ޕީއެސްއެމްގެ ބޮޑު ހިޔާނާތާ ގުޅިގެން ކުރީގެ ފައިނޭންސް ޑިރެކްޓަރުގެ ޕާސްޕޯޓު ހިފަހައްޓައިފި

ޕީއެސްއެމްގެ ބޮޑު ހިޔާނާތާ ގުޅިގެން އެ ކުންފުނީގެ ކުރީގެ ފައިނޭންސް ޑިރެކްޓަރު އަހުމަދު ހަނީފުގެ ޕާސްޕޯޓު ހިފަހައްޓައިފި އެވެ.

އޭސީސީގެ މީޑިއާ އޮފިޝަލަކު ވިދާޅުވީ، އެ އިދާރާއިން އެދިގެން ކްރިމިނަލް ކޯޓުން މިދިޔަ އާދިއްތަ ދުވަހު ޕާސްޕޯޓު ހިފަހައްޓައި، މައްސަލަ ތަހުގީގުކުރަމުން އަންނަކަމަށެވެ.

އޮޑިޓް އޮފީހުން މިދިޔަ މަހު ނެރުނު ރިޕޯޓުގައި ބުނީ އެ ކުންފުނިން 2020 އިން މިދިޔަ އޭޕްރީލް މަހުގެ ނިޔަލަށް އެކައުންޓަށް ޖަަމާކޮށްފައިވާ 4.6 މިލިއަން ރުފިޔާ އާއި 2017 އިން މިދިޔަ އޭޕްރީލް މަހަށް އާމްދަނީގެ ގޮތުގައި ލިބިފައިވާ ފައިސާގެ ތެރެއިން 4.3 މިލިއަން ރުފިޔާ އަދި ތިޖޫރީގައި ހުރި 190،000ރ. ގެއްލިފައިވާ ކަމަށެވެ.

އޭގެ އިތުރުން 2020 ވަނަ އަހަރުން މިދިޔަ އޭޕްރީލް މަހުގެ ނިޔަލަށް 373،988 ޑޮލަރު ގަތުމަށް ޕީއެސްއެމްގެ ބޭންކް އެކައުންޓުން 5.8 މިލިއަން ރުފިޔާ ނަގާފައިވާ ކަމަށް އޮޑިޓް އޮފީހުން ބުންޏެވެ. ނަމަވެސް، އޭގެ ތެރެއިން ފީއެސްއެމަށް 80 ޕަސެންޓު ނުލިބޭ ކަމަށް ބުނެފައިވެ އެވެ. އެ ކުންފުންޏަށް ލިބުނީ އެ ރުފިޔާއަށްވާ ޑޮލަރުގެ ތެރެއިން އެންމެ 76،731 ޑޮލަރު އެކަންޏެވެ. ބާކީ 297،257 ޑޮލަރު އެ ކުންފުންޏަށް ވަދެފައިވާކަން އެނގެން ނެތް ކަމަށް ވެސް އޮޑިޓް ރިޕޯޓުގައި ބުނެފައިވެ އެވެ.

އޮޑިޓް ރިޕޯޓުން އެނގޭ ގޮތުގައި، ޑޮލަރު ގަތުމަށް ހިންގި މުއާމަލާތްތަކުގެ ތެރެއިން 4.5 މިލިއަން ރުފިޔާ ދޫކޮށްފައި ވަނީ ޗެކް މެދުވެރިކޮށެވެ. އޭގެ ތެރެއިން 968،580ރ. އާ ހަވާލުވެ، ސޮއިކޮށްފައި އޮތީ ހަނީފެވެ.

ހިޔާނާތުގެ އެ މައްސަލައާ ގުޅިގެން މިދިޔަ އޭޕްރީލް މަހު އޭނާ ސަސްޕެންޑް ކުރުމަށް ފަހު، ޖެހިގެން އައި މަހު ވަނީ ވަނީ ވަޒީފާ އިން ވެސް ވަކިކޮށްފަ އެވެ.

އެ ރިޕޯޓުގައި ބުނީ، އޮންލައިންކޮށް ޑޮލަރު ގަންނަން ހިންގި މުއާމަލާތެއްގައި 1.3 މިލިއަން ރުފިޔާއަށްވާ 75،491 ޑޮލަރަށް 1.2 މިލިއަން ރުފިޔާ ހަނީފުގެ ދަރިއެއްގެ ބޭންކް އެކައުންޓަށް އެކި ފަހަރު މަތިން ޖަމާކޮށްފައިވާކަން ފާހަގަކުރެވިފައިވާ ކަމަށެވެ.

އޮންލައިން ޓްރާންސްފާކޮށްގެން ޑޮލަރުގެ މުއާމަލާތް ހިންގުމުގެ ނަމުގައި 405،122ރ. ގެ ޕޭމަންޓް ވައުޗާތަކުގައި ހުއްދަ ދިނުމުގެ ގޮތުން ސޮއިކޮށްފައި ވަނީ ވެސް ހަނީފު އެކަނި ކަމަށް އޮޑިޓް އޮފީހުން ބުންޏެވެ. އަދި އެއްވެސް މީހަކު ސޮއިނުކޮށް 30،000ރ. ގެ މުއާމަލާތް ހިންގާފައިވާ ކަމަށް ވެސް އޮޑިޓުގައި ބުނެފައިވެ އެވެ.