މުއްސަނދިކަން ހޯދި ގޮތް ސާބިތުކޮށްދިނުމުގެ ޒިންމާ ތުހުމަތުވާ ފަރާތުން އުފުލަން ޖެހޭ ގޮތަށް އިސްލާހެއް

ދައުލަތުގެ ވަޒީފާއެއް އަދާކުރާ މީހަކު ހޯދާފައިވާ މުއްސަނދިކަން ސާބިތު ކޮށްދިނުމުގެ ޒިންމާ ތުހުމަތުވާ ފަރާތަކުން އުފުލަން ޖެހޭ ގޮތަށް ގާނޫނުލްއުގޫބާތަށް އިސްލާހެއް ހުށަހަޅައިފި އެވެ.

ސަރުކާރުގެ ފަރާތުން މާފުށީ ދާއިރާގެ މެންބަރު ހުސެއިން ރިޒާ އާދަމް ހުށަހެޅުއްވި އިސްލާހުގައިވާ ގޮތުން ގާނޫނު އިސްލާހު ކުރަނީ ނުހައްގު މުއްސަނދިކަން ހޯދައި ލިބިގަތުމުގެ ކުށް ކަނޑައަޅާފައި އޮތް ގޮތުން މާނަ ކުރުމުގައި އޮޅުން އަރާތީ ގެންނަން ޖެހޭ އިސްލާހުތައް ގެނައުމުގެ ބޭނުމުގަ އެވެ.

އެ ގާނޫނުގެ 515 ވަނަ މާއްދާގެ (ހ) ގެ ތިން ވަނަ ނަމްބަރުގައި ކުރިން އޮންނަ ގޮތުން ދައުލަތުގެ މަގާމް އަދާ ކުރި މީހަކަށް ނުހައްގު މުއްސަނދިކަން ސާބިތު ކުރަން އެއްވެސް މީހެއްގެ ނަމުގައި ނުވަތަ އޭނާ އާ އާއިލީ، ޒާތީ، ނުވަތަ ވިޔަފާރީގެ ގުޅުމެއް އޮތް މީހެއްގެ ނަމުގައިވާ މުދަލަކީ ޖިނާއީ ބޮޑު ކުށެއްގެ އަމަލުން ހޯދި ފައިސާއެއް ކަމަށް ގަބޫލު ކުރުމަށް އެކަށީގެންވާ ހެކި ހުންނަން ޖެހެ އެވެ.

ނަމަވެސް ސަރުކާރުން ހުށަހަޅާފައި ވަނީ ދައުލަތުގެ މަގާމެއް އަދާކުރާ މީހަކު ދިރިއުޅުމުގެ ފެންވަރު އޭނާ ގާއިމުކޮށް ހިފަހައްޓާފައި ވަނީ ގާނޫނީ ގޮތުން ހުއްދަ ކޮށްފައިވާ ގޮތުގެ މަތިންކަން ސާބިތުކޮށް ނުދެވޭ ނަމަ އެކަން ކުށަކަށް ވާ ގޮތަށެވެ.

އެހެންވެ އެ އިސްލާހާ އެކު ކުށް ސާބިތު ކޮށްދިނުމުގެ ޒިންމާ އުފުލަން ޖެހޭނީ ތުހުމަތުވާ ފަރާތެވެ.

އެ ބިލުގައި ދައުލަތުގެ މުވައްޒަފެއް ކަމަށް ބުނާ ބުނުން ވެސް ވަނީ އިތުރަށް ސާފުކޮށްދީފަ އެވެ. ގާނޫނުގައި މިހާރު އޮންނަނީ ނުހައްގު މުއްސަނދިކަން ހޯދާފައި ވަނީ "ދައުލަތުގެ މުވައްޒަފެއްގެ މަގާމުގައި ހުރި މީހަކަށް" ކަމަށެވެ. ނަމަވެސް އެ އިބާރާތް "ދައުލަތުގެ މުވައްޒަފަކު ނުވަތަ ދައުލަތުގެ މުވައްޒަފެއްގެ މަގާމުގައި އަދާކޮށްފައިވާ މީހަކަށް" ބަދަލު ކުރަން ވަނީ ހުށަހަޅައިފަ އެވެ.

އެ ބިލު ހުށަހަޅަމުން މެންބަރު ރިޒާ ވިދާޅުވީ ބާޑަން އޮފް ޕްރޫފް އޮތީ ސީދާ ޝާމިލްވާ މީހާގެ މައްޗަށް ކަމަށް އޮތުމުން އެސެޓްތައް ހޯދައި ލިޔެކިޔުންތައް ރަނގަޅަށް ބެލެހެއްޓުމަށް ފަރުދުންނަށް ހިތްވަރު ލިބިގެންދާނެ ކަމަށެވެ.

"އެސެޓު ހޯދުމުގައި ހިމެނޭ ހަރުކަށި ޒިންމާ ފަރުދުންނަށް އެނގޭ ވަރަކަށް ކޮރަޕްޝަނާއި ފަސާދަ ނެތިގޮސް ހިސާބު ނުކުރެވޭ މުއްސަދިކަމުގެ މައްސަލަތައް މަދުވެގެން ދާނެ." އޭނާ ވިދާޅުވި އެވެ.