އެވޯޑުގެ މައްސަލަ ތަހުގީގު ކުރަން އޭސީސީން އެމްއެމްސީއަށް ވަދެއްޖެ

އޯޑިއޯ/ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު މޯލްޑިވްސް މީޑިއާ ކައުންސިލް (އެމްއެމްސީ) އިން "އަދަދު" އޮންލައިނަށް ދީފައި ވަނީ އުސޫލުތަކާއި މަގުސަދުތަކާ ހިލާފަށް ކަމަށް އެވޯޑްތަކަށް އިންސާފު ކޮށްދިން ފަނޑިޔާރުން ވިދާޅުވެފައި ވާތީ، އެ އެވޯޑު ދިން މައްސަލަ ތަހުގީގު ކުރަން އެ އިދާރާ އަށް އޭސީސީން ވަދެއްޖެ އެވެ.

ކޮރަޕްޝަންގެ މައްސަލަތައް ތަހުގީގުކުރާ އިދާރާ އިން މިއަދު ބުނީ، މަގާމުގެ ނުފޫޒު ބޭނުންކޮށްގެން އެވޯޑު ދިން ކަމަށް ބުނެ ހުށަހެޅި މައްސަލައެއް ލިބިފައިވާ ކަމަށެވެ. އެހެންވެ، ތަހުގީގަށް ބޭނުންވާ މައުލޫމާތު ހޯދަން ތަހުގީގީ އޮފިސަރުން އެމްއެމްސީގެ އޮފީހުގައި ހަރަކާތްތެރިވަމުންދާ ކަމަށް ވިދާޅުވި އެވެ.

މިދިޔަ ބުދަ ދުވަހުގެ ރޭ ބޭއްވި އެމްއެމްސީގެ އެވޯޑް ނައިޓްގައި، އޯޑިއޯ/ވީޑިއޯ ކެޓަގަރީގެ ތަހުގީގީ ދާއިރާއިން ނޫސްވެރިކަމުގެ އިނާމު ލިބުނީ "އަދަދު" އޮންލައިންގެ "ސްކީލާން" ޑޮކިއުމެންޓްރީއަށެވެ. އެއީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާން އެ މަނިކުފާނަށް ބޮޑެތި ތުހުމަތެއް ކުރައްވާފައިވާ ޑޮކިއުމަންޓްރީއެކެވެ.

މިދިޔަ އަހަރުގެ ރިޔާސީ އިންތިހާބުގެ ކެމްޕެއިން ތެރޭގައި ނެރުނު އެ ޑޮކިއުމެންޓްރީގައި ކުރާ ތުހުމަތުތައް ރައީސް މުއިއްޒުގެ ފަރާތްޕުޅުން އޭރު ވެސް ވަނީ ދޮގު ކުރައްވައިފަ އެވެ. ރައީސްގެ ފަރާތްޕުޅުން ވިދާޅުވެފައި ވަނީ އެއީ ހަގީގަތާ ހިލާފު ވާހަކަތަކެއް ހިމެނޭ ވީޑިއޯއެއް ކަމަށެވެ. އޭގެ ފަހުން، ތަހުގީގީ ކެޓަގަރީގެ އެވޯޑު "އަދަދު" އޮންލައިނަށް ދީފައި ވަނީ އުސޫލުތަކާއި މަގުސަދުތަކާ ހިލާފަށް ކަމަށް އެވޯޑްތަކަށް އިންސާފު ކޮށްދިން ފަނޑިޔާރުން ވެސް ވަނީ ވިދާލުވެފަ އެވެ.

އެ ޑޮކިއުމެންޓްރީ އަށް އިންސާފު ކޮށްދިން ފަނޑިޔާރުން ވަނީ އެ ބޭފުޅުން ނެރުއްވި ބަޔާނުގައި ހަތް ކަމެއް ފާހަގަކުރައްވައިފަ އެވެ.

އެއްކަމެއްގެ ގޮތުގައި ފަނޑިޔާރުން ވިދާޅުވީ، އެ ޑޮކިއުމެންޓްރީއަކީ ދިވެހި މީޑިއާގެ އަހުލާގީ މިންގަނޑުގައި ބަޔާންކުރާ އުސޫލުތަކަށް ބެލުމެއް ނެތި އާންމު ކޮށްފައިވާ ޑޮކިއުމެންޓްރީއެއްކަން އެމްއެމްސީ އަށް ފާހަގަވެގެން އެކަން އެ ގޮތަށް ނުކުރަން މިދިޔަ އަހަރުގެ ސެޕްޓެމްބަރު 28 ގައި ނޫސްބަޔާން ނެރެފައިވުމެވެ.

ނަމަވެސް، އެ ގޮތަށް އަންގާފައިވަނިކޮށް ވެސް އެ ހުށަހެޅުންތައް ބަލައިގަތް ނިޔަތާ މެދު ސުވާލު އުފެދޭ ކަމަށް ބުނެފައިވެ އެވެ.

އެމްއެމްއެސީ އެވޯޑް ނައިޓްގެ ހަފުލާ ދައުލަތުގެ މީޑިއާ ޕީއެސްއެމުން ލައިވްކޮށްފައިވާއިރު، "ސްކީލާން" ޑޮކިއުމެންޓްރީގެ ޓީޒާއެއް ވެސް ވަނީ ލައިވްކޮށް ދައްކައިފަ އެވެ. އެއީ ޕީއެސްއެމުން ގެންގުޅޭ މިންގަނޑާ ހިލާފު ވީޑިއޯއެއް ކަމަށް ވާތީ އެ ވީޑިއޯ ލައިވް ކުރި މައްސަލާގައި އެމްއެމްސީގެ ރައީސް އަހުމަދު މުސްތަފާ ވެސް ރޭ ޕީއެސްއެމްގެ ވަޒީފާ އިން ވަކިކުރި އެވެ. އެކަމަކު، މުސްތަފާ ވަޒީފާ އިން ވަކިކުރި ކުރުން ޕީއެސްއެމްގެ ބޯޑުގައި މުރާޖައާ ކޮށްދިނުމަށް އެދިވަޑައިގަތުމުން ވަޒީފާ ވަނީ އިޔާދަކޮށްދީފަ އެވެ.