ޖަލު އޮފިސަރުންގެ މައްސަލަ: ދައުލަތާއެކު ހެދި އިއުތިރާފް އެއްބަސްވުން ދެ މީހަކު އަނބުރާ ގެންގޮސްފި

މާފުށީ ޖަލަށް ވަގަށް ފޯނާއި މަސްތުވާތަކެތި ވައްދައިގެން ކަރެކްޝަނަލް ސާވިސްގެ އޮފިސަރުންތަކެއް ގިނަ އަދަދެއްގެ ފައިސާ ހޯދިކަމުގެ ތުހުމަތުގައި ދައުލަތުން ދައުވާކުރާ މައްސަލާގައި އިއުތިރާފްގެ އެއްބަސްވުން ހަދާފައިވާ ދެ މީހަކު އެ އެއްބަސްވުން އަނބުރާ ގެންގޮސްފި އެވެ.

މިދިޔަ ޖޫން މަހު ފުލުހުން ހިންގި އޮޕަރޭޝަނެއްގައި، ޖަލަށް ވަގަށް ތަކެތި ވައްދައިގެން 70 މިލިއަނަށް ވުރެ ގިނަ ރުފިޔާ ހޯދިކަމުގެ ތުހުމަތުގައި ކަރެކްޝަންސްގެ 18 މީހަކު ހައްޔަރުކުރި ނަމަވެސް ދައުލަތުން އެ މައްސަލާގައި ދައުވާކުރަނީ ފަސް މީހެއްގެ މައްޗަށެވެ.

އެއީ ރ. އުނގޫފާރު އައިވަރީހައުސް، ޖިނާހް އަބްދުއްރަހީމާއި ނ. ލަންދޫ ކާމިނީގޭ އަލީ އަސްފާގާއި ކ. މާފުށީ ބީޗްހައުސް އަލީ ޝަހީމާއި ގއ. ވިލިނގިލީ ކުއްޅަވައްގޭ މުހައްމަދު ފަތޫހު ފަތުހުﷲ އާއި ހދ. ނޭކުރެންދޫ ތަރާނާގޭ އަލީ ނާޒިމްގެ މައްޗަށެވެ.

އެ މީހުންގެ މައްޗަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އާއި ނުހައްގު މުއްސަނދިކަން ހޯދުމުގެ ދައުވާ އެވެ. އަދި ޖިނާހާއި ޝަހީމްގެ މައްޗަށް މަނީ ލޯންޑްރިންގެ އިތުރު ދައުވާއެއް ވެސް ކުރެ އެވެ.

އޭގެ ތެރެއިން އަސްފާގާއި ނާޒިމާއި ފަތޫހުއާ އެކު ދައުލަތުން އޮތީ އިއުތިރާފްގެ އެއްބަސްވުމެއް ކުރިން ހަދައިފަ އެވެ. އެ އެއްބަސްވުން އޮތްގޮތުން އެ މީހުން ކޯޓުގައި ކުށަށް އެއްބަސްވުމުން އެ މީހުންގެ މައްޗަށް ލުއި އަދަބުތަކެއް ދޭން ދައުލަތުން އެދޭނެ އެވެ.

އެ މައްސަލާގައި ކްރިިމިނަލް ކޯޓުގައި މިއަދު ބޭއްވި އަޑުއެހުމުގައި އަސްފާގާއި ނާޒިމްގެ ވަކީލުން ބުނީ އިއުތިރާފްގެ އެއްބަސްވުމުން ރުޖޫއަވާން ބޭނުންވާ ކަމަށެވެ. ސަބަބަކީ ތަހުގީގު މަރުހަލާގައި އެ އެއްބަސްވުން ހެދީ ތަހުގީގު މަރުހަލާހައި މަންފާތަކެއް އެ މީހުންނަށް ދޭނެ ކަމަށް ބުނެ ކަމަށްވާތީ ކަމަށް ވަކީލުން ބުންޏެވެ.

ނަމަވެސް ފަތޫހުގެ ފަރާތުން އެ އެއްބަސްވުމާ ބެހޭގޮތުން އެ އަޑުއެހުމުގައި ވާހަކައެއް ނުދައްކަ އެވެ.

ދައުލަތުން ބުނީ އެއްބަސްވުން އަނބުރާ ގެންދާނަމަ، އިތުރު ދައުވާތަކެއް ހިމަނައިގެން އެ މީހުންގެ މައްޗަށް ފަހުން ދައުވާކުރަން ބޭނުންވާ ކަމަށެވެ. އެހެންވެ، އެކަމަށްޓަކައި އެ މައްސަލަ އަނބުރާ ފޮނުވާލަން ދައުލަތުން އެދުނެވެ.

އެ މައްސަލަ ބައްލަވާ ގާޒީ އިސްމާއިލް ޝަފީއު ވިދާޅުވީ އަސްފާގާއި ނާޒިމްގެ ބައި އަލުން ތަހުގީގު ކުރުމަށްފަހު ހުށަހެޅޭ ގޮތަށް އަނބުރާ ފޮނުވާލާނެ ކަމަށެވެ.

އެ މައްސަލާގެ އަޑުއެހުންތައް ސިއްރުކުރަން ފަތޫހުގެ ވަކީލް ނޫރުއްސަލާމް އަބޫބަކުރު މިއަދު އެދިވަޑައިގަތެވެ. އޭނާ ވިދާޅުވީ ދައުލަތުގެ މުއައްސަސާއެއްގެ މުވައްޒަފުންތަކެއްގެ މައްޗަށް ކޮރަޕްޝަންގެ ތުހުމަތުކޮށް ހިންގާ ޝަރީއަތެއް އާންމުކޮށް ހުޅުވާލުމުން މުޖްތަމައުގެ އާންމު އަހްލާގީ މިންގަނޑަށް ނޭދެވޭ އަސަރުކުރާ ކަމަށެވެ.

މީގެ އިތުރުން ތުހުމަތު ކުރެވޭ މީހުންނަކީ ކުށްވެރިން ކަމަށް ދޭހަވާ ގޮތަށް މުޖްތަމައުއަށް ގަބޫލު ކުރެވޭނެ ކަމަށް ވެސް އޭނާ ވިދާޅުވި އެވެ. ނަމަވެސް ދައުލަތުން ބުނީ އެ ޝަރީއަތް ހިނގާ ގޮތް އާންމުންނަށް އެނގެން ޖެހޭނެ ކަމަށާއި އަދި ސިއްރު ކުރަންޖެހޭ އެއްވެސް ސަބަބެއް ނެތް ކަމަށް ދައުލަތުން ބުންޏެވެ.

ގާޒީ ޝަފީއު ވެސް ނިންމެވީ އެ މައްސަލަ ސިއްރު ކުރަންޖެހޭ ސަބަބެއް ނެތް ކަމަށެވެ.

އެ މައްސަލާގައި މޮބައިލް ފޮރެންސިކް ރިޕޯޓް އަދިވެސް ނުލިބޭތީ އެ ރިޕޯޓް ގިނަވެގެން އެއް މަސް ތެރޭގައި ހުށަހަޅަން މިއަދުގެ އަޑުއެހުމުގައި ގާޒީ އެންގެވި އެވެ.