަށް 35 ޕަސެންޓުގެ ޑިސްކައުންޓު ލިބޭނެ އެވެ.

މި ކާޑު ބޭނުން ކޮށްގެން ކިއުއާރު ޓްރާންސެކްޝަންތައް ހެދޭނެ އިންތިޒާމް ބީއެމްއެލް މޮބައިލް އެޕުގެ އާ އަޕްގްރޭޑުގައި ހިމެނޭނެ އެވެ.

ބީއެމްއެލް އިން ނެރުނު ބިޒްނަސް ޕްރިޕެއިޑް ކާޑުގެ އިތުރު މައުލޫމާތާއި އެ ބެންކުން ވިޔަފާރިތަކަށް ފައިސާގެ މުއާމަލާތްތައް ކުރުމުގައި ހުރި ލުއިފަސޭހަ ގޮތްތަކާއި ވިޔަފާރިތަކަށް އެ ބެންކުން ދޭ އިތުރު ހިދުމަތްތަކުގެ މައުލޫމާތުތައް ބީއެމްއެލް ބިޒްނަސް އެކްސްޕޯއިން ލިބޭނެ އެވެ. މި އެކްސްޕޯ ކުރިއަށް ދާނީ މިއަދު ހަވީރު 5 ޖަހަންދެނެވެ.