މުރައިދޫ ގޭގައި ތިބެނީ 4 މުވައްޒަފުން: މަޖިލިސް

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ރަސްމީ ގެކޮޅުގައި މަސައްކަތް ކުރަނީ އެންމެ ހަތަރު މުވައްޒަފުން ކަމަށް، ރައްޔިތުންގެ މަޖިލީހުގެ އިދާރާ އިން މިއަދު ބުނެފި އެވެ.

މަޖިލީހުން ހާމަކުރި މައުލޫމާތުތަކުގައިވާ ގޮތުން، އިތުރު ގަޑި ނުހިމަނާ އެ މުވައްޒަފުންގެ މުސާރައަށް މަހެއްގެ މައްޗަށް އެއް ލައްކަ ރުފިޔާ ވެސް ނާރަ އެވެ. ހަތަރު މުވައްޒަފުންގެ މުސާރައަކީ މަހަކު ދެނީ 96،917 ރުފިޔާ އެވެ.

މ. މުރައިދޫގޭގެ މުވައްޒަފުންގެ އަދަދު ހޯދަން "މިހާރު" އިން އާރުޓީއައި ހުށަހެޅުމުން އޭގެ މުއްދަތު އިތުރުކުރުމަށް ފަހު، މުވައްޒަފުންގެ އަދަދާ ގުޅޭގޮތުން އެ އިދާރާ އިން އޭރު ބުނީ، މަޖިލިހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މަޖިލީހުގެ ރައީސަކީ ހިމާޔަތާއި ރައްކާތެރިކަން ލިބިވަޑައިގެންފައިވާ ބޭފުޅަކަށް ވާތީ، މުވައްޒަފުންގެ އަދަދު ހާމަކުރުމާ މެދު ގޮތް ނިންމާނީ 241 ކޮމިޓީން ކަމަށެވެ.

ނަމަވެސް، އެ ކޮމިޓީން މި މަހުގެ 14 ގައި ބޭއްވި ބައްދަލުވުމުގައި ވަނީ އެ މައުލޫމާތު ސިއްރުކުރަން ނިންމައިފަ އެވެ. މުވައްޒަފުންނާ ގުޅޭ އެއްވެސް ތަފްސީލެއް ހާމަނުކުރަން ހުށަހެޅުއްވީ ސަރުކާރު ހިންގާ ޕާޓީ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު އެވެ.

އެކަމަކު، މި ސަރުކާރުގެ މައުލޫމާތު ހާމަކުރުމުގެ ސިޔާސަތުގެ ދަށުން ރައީސް ޑރ. މުހައްމަދު މުއިއްޒު ވަނީ މުރައިދޫ ގޭގެ މުވައްޒަފުންގެ އަދަދު ހާމަކުރަން އެދިވަޑައިގެންފަ އެވެ. އެއާއެކު، ހަމަ އެ ދުވަހު، ކޮމިޓީން އިތުރު ބައްދަލުވުމެއް ބޭއްވުމަށްފަހު، މުވައްޒަފުންގެ އަދަދު ހާމަކުރަން ނިންމައިފަ އެވެ.

އޭގެ ދެ ހަފުތާ ފަހުން، މަޖިލީހުގެ އިދާރާއިން މިއަދު ދިން ޖަވާބުގައި ބުނީ މުރައިދޫގޭގައި މަސައްކަތްކުރަނީ ހަތަރު މުވައްޒަފުން ކަމަށެވެ. އެއީ؛

- ޗީފް އޮފް ސްޓާފް، ތަޖުރިބާކާރު ނޫސްވެރިޔާ މުންޑޫ އާދަމް ހަލީމް

- ޑިރެކްޓާ ޖެނެރަލް، ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް

- ސީނިއާ އިލެކްޓްރިކް އެންޑް މެއިންޓަނެންސް އޮފިސަރު، އަލީ ސާޖިދު

- ޖެނެރަލް ސާވިސް އޮފިސަރު އިސްމާއިލް ތޯރިގު

އެ ބޭފުޅުންގެ ތެރެއިން ޗީފް އޮފް ސްޓާފް ފިޔަވައި އެހެން މަގާމުތަކަށް އިތުރު ގަޑީގެ ފައިސާ ލިބެ އެވެ.

މުސާރައިގެ ތަފްސީލް

ޗީފް އޮފް ސްޓާފް: މުސާރައަށް 21،000ރ، ޕެންޝަނަށް 1،470ރ، ހާއްސަ އެލަވަންސްގެ ގޮތުގައި 9،450ރ، ލިވިން އެލަވަންސަށް 5،000ރ، ފޯނު އެލަވަންސަށް 1،000ރ އަދި ސާވިސް އެލަވަންސްގެ 4،400ރ. އާއެކު މަހަކު 39،380ރ.

ޑިރެކްޓާ ޖެނެރަލް: މުސާރަ 12،400ރ، ޕެންޝަނަށް 868ރ. ހާއްސަ އެލަވަންސަށް 5،580ރ. ލިވިން އެލަވަންސަށް 3،500ރ، ފޯނު އެލަވަންސަށް 600 އަދި ސާވިސް އެލަވަންސްގެ 4،400ރ. އާއެކު މަހަކު 25،612ރ.

ސީނިއާ އިލެކްޓްރިކް އެންޑް މެއިންޓަނެންސް އޮފިސަރު: މުސާރައަށް 6،260ރ، ޕެންޝަނަށް 437ރ، ހާއްސަ އެލަވަންސް ގޮތުގައި 2،812ރ، ލިވިން އެލަވަންސަށް 3،500ރ، ފޯނު އެލަވަންސަށް 400ރ. އަދި ސާވިސް އެލަވަންސްގެ ގޮތުގައި 4،400ރ. އާއެކު 16،925ރ.

ޖެނެރަލް ސާވިސް އޮފިސަރު: މުސާރައަށް 5،000ރ، ޕެންޝަނަށް 350، ހާއްސަ އެލަވަންސަށް 2،250ރ، ލިވިން އެލަވަންސްގެ ގޮތުގައި 3،500ރ، ފޯނު އެލަވަންސަށް 200ރ އަދި ސާވިސް އެލަވަންސްގެ 4،400ރ. އާއެކު ޖުމްލަ 15،000ރ.

މުރައިދޫގެއަކީ މެއި، 2021 ގައި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއަށް ފަހު، ސަލާމަތީ ގޮތުން ބަލަން ޖެހޭ ކަންކަމާ ގުޅިގެން މަޖިލީހުގެ ރައީސުން ދިރިއުޅުއްވުމަށް ދައުލަތުން ހާއްސަކުރި ގެކޮޅެކެވެ.