42 އަހަރުގެ ބޮޑެތި ހިދުމަތްތަކަކަށް ފަހު އައިސްތު ބީއެމްއެލް އިން ވަކިވެވަޑައިގަންނަވަނީ

ބޭންކް އޮފް މޯލްޑިވްސް (ބީއެމްއެލް) އުފެދުނީއްސުރެ މެދުކެނޑުމެއް ނެތި އެ ބޭންކުގައި މުހިންމު މަސައްކަތްތަކެއް ކުރެއްވި މިހާރުގެ ޑެޕިއުޓީ ސީއީއޯ އައިޝަތު ނޫރައްދީން (އައިސްތު) ވަކިވެވަޑައިގަންނަވަން ނިންމަވައިފި އެވެ.

އޭނާ އެކަން އިއުލާން ކުރެއްވީ ބީއެމްއެލްގެ މުވައްޒަފުންނަށް މިއަދު ފޮނުއްވި އީމެއިލެއްގަ އެވެ. މިހާރު އުމުރުން 65 އަހަރުގެ އައިސްތު ބީއެމްއެލްގެ ޒިންމާތަކުން ފެންނާނެ އެންމެ ފަހު ދުވަހަކީ އަންނަ ނޮވެމްބަރު 7 އެވެ.

މެދުކެނޑުމެއް ނެތި ބީއެމްއެލްގައި 40 އަހަރަށް ވުރެ ގިނަ ދުވަހު ހިދުމަތް ކުރެއްވި ތިން މުވައްޒަފުންގެ ތެރޭގައި ހިމެނިވަޑައިގަންނަވާ އައިސްތު އެ ބޭންކުގެ މުވައްޒަފުންނަށް ފޮނުއްވި މެއިލްގައި ވިދާޅުވީ، އެއީ މަގާމުގެ ހައިސިއްޔަތުން ދެއްވާ އެންމެ ފަހު މެސެޖު ކަމަށެވެ.

އޭނާ ވިދާޅުވީ، ބީއެމްއެލްއަކީ އަބަދުވެސް އޭނާގެ ހިތުގައި ވަރަށް ހާއްސަ މަޤާމެއް އޮންނާނެ ތަނެއް ކަމަށެވެ.

ވިދާޅުވީ، އެ ބޭންކުގައި ހޭދަކުރެއްވި މުއްދަތުގައި ކުރިއެރުންތައް ލިބި އަދި ގޮންޖެހުންތަކާ ވެސް ކުރިމަތިލެއްވި ކަމަށެވެ.

"އަދި ހަމައެއާއެކު، ތިޔަ ގިނަ މުވައްޒަފުން ވަޒީފާގައި ހޯދި ކާމިޔާބީ އާއި އަމިއްލަ ދިރިއުޅުމުގެ އެކި އުފާވެރި ވަގުތުތައް އަޅުގަނޑު ވެސް ދެކެފައިވާނެ އެވެ. ތިޔައިން ކޮންމެ މުވަޒަފެއްގެ ވާހަކަ އިން އަޅުގަނޑަށް ވެސް ވަރަށް އިލްހާމު ލިބުނެވެ،" އައިސްތުގެ މެއިލްގައި ވެ އެވެ.

އައިސްތު ވިދާޅުވިގޮތުގައި، ބީއެމްއެލްގެ ތަރައްގީ އާއި ކާމިޔާބީގެ މުހިންމު ކޮންމެ ވަގުތަކާއި އުފާވެރި ކޮންމެ ވަގުތެއް ވެސް އޭނާ އަށް ވަނީ ވަރަށް ލޯބި ވަގުތަކަށެވެ.

"ބޭންކުގެ އެންމެ ކާމިޔާބީ އަދި ނާކާމިޔާބީ ވަގުތުތައް ދެކެފައިވާ މީހެއްގެ ހައިސިއްޔަތުން، އަޅުގަނޑަށް ތިޔަ އެންމެހާ މުވައްޒަފުންނަށް އަރުވާނެ ލަފައަކީ ތިޔަ މުވައްޒަފުންގެ ހަމަތަކާއި އުސޫލުތަކުގައި ސާބިތުވެ ތިބުމަށާއި އެކަކު އަނެކަކަށް އޯގާތެރިވުމަށެވެ،" ބީއެމްއެލްގެ މުވައްޒަފުންނަށް އައިސްތު މަގާމުގެ ހައިސިއްޔަތުން ދެއްވި އެންމެ ފަހުގެ ނަސޭހަތުގައި ވިދާޅުވި އެވެ.

"ބޭންކުގެ ވަފާތެރި މުވައްޒަފުންގެ ގޮތުގައި ތިޔަ މުވައްޒަފުން، އަބަދުވެސް ވެފައިވަނީ އެންމެ އިސް އަހަންމިއްޔަތުކަމެއް ދެވޭ ކަމަކަށެވެ. މިކަން މިގޮތުގައި ދެމިއޮންނާ ނެކަމާއި ކުރިއަށް އޮތް އަހަރު ތަކުގައި ވެސް ބޭންކު ތަރައްގީވަމުންދާނެ ކަމާއި އަބަދުވެސް ގޮންޖެހުންތަކާ ކުރިމަތިލައި އަދި ކާމިޔާބީތައް ފާހަގަކުރަމުންދާނެ ކަމާ މެދު އަޅުގަނޑުގެ ހިތުގައި އެއްވެސް ޝައްކެއް ނެތެވެ."

އައިސްތު ނިންމަވާފައި ވަނީ ބީއެމްއެލްގެ އަހަރީ ދުވަސް ފާހަގަކުރުމަށް އަންނަ މަހުގެ 7 ގައި ބާއްވާ ހަފުލާގައި ބައިވެރިވެވަޑައިގަތުމަށެވެ.

އައިސްތު ވަނީ ބީއެމްއެލްގެ ބޯޑުގައި ވެސް ގިނަ ދުވަސްތަކެއް ވަންދެން މަސައްކަތް ކުރައްވައިފަ އެވެ. އެއީ އޮގަސްޓް 31 2020 އިން އޮަސްޓް 25، 2024 އާ ހަމައަށެވެ.

އައިސްތުއަކީ ހުޝިޔާރު ލީޑަރެއް: ޝަރީފް

ބީއެމްއެލްގެ އާ ސީއީއޯ އަދި އެމްޑީ މުހައްމަދު ޝަރީފު ވެސް ވަނީ އައިސްތު މަގާމުން ވަކިވެވަޑައިގަންނަވާކަން އީމެއިލަކުން މުވައްޒަފުންނަށް މިއަދު ރަސްމީކޮށް އަންގަވައިފަ އެވެ.

އެ މެއިލްގައި ޝަރީފު ވިދާޅުވީ، އައިސްތުއަކީ ބީއެމްއެލްގެ އެންމެ ކާމިޔާބު ދުވަސްތަކުގައި އަދި އެންމެ ގޮންޖެހުންތައް ބޮޑު ދުވަސްތަކުގައި ވެސް ކާމިޔާބު ހޯއްދަވައި ދެއްވުމަށް ހިކުމަތްތެރިކަމާއި ވިސްނުންތެރިކަމާއެކު ސްޓްރެޓެޖީތައް އެކުލަވާލެއްވި ހުޝިޔާރު ލީޑަރެއް ކަމަށެވެ.

"އައިޝަތު ވަނީ ބޯޑާއި މެނޭޖްމަންޓްގައި ނުހަނު ބުރަ މަސައްކަތްތަކެއް ވެސް ކުރައްވާފައި. އަދި ބޭންކަށް އެވޯޑު ލިބިފައިވާ އިންޓަނޭޝަނަލް ބޭންކިންގެ ވިޔަފާރީގެ ފަހަތުގައިވާ ބާނީ އަކީ ވެސް ހަމަ އައިޝަތު،" އޭނާ ވިދާޅުވި އެވެ.

އައިސްތުއާ ގުޅޭ ބައެއް ތާރީހުތައް:

- އެންމެ ފުރަތަމަ ވަޒީފާ އަދާކުރެއްވީ ސްޓޭޓް ބޭންކް އޮފް އިންޑިއާގައި. ބީއެމްއެލްގެ ވަޒީފާ އަށް ވަދެވަޑައިގަތީ 1982 ގައި. ފުރަތަމަ މަގާމަކީ ކޭޝިއާ ކްލާކް.

- އައިސްތު ބީއެމްއެލްއާ ގުޅިވަޑައިގަތީ އުމުރުން 23 އަހަރުގައި.

- ބީއެމްއެލްގެ ބޯޑުގައި ހުންނަވައިގެން މުހިންމު ހިދުމަތްތަކެއް ކުރެއްވި.

ޝަރީފު ވިދާޅުވީ، އޭނާއަށާއި ބީއެމްއެލްގެ މުވައްޒަފުންނަށް އަގުހުރި އިރުޝާދާއި ހެޔޮ ނަސޭހަތް އައިސްތު ދެއްވި ކަމަށާއި އެއީ އިހުތިރާމް ކުރައްވާ ބޭފުޅެއް ކަމަށެވެ.

"އެކި ކަންކަމުގައި އަޅުގަނޑުމެންނަށް ވަރަށް ބޮޑަށް އެހީތެރިވެދެއްވި ބޭކަނބަލެއް. އައިޝަތާއެކު މަސައްކަތް ކުރުމުގެ ފުރުސަތު ލިބުނީތީ އަޅުގަނޑު ވަރަށް ފަހުރުވެރިވަން. އަޅުގަނޑަށް ޔަގީން ހުރިހާ މުވައްޒަފުންގެ ހިތުގައިވެސް އައިޝަތުއަށް އަބަދުމެ ހާއްސަ މަގާމެއް އޮންނާނެކަން،" ބީއެމްއެލްއެލްގެ ސީއޯއީގެ މަގާމާ މި މަހުގެ 16 ގައި ހަވާލުވެވަޑައިގެންނެވި ޝަރީފް ވިދާޅުވި އެވެ.