ޕީއެސްއެމްގެ ހިޔާނާތުގެ މައްސަލަ އޭސީސީން ބަލަން ފަށައިފި

ޕީއެސްއެމުން ޑޮލަރު މާރުކުރުމާއި އާމްދަނީ އަދި ތިޖޫރިން ނުވަ މިލިއަން ރުފިޔާ ގެއްލުނު މައްސަލަ އޭސީސީން ތަހުގީގުކުރަން ފަށައިފި އެވެ.

އެ ކޮމިޝަނުން މިރޭ ނެރުނު ބަޔާނުގައި ބުނީ ޑޮލަރުގެ މައްސަލަ ތަހުގީގުކޮށްދިނުމަށް އެދުނީ ދައުލަތުގެ މީޑިއާއިން މިދިޔަ ޖުލައި މަހުގެ ތެރޭގައި ކަމަށެވެ.

ޕްލިމިނަރީ ތަހުގީގު ނިންމުމަށްފަހު އިތުރަށް ތަހުގީގުކުރަން ޖެހޭތީ އެ މައްސަލަ ބަލަމުންދާ ކަމަށް ވެސް އޭސީސީން ބުންޏެވެ.

އޮޑިޓަ ޖެނެރަލްގެ ރިޕޯޓުގައިވާ ގޮތުން ޕީއެސްއެމުން ގެއްލިފައި ވަނީ 2017 ވަނަ އަހަރުން ފެށިގެން މި އަހަރުގެ އޭޕްރީލް މަހުގެ ނިޔަލަށް 4.9 މިލިއަން ރުފިޔާ އާއި ތިޖޫރީގައި ހުރި 190،000ރ. އެވެ. އެ ފައިސާ ޖަމާކޮށްފައި ވަނީ ޕީއެސްއެމްގެ ފައިނޭންސް ޑިރެކްޓަރުގެ މަގާމުގައި އޭރު ހުންނެވި އަހުމަދު ހަނީފާއި އޭނާގެ ދަރިއެއްގެ އެކައުންޓަށް ކަމަށް އެ ރިޕޯޓުގައިވެ އެވެ.

މިދިޔަ އޭޕްރީލް މަހު އޭނާ ވަޒީފާއިން ސަސްޕެންޑުކުރުމަށްފަހު ޖެހިގެން އައި މެއި މަހު ވަނީ މަގާމުން ވަކިކޮށްފަ އެވެ.

އޮޑިޓު ރިޕޯޓުގައި ބުނީ 2020 ވަނަ އަހަރުން ފެށިގެން އޭޕްރީލް 2024 ގެ ނިޔަލަށް 373،988 ޑޮލަރު ގަތުމަށް ޕީއެސްއެމްގެ ބޭންކް އެކައުންޓުން 5.8 މިލިއަން ރުފިޔާ ނެގިއަސް އޭގެ ތެރެއިން 80 ޕަސެންޓު އެ ކުންފުންޏަށް ނުލިބޭ ކަމަށެވެ. ޕީއެސްއެމަށް ލިބުނީ އެ ރުފިޔާއަށްވާ ޑޮލަރުގެ ތެރެއިން އެންމެ 76،731 ޑޮލަރެވެ. ބާކީ 297،257 ޑޮލަރު އެ ކުންފުންޏަށް ވަދެފައިވާކަން އެނގެން ނެތް ކަމަށް އެ ރިޕޯޓުގައި ވެ އެވެ.

އޮޑިޓަ ޖެނެރަލްގެ ރިޕޯޓުގައިވާ ގޮތުން، އޮންލައިންކޮށް ޑޮލަރު ގަންނަން ހިންގި މުއާމަލާތެއްގައި 1.3 މިލިއަން ރުފިޔާއަށްވާ 75،491 ޑޮލަރަށް 1.2 މިލިއަން ރުފިޔާ ހަނީފުގެ ދަރިއެއްގެ ބޭންކް އެކައުންޓަށް އެކި ފަހަރު މަތިން ޖަމާކޮށްފައިވެ އެވެ. އޮންލައިން ޓްރާންސްފާ ކޮށްގެން ޑޮލަރުގެ މުއާމަލާތް ހިންގުމުގެ ނަމުގައި 405،122ރ. ގެ ޕޭމަންޓް ވައުޗާތަކުގައި ހުއްދަ ދިނުމުގެ ގޮތުން ސޮއިކޮށްފައި ވަނީ ވެސް ހަނީފު އެކަނި ކަމަށާއި އެއްވެސް މީހަކު ސޮއިނުކޮށް 30،000ރ. ގެ މުއާމަލާތް ހިންގާފައިވާ ކަމަށް އެ ރިޕޯޓުގައި ވެ އެވެ.